УЕФА има нов глобален партнер за Лигата на шампионите

УЕФА, европското фудбалско раководно тело, потпиша значаен договор со „Релевент спортс груп“, медиумска компанија со седиште во Њујорк, за глобалните права, промоцијата и маркетингот на Лигата на шампионите на УЕФА за периодот од 2027 до 2033 година. Вредноста на новиот договор не е официјално објавена, но се проценува дека вкупната комерцијална вредност на натпреварувањето во новиот циклус (2027 – 2033) би можела да надмине пет милијарди евра по сезона, вклучувајќи ги медиумските и спонзорските права.

Оваа одлука претставува стратешки чекор напред во комерцијализацијата на најгледаното клупско натпреварување во светот, бидејќи „Релевент“ досега ги имаше правата исклучиво за американскиот пазар.

Договорот со „Релевент спортс груп“ го означува и крајот на соработката со „Свис тим маркетинг“, кој долги години беше ексклузивен партнер на УЕФА за медиумски и спонзорски права. „Тим маркетинг“ соработуваше со УЕФА од раните 1990-ти, помагајќи да се трансформира Лигата на шампионите во еден од највредните спортски брендови во светот.

„Релевент“, кој е поддржан од Стивен Рос, милијардер и сопственик на НФЛ тимот Мајами Долфинс, веќе е познат по организирањето на Интернационалниот куп на шампиони, претсезонски турнир на кој настапуваат врвни европски клубови. Компанијата е силно фокусирана на развој на европскиот фудбал во САД и Латинска Америка, а овој договор им дава клучна улога во глобалниот раст на брендот УЕФА.

Со оваа соработка, УЕФА има за цел да ја прошири својата база на навивачи на нови пазари надвор од Европа, а се очекува „Релевент“ да го примени т.н. „олимписки“ модел на промоција, кој вклучува раскажување приказни, акцент на профилите на ѕвездите и маркетинг пристап со високи перформанси.