Каква премија плаќа „Шпаркасе“ за преземањето на „Уни банка“?

Потенцијалното преземање на „Уни банка“ од страна на „Шпаркасе“, пред сè, треба да се гледа низ призмата на понатамошна консолидација на македонскиот банкарски сектор. „Шпаркасе“ веќе има околу 13 проценти од пазарниот удел, а со преземањето на „Уни банка“, дополнително ќе го зголеми уделот за околу 3,5 п.п., што „Уни банка“ го има во моментов, со можност за остварување синергии преку постојната деловна инфраструктура. Тоа е исто така дел од поширокиот тренд на консолидација на банкарскиот сектор што во моментов го сведочиме во Европа, а кога зборуваме за регионот, можеби најблискиот пример е преземањето на „Адико банка“ од страна на „Рајфајзен Банк Интернешнл“ оваа година или преземањето на „Стопанска банка Битола“ од страна на српската „Алта банка“.

Цената на трансакцијата од околу 69 милиони евра подразбира вреднување од приближно 1 пат поголемо од книговодствената вредност и околу 10,7 пати поголемо од минатогодишната добивка. Ова укажува дека, во споредба со слични банки на македонскиот пазар, но и во поширокиот регион, „Шпаркасе“ не плаќа особено висока премија за „Уни банка“, иако вреднувањето е за околу 17,5 проценти повисоко од она по кое банката се тргуваше на берзата. Ако ги погледнеме сличните трансакции, повторно можеме да се повикаме на примерите споменати претходно.

 

Така, „Адико“ ја купи „Рајфајзен банка“ со вреднување од околу 13 пати цена/заработка (P/E), односно плаќајќи повеќе за остварената добивка, но помалку во споредба со книговодствената вредност, со коефициент цена/книговодствена вредност (P/B) од околу 0,6 пати. „Алта“ ја плати „Стопанска банка Битола“ истотака поевтино според мултипликаторите: 0,7 пати за книговодствената вредност и околу 9 пати добивка.