Претседателот на ФИФА, Џани Инфантино, ги бранеше цените на билетите за натпреварите од Светското првенство по реакциите од навивачите и американските конгресмени, кои сметаат дека високите трошоци ги одвраќаат посетителите од турнирот што започнува следниот месец.
ФИФА добила 500 милиони барања за билети уште пред годинава да започне продажбата, во споредба со помалку од 50 милиони за светските првенства во 2018 и 2022 година, изјави Инфантино во вторникот на панелот на конференцијата „Милкен“ (Milken Institute Global Conference) во Беверли Хилс.
Членови на Конгресот претходно годинава испратија писмо до ФИФА по почетокот на продажбата на билетите, чии минимални цени изнесуваа 140 долари, но често достигнуваа и неколку илјади долари. Инфантино, сојузник на претседателот Доналд Трамп, изјави дека цените делумно биле поставени како одговор на американскиот пазар, каде што постои голема заработка од препродажба на билети.
„Иако некои велат дека билетите се скапи, на крајот на секундарниот пазар тие достигнуваат уште повисоки цени, повеќе од двојно повисоки од нашите“, рече тој.
Билетите за финалето на страниците за препродажба веќе надминуваат 10.000 долари. Инфантино наведе дека 25 отсто од билетите за групната фаза може да се купат за помалку од 300 долари.
Рекордни 48 репрезентации ќе одиграат 104 натпревари на годинашното Светско првенство во 16 града во САД, Мексико и Канада, кое започнува на 11 јуни и завршува на 19 јули. Ова е првпат турнирот да се одржува во Северна Америка од 1994 година.
Инфантино изјави дека го изненадува тоа што САД, кои се гордеат дека се светски лидер во многу области, не се посветиле посериозно на доминација во најпопуларниот спорт во светот.
„Не разбирам како можете да бидете задоволни што сте број 20 во спортот број еден во светот“, рече тој. САД, предводени од аргентинскиот тренер Маурисио Почетино, моментално се 16. на ранг-листата на ФИФА. На врвот се Франција, Шпанија и актуелниот светски шампион Аргентина.
.webp){kind=icon}
