Леброн позајмил 300 милиони долари, ја трошел идната заработка

Кога Леброн Џејмс во 2018 година потпиша договор вреден 154 милиони долари за да ги предводи Лос Анџелес Лејкерс до титулата во НБА, тоа не беше неговиот најголем деловен потег таа година.

Само неколку месеци пред преминувањето во Лејкерс, фирма во сопственост на Леброн Џејмс зела кредит од речиси 300 милиони долари од две компании за животно осигурување од американскиот Среден Запад. Тие компании во управувањето со инвестициите ги советувала една од компаниите од групацијата „Гугенхајм“ (Guggenheim Partners), покажуваат податоците од осигурителната индустрија во кои „Блумберг“ имал увид.  

Претходно непријавените обврзници, кои доспеваат во 2049 година, биле структурирани така што на Џејмс веднаш му обезбедат готовина, а биле обезбедени со идните приходи поврзани со неговата заработка надвор од кошарката, како што е доживотниот спонзорски договор со компанијата „Најк“ (Nike Inc.), велат извори запознаени со овој аранжман.

Овој бран на кредитирање започнал пред челникот на „Гугенхајм“, Марк Волтер, да почне да презема сопственички удел во славниот кошаркарски тим. Во остар пресврт овој месец, милијардерот се согласи да ги продаде Лејкерс среде федерална истрага на одредени делови од неговото деловно царство. Нема индикации дека кредитите за Џејмс на кој било начин се поврзани со тие истраги.

Спортистите и уметниците сè почесто ги користат идните приходи, како што се авторските надоместоци и договорите за лиценцирање, за да структурираат аранжмани што им овозможуваат веднаш да дојдат до капитал. Дејвид Боуви своевремено беше првиот музички уметник кој излезе на Волстрит за да ги монетизира идните приходи од својата музика, со што го отвори патот за развојот на пазарот на т.н. егзотични хартии од вредност.

Сепак, аранжманот на Џејмс дава уште еден увид во тоа како Волтер и другите менаџери на пари од Волстрит длабоко го променија некогаш прилично конзервативниот бизнис со животно осигурување, насочувајќи ги премиите на осигурениците кон поневообичаени инвестиции. „Гугенхајм“ сè повеќе ги насочува парите на осигурителните компании кон приватни кредити, спортски франшизи и, во случајот на Џејмс, финансирање на врвен спортист. Тоа е далеку од традиционалниот фокус на индустријата на едноставни и релативно сигурни средства што сигурно можат да ги покријат идните обврски кон осигурениците.

Двете осигурителни компании,  „Норт Американ“ (North American Company for Life and Health Insurance) и „Мидленд Нешнл“ (Midland National Life Insurance Co.), се во сопственост на СФГ (Sammons Financial Group). Во разговорите со инвеститорите оваа недела, „Самонс“ навел дека „Гугенхајм“ до 2021 година бил единствениот управител задолжен за изборот на средства за портфолијата на компанијата, според зборовите на лица кои присуствувале на разговорот и кои, како и другите извори во оваа приказна, побарале да останат анонимни бидејќи зборуваат за доверливи работи.

„Самонс“ во последно време се дистанцира од „Гугенхајм“. Компанијата на Волтер долго време меѓу своите најголеми инвеститори ја имала матичната компанија на „Самонс“. Сепак, за време на разговорот претставниците на „Самонс“ рекле дека компанијата сега го намалува тој удел, велат изворите.

„Трансакциите беа заштита што господинот Џејмс ја реализираше користејќи ја својата лични, не-НБА плати, средства и приходи, што е многу вообичаена финансиска структура за поединец со вакво ниво на приходи и средства“, изјави портпаролот на Леброн Џејмс.

Портпаролите на „Самонс“ и „Гугенхајм“ одбиле да го коментираат случајот.

Вниманието на американското Министерство за правда и Комисијата за хартии од вредност и берзи (SEC) насочено кон деловното царство на Волтер дополнително го сврте вниманието кон испреплетеноста на работењето на менаџерите на средства и осигурителните компании.

Моќните играчи од Волстрит ги користеле билансите на осигурителните компании за да остварат повисоки приноси, насочувајќи ги заштедите на обичните Американци во помалку транспарентни и посложени инвестиции. Таквиот пристап им овозможува на менаџерите на средства да креираат и структурираат зделки, а потоа да најдат купувачи кои не се противат на тоа што таквите инвестиции се евидентираат во билансите на осигурителните компании врз кои тие имаат влијание.

 King James Funding

Задолжувањето на Џејмс кај двете осигурителни компании од Средниот Запад - структурирано како продажба на обврзници обезбедени со средства - започнало додека тој сè уште играше за Кливленд Кавалирс (Cleveland Cavaliers), во момент кога неговата кариера беше пред нов подем.

Двете компании купиле речиси 300 милиони долари обврзници што ги издала компанијата КЏФ (King James Funding LLC), под контрола на Џејмс, покажуваат податоците. Неколку години подоцна компанијата отплатила дел од тој долг, а потоа им продала на осигурителите нови обврзници, така што до крајот на минатата година тие во своите книги имале околу 245 милиони долари од тој долг.

 

Почетните обврзници од 2018 година носеле камата од 4,8 проценти и доспеваат дури на крајот на 2049 година, покажуваат документите од осигурителната индустрија. Другите детали од договорот не се наведени во документите што ги прегледал „Блумберг“.

Неколку месеци по склучувањето на тој аранжман, Џејмс како слободен играч почнал да бара нов клуб и на крајот ги избрал Лејкерс. Во често прераскажуваниот момент, во неговата куќа дошол долгогодишниот деловен партнер на Марк Волтер, Меџик Џонсон, тогаш еден од водечките луѓе на Лејкерс. Џејмс на крајот потпишал четиригодишен договор.

Потоа, во средината на август 2022 година, Џејмс потпишал продолжување на договорот со Лејкерс вредно 97 милиони долари. Приближно во исто време, истите осигурителни компании ѝ обезбедиле на неговата компанија дополнителни средства, купувајќи речиси 60 милиони долари обврзници со рок на доспевање од 34 години и камата од 5,75 проценти, покажуваат податоците на осигурителите.

„Двете трансакции беа кредитно оценети од независна трета страна, а трансакцијата од 2022 година целосно беше одобрена од НБА“, изјави портпаролот на Џејмс, нагласувајќи дека спортистот немал никаква поврзаност со „Гугенхајм“, „Самонс“, „Норт Американ“ (North American Co.) или „Мидленд Нешнл“ (Midland National), освен нивното учество во трансакциите.

„Гугенхајм“ бил вклучен и во некои други приватни деловни проекти на Џејмс. Кога започна пандемијата на ковид во 2020 година, Џејмс и неговиот пријател од детството и деловен партнер Маверик Картер објавија дека собрале 100 милиони долари за нивната медиумска компанија „Спрингхил“ (SpringHill Co). „Гугенхајм“ бил наведен меѓу инвеститорите во компанијата.

Заминување од Лејкерс

Повеќе од една деценија Волтер ги комбинирал парите на осигурителните компании со инвестиции во спортот. Неговото преземање на ЛА Доџерс (Los Angeles Dodgers) во 2012 година, заедно со деловни партнери меѓу кои бил и Џонсон, во голема мера се потпирало на осигурителната индустрија.

Потоа новите сопственици на клубот ги зголемиле инвестициите во играчи за да ја претворат франшизата во еден од бисерите на професионалниот бејзбол. Доџерс се појавија во пет од последните девет финалиња на светската серија (World Series). Сепак, таквата стратегија не е подеднакво изводлива во НБА, која има построги ограничувања кога станува збор за платите на играчите.

Преземањето на Лејкерс од страна на Волтер започна во 2021 година, кога тој куп малцински удел, со права што му го отворија патот кон мнозинска сопственост минатата година.

Продажбата на клубот се случи во момент кога Волтер го реструктуира своето деловно царство за да разреши повеќе од 20 милијарди долари кредити евидентирани во билансите на неговите осигурителни компании. Тие кредити требало да бидат означени како финансирање на поврзани компании, но не биле. Прописите им дозволуваат на осигурителите да позајмуваат пари на такви поврзани страни, но бараат таквите трансакции да бидат обелоденети.

Џејмс, во меѓувреме, објави дека ги напушта Лејкерс и потпиша двегодишен договор со Филаделфија (Philadelphia 76ers). Неговиот нов клуб е во сосопственост на Џош Харис, чија компанија 26НП (26North Partners) инвестира во приватен капитал на средни компании, кредитирање и осигурување.