Милано-Кортина 2026: Колку ќе ве чини посетата на Зимските олимписки игри?

За помалку од еден месец во северна Италија ќе започнат 25-тите по ред Зимски олимписки игри. Спортскиот спектакл ќе започне на 6 февруари и ќе заврши на 22 февруари, а ќе го организираат заеднички Милано и Кортина д’Ампецо. Тоа ќе бидат досега географски најраспространетите зимски игри. Градовите Милано и Кортина д’Ампецо се оддалечени меѓусебно околу 400 километри. На зимските игри во 16 спортови ќе се натпреваруваат повеќе од 2.800 спортисти од приближно 90 држави. 

Но, во очи не паѓа толку логистиката и самата организација на олимписките игри, колку исклучително високите цени за гледање на натпреварите од спортскиот спектакл. Влезниците се продаваат исклучиво во дигитална форма преку официјалната веб-страница на организаторот со цел да се спречи измама и да се обезбеди контролирана достапност, како што беше случај и со неодамнешни слични настани, како Европското првенство 2024 и претстојното Светско првенство.

Цените на билетите се разликуваат пред сè според спортот, положбата на седиштата и фазата на натпреварувањето. Купувањето билети е можно само по претходна регистрација на корисникот. Во почетната фаза на продажбата, пристапот до најпосакуваните настани беше организиран преку жрепка, при што избраните корисници добија 48-часовен период за купување. Од пролетта 2025 година преостанатите билети се достапни во отворена продажба по принципот „прв дојде, прв услужен“.

За оние со подлабоки џебови постојат пакети за гостопримство, кои ги комбинираат билетите со дополнителни услуги, а ги продава исклучиво „On Location“, официјален партнер на Меѓународниот олимписки комитет за гостопримство. Цените започнуваат од 150 евра и можат да надминат 10 илјади евра за премиум пакети што вклучуваат финални натпревари или церемонии.

Билетите се продаваат за поединечни спортски настани, а не за целиот натпреварувачки ден. Повеќето арени нудат повеќе категории седишта (А – најблиску, Б – средно оддалечено, Ц и Д – обично повисоко или во аглите), а на некои настани се достапни и поевтини билети без одредено седиште.

Најниските цени за гледање на настани започнуваат од 30 евра. Организаторите на настанот соопштија дека повеќе од 20 проценти од билетите чинат помалку од 40 евра, а 57 проценти од билетите помалку од 100 евра.

Приближните ценовни опсези за омилените спортови се: за алпско скијање меѓу 100 и 220 евра, за биатлон меѓу 50 и 200 евра, за брзо лизгање на кратки патеки меѓу 150 и 450 евра, за фристајл и сноуборд меѓу 50 и 440 евра. Цените за билети за скијачки скокови се движат меѓу 95 и 230 евра.

Најскапите билети ќе ги платат љубителите на уметничкото лизгање, и тоа меѓу 280 и 1.200 евра. Хокејот на мраз, пак, има најширок ценовен опсег: билетите за претквалификациите се достапни од 30 евра, за полуфиналето и натпреварот за бронза меѓу 200 и 500 евра, а за машкото финале меѓу 450 и 1.400 евра.

Отворањето е закажано за 6 февруари на миланскиот стадион „Сан Сиро“, каде што играат фудбалските клубови Интер Милано и АЦ Милан, а цените на билетите за церемонијата се движат од 260 до 2.026 евра. Завршната церемонија, која ќе се одржи на 22 февруари во Верона, е нешто поскапа: најевтините билети чинат 950 евра, а најскапите достигнуваат 2.900 евра.

 

Што се однесува до билетите, на последните олимписки игри во Пекинг во 2022 година ситуацијата за навивачите беше сосема поинаква. Во Пекинг, поради строгите ковид-ограничувања, прво воопшто не беа предвидени меѓународни гледачи и продажбата беше ограничена само на жителите на континентална Кина, а непосредно пред игрите продажбата на билети за јавноста беше целосно стопирана и тие беа распределувани на поканети групи.

Во Пекинг 2022, поради ограничувањата, на натпреварите според организаторите имало вкупно само 97.000 гледачи. На Олимписките игри во Пјонгчан во 2018 година, пак, организаторите продале повеќе од еден милион билети за спортските настани и церемонии. Според податоците на организаторите на Пјонгчан, просечната цена на билет на игрите изнесувала 106 евра, додека организаторите на овогодишните олимписки игри не наведуваат просечни цени.

Вртоглави цени на сместувањето

До исклучителни поскапувања доаѓа и кај сместувањето. Италијанските медиуми известуваат дека на платформите како „Букинг“ (Booking) и „Ер-би-ен-би“ (Airbnb) се појавуваат огласи за поединечни сместувања кои достигнуваат и до 10 илјади евра за една ноќ. Највисоките цени ги достигнуваат поединечни апартмани, додека хотелите се малку попретпазливи.

Depositphotos

И покрај очекувањата, побарувачката според локалните понудувачи засега не се совпаѓа со ценовните скокови, пренесуваат италијанските медиуми. Повеќе оператори известуваат дека и понатаму имаат доста празни капацитети, дури и во неделите кога олимписките натпревари ќе бидат на врвот.

Според „Кориере дела сера“ (Corriere della Sera), цените најмногу ги надувуваат приватни сопственици без стратегија, додека хотелите најчесто работат во рамките на договори склучени со Фоднацијата Милано-Кортино за сместување на оперативниот персонал, медиумите и другите засегнати страни.

Просечните цени на сместувањето во Милано се удвоиле, а просекот за двокреветна соба надминува 420 евра по ноќ. Распонот е голем – од околу 140 евра неколку километри од центарот до речиси 4.000 евра за соба во близина на миланската катедрала за време на церемонијата на отворање. Доломитите, каде што ќе се одржуваат дел од натпреварите и кои се популарна туристичка дестинација во текот на целата година, пред два месеца бележеле пораст на резервации од 160 проценти.

Во Кортина д’Ампецо просечните неделни наеми за време на олимпијадата би требало да изнесуваат околу 9.200 евра за апартман до четири лица, што е повеќе од 300 проценти над цените во март 2026 по завршувањето на настанот. Во Бормио, пак, неделните наеми за време на игрите би требало да надминат 5.600 евра – што претставува речиси 409-процентен раст, пренесуваат италијанските медиуми.