Спортската облека е новата деловна облека

Ако се чудите што да облечете за во канцеларија деновиве, не гледајте подалеку од етикетата што ја прави и вашата облека за вежбање. 

Иновативните ткаенини се основа за трендот „слободно работно време“ (workleisure), кој го спојува професионалниот изглед со опуштениот крој за да обезбеди во канцеларијата чувство како работа оддома, велат експертите за стил и за предвидување на трендовите. Многу работници се навикнаа на својата удобна облека во текот на изминатите неколку години и сакаат да ја вратат со себе во канцеларијата. 

Тикток е преплавен со видеа привлечни за „деловните девојки“ што се во потрага по висококвалитетна облека што значи бизнис, но се носи како пижама. Снимката што ја постави @theshoppingbestie додека таа пребарува низ понуда од еластични канцелариски панталони собра четири милиони прегледи. 

Depositphotos

Алиша Галвин собра над 1,8 милион прегледи на видеото со медицинската сестра што стилизира панталони „салутејшн сташ флер“ на „Атлета“ (Athleta), кои чинат 119 долари, со блејзер. Коментарите беа растргнати за тоа дали панталоните се за ви канцеларија или за во студио за јога: „’Атлета’ сега прави деловна облека?“, пишува во еден коментар. 

Слична промена се случи и во „Лулулемон“ (Lululemon): мазните панталони со висок струк од 148 долари или новиот блејзер за мажи од 198 долари имаат потенцијал како основа за на работното место. 

Но како трговците како „Лулулемон“ и „Атлета“, кои низ историјата се пласираа како брендови за спортска облека, толку успешно ја заматија границата помеѓу спортската и канцелариската облека? 

Тајната е во сосот - или, во овој случај, во материјалот. На пример, панталоните „салутејшн сташ флер“ на „Атлета“ се направени со ткаенина пауервита, заштитен материјал, кој е прозрачен и брзо се суши. Купувачите „не мора да ја жртвуваат удобноста кога одат во канцеларија“, наведе портпаролот на „Атлета“ во имејл. 

Наместо да тргнат во директен напад на закопчаниот изглед на канцелариската облека, брендовите за спортска облека скришум преминуваат во професионалната облека. Крутите блузи се преработуваат во најлонски, а чевлите се излеваат во вештачка кожа на база на габи. Но, зголемената удобност не е единственото нешто што можат да го понудат овие ткаенини - тие исто така можат да бидат отпорни на временски услови, отпорни на туткање, лесни, па дури и одржливи. 

Исполиран комфор 

„Можете да добиете многу високополиран, многу софистициран изглед, но сега е воведен елементот на комфор, кој не постоел никогаш порано“, рече Џесика Кадмус, стилистка за гардероба во „Вардероб висперер“ (Wardrobe Whisperer) и основачка на „Роуг пак аксесорис“ (Rogue Paq Accessories). 

Техничките ткаенини исто така можат да бидат средство за враќање на контролата врз канцелариското опкружување, бидејќи одлуката за работа на далечина сè повеќе е надвор од рацете на вработените, рече Кадмус. Материјалот што ја коригира температурата, како што е блузата со прозрачна вискоза на „Јуникло“ (Uniqlo) од 39,90 долари, или деловните блузи од полиестер од 119 долари на „Патагонија“ (Patagonia), функционира наместо приспособувањето на термостатот во дневната соба. 

Depositphotos

„Ќе почнеме да гледаме сè повеќе ткаенини што го одржуваат телото ладно“, рече Софија Мартинели, виш стратег во WGSN за предвидување на трендовите. „Тоа дефинитивно е еден од фронтовите на иновациите во моментов“. 

Покрај комфорот и контролата, некои потрошувачи сакаат ткаенини што соодветствуваат на нивните вредности дури и кога седат зад работното биро. Затоа Карен Ли, коосновачка на „Лезе д лејбл“ (Lezé the Label), еколошки бренд за работна облека, користи ткаенини направени од два нетрадиционални материјали: рибарски мрежи и пченка. Предизвикот беше во тоа што „колку што е помека ткаенината, толку повеќе изгледа како пижама“, рече Ли, што го отежнува наоѓањето мешавина што е истовремено мека на допир, но и структурирана. 

Разновидноста, според Ли, исто така не е предмет на преговарање за денешниот потрошувач. „Постои готово очекување или стандард дека облеката треба да биде повеќенаменска и да служи за различни пригоди ако луѓето сакаат да инвестираат“, рече таа. Хаштагот #capsulewardrobe, кој се однесува на колекција на облека ограничена само на заменливи основни работи што се дополнуваат меѓусебно, има околу 1,4 милијарда прегледи на Тикток. 

Ткаенини на иднината 

Компаниите исто така се вртат кон ткаенини што се еколошки прифатливи или нудат технолошки придобивки. 

Големите модни брендови како „Стела Макартни“ (Stella McCartney) и „Адидас“ (Adidas) користеа алтернативна ткаенина наречена мајло (mylo), која е направена од мицелиум, мрежа на габични нишки што изгледаат и на допир се како животинска кожа. А овие панталони со широки ногавици од 178 долари од Ајлин Фишер изгледаат како чист памук, но всушност се направени од коноп, за чие одгледување е потребно наполу помалку вода, што го прави поодржлива опција. 

Џесика Рамирез, виша истражувачка аналитичарка во фирмата за истражување малопродажба и брендови за инвестиции „Џејн Хали енд асосиетс“ (Jane Hali and Associates), предвидува дека паметните ткаенини, материјалите со дигитални способности, се следната граница што дизајнерите ќе ја протуркаат на работното место. 

Засега таа смета дека движењето за слободно работно време сè уште заостанува во една категорија: фустаните. 

„Ако направите фустан од ткаенина за спортска облека, тој сепак ќе изгледа како спортска облека“, рече таа.