„Тата стил“ продава фудбалски прволигаш од Индија за еден долар

„Тата стил“ (Tata Steel Ltd.) продава фудбалски тим кој беше дел од највисоката професионална лига во Индија за симболичен 1 долар, што претставува удар за амбициите на земјата да се искачи на светските рангирања.

Компанијата ќе ја префрли лиценцата за настап во Индиската Суперлига на ФК Џамшедпур (Jamshedpur FC) заедно со договорите на 12 играчи и двајца тренери на клубот Черчил Брадерс (Churchill Brothers Sports Club Pvt.) со седиште во Гоа, соопшти „Тата стил“.

Договорот ќе им овозможи на играчите на Џамшедпур ФК да продолжат да играат професионално.

Прекинувањето на поддршката од страна на „Тата стил“ претставува назадување за професионалниот фудбал во Индија. Земјата со повеќе од 1,4 милијарди жители се наоѓа на ниското 138 место на светската ранг-листа на ФИФА и никогаш не учествувала на Светско првенство. За слабата состојба на спортот во земјата се обвинуваат лошото управување, недостигот на терени и академии за развој на младите таленти, како и отсуството на долгорочно планирање.

Сепак, според неодамнешен извештај за спортски спонзорства на „ВПП медија“ (WPP Media), фудбалот е вториот најкоментиран тимски спорт во земјата, веднаш по крикетот. Иако Индиската Суперлига, поддржана од милијардерот Мукеш Амбани и ѕвезди од Боливуд, внесе капитал и гламур по своето основање во 2014 година, таа не успеа значително да го подобри квалитетот на играта.

„’Тата стил’ ќе продолжи да се фокусира на фудбалот на локално и младинско ниво, имајќи ја предвид нашата традиција во откривање и развивање млади таленти, особено во локалните и племенските заедници“, изјави Д.Б. Сундара Рамам, потпретседател за корпоративни услуги на компанијата.