Како да се намали цената на ТВ-правата: Можеби со колективно преговарање?

Претседателот на Федералната комисија за комуникации (ФЦЦ), Брендан Кар, предложи телевизиските мрежи да имаат дозвола колективно да преговараат со спортските лиги како начин за намалување на трошоците за програмата.

Националната фудбалска лига (НГЛ) и другите лиги имаат ослободување од антимонополското законодавство што им овозможува колективно да преговараат за медиумски договори во име на своите тимови, и тоа според Законот за спортско емитување од 1961 година, рече Кар.

„Ако тимовите на НФЛ можат колективно да преговараат, би можеле и телевизиските емитери, но за тоа не сум разговарал претходно. Можеби и тие треба да можат колективно да преговараат“, рече Кар во четвртокот на конференцијата организирана од новинската агенција „Семафор“ во Вашингтон.

Кар не објасни како би можела да функционира колективната моќ на радиодифузерите. Во 2024 година Министерството за правда на САД (DOJ) достави поднесок до Судот во поддршка на тужбата на „Фубо ТВ“ (FuboTV Inc.) против предложениот проект за стриминг што би комбинирал спортски преноси од „Фокс“ (Fox Corp.), „Волт Дизни“ (Walt Disney Co.) и „Ворнер Брос“ (Warner Bros. Discovery Inc.). Министерството за правда се согласи со „Фубо ТВ“ дека проектот е антиконкурентски, а услугата, наречена „вену“ (Venu), на крајот беше суспендирана.

 

Агенцијата што ја води Кар веќе започна истрага за „тековните и новите трендови во дистрибуцијата на директните спортски преноси“, барајќи јавно мислење за прашања како што е тоа дали локалните гледачи се оштетени од порастот на стриминг-телевизијата.

Сенаторот Мајк Ли, републиканец од Јута и претседател на Антимонополската поткомисија на Сенатот, испрати посебно писмо на почетокот на март до Министерството за правда и Федералната трговска комисија, барајќи од нив да истражат дали антимонополското ослободување за спортските лиги сè уште има смисла.

Телевизиските мрежи како што се Еј-би-си (ABC), Ен-би-си (NBC) и Си-би-ес (CBS), како и кабелските компании, преговараат поединечно за да стекнат права за емитување спортски настани на своите канали. Тие се соочуваат со зголемен притисок бидејќи стриминг-услугите како што се Нетфликс (Netflix Inc.) Амазон, (Amazon.com Inc.) и Јутјуб (YouTube) успешно нудат игри на своите онлајн платформи со платен пристап.

Според Кар, зголемената конкуренција ги зголемува цените што радиодифузерите мора да ги платат за спортски преноси во живо, а наедно му отежнува на просечниот гледач да пристапи до нив.

„Ако го погледнете огромното зголемување на цената што треба да ја платат радиодифузерите за да ги стекнат правата за натпреварите од НФЛ, тоа се пренесува на секој локален пазар, што потенцијално одзема многу пари од тие локални пазари“, рече тој.