Од Кромберг и Шуберт до Римац: Автомобилската индустрија ќе тоне уште

Следува тежок период за автомобилската индустрија во целина, се наведува во најновиот извештај на аналитичкиот тим на „Блумберг Адрија“ за овој сектор. „Стравот од рецесија, високите каматни стапки, ниската доверба на потрошувачите, надуените трошоци за гориво и влезните трошоци ќе останат главни предизвици за индустријата барем до 2024 година“, пишуваат аналитичарите во извештајот, кој во целост можете да го најдете на крајот на овој текст.

„Анализата на нашиот тим се однесува на 16 производители на автомобили и автомобилски делови во регионот Адрија. Бројките покажуваат пад и на продажбата и на приходите во претходната 2021 година. Според извештаите на компаниите, лани тие оствариле вкупна продажба од 2,569 милиони евра, што е за 5,6 отсто помалку во однос на 2020 година. Во споредба, пак, со претпандемиската 2019 година, продажбата се намалила дури за 25,6 отсто.

Просечниот пад на приходите кај производителите на автомобили во овој регион изнесува 11,6 отсто и се должи на намаленото производство.

„Притисокот врз маржите во периодот 2019-2021 година беше очигледен главно поради зголемувањето на влезните трошоци, што резултира со пад на маржите на годишна основа кај двата главни автомобилски играчи во регионот: ФЦА (фабрика за автомобили од Крагуевац, Србија) и ’Ревоз’ (словенечки производител на автомобили)“, велат од нашиот аналитички тим.

Производителите на автомобилски делови поминаа подобро

Од друга страна, раст е забележан кај производителите на автомобилски компоненти. Податоците покажуваат просечен пораст од 3,5 отсто во 2021 година.

„Производителите на специјализирани производи со повисока додадена вредност поминаа подобро во 2021 година, особено во однос на растот на продажбата, додека производителите на недиференцирани производи со помала додадена вредност, како што се црева или алуминиумски делови, забележаа пад на продажбата и на профитабилноста“, додаваат аналитичарите.

Во споредба со конкуренцијата на Запад, производителите на автомобили во регионот Адрија имаат послаби резултати во однос на EBIT-маржата и ROE (поврат на капитал). Додека, пак, производителите на автомобилски компоненти ги надминаа светските конкуренти во однос на повратот на капитал.

„Тоа најверојатно може да им се припише на пониските нивоа на капиталот што го поседуваат локалните играчи во споредба со нивните конкуренти“, велат аналитичарите.

Набљудувајќи ги трендовите во светот, компаниите од автомобилската индустрија се соочија со голем број пречки во периодот 2019-2021 година. Најновите бројки од октомври оваа година за Европската Унија покажуваат најниска вредност на продажбата на нови автомобили во последните две децении.

Синџирите на снабдување закрепнуваат

Ова се случува кога глобалните синџири на снабдување постепено закрепнуваат од недостигот што се јави за време на пандемијата, а побарувачката постепено зајакнува како дел од постпандемиското закрепнување на економската активност. Образложението е дека факторите на понудата не се целосно заздравени, а испораките до фабриките сè уште се бавни. Растечки тренд има и побарувачката за хибридни модели, а за нив испораката трае уште подолго.

Кога станува збор за спојувања и преземања, во периодот 2017-2022 година производителите на автомобилски делови во регионот Адрија не беа атрактивни. Главната причина лежи во фактот што тие главно беа посветени на производство на компоненти со мала додадена вредност. Исто така, инвестициите во регионот се претежно гринфилд, што значи дека големите меѓународни групации градат погони од темел и ја увезуваат својата опрема.

Што се однесува до инвестициската активност, неизвесноста на пазарот доведе до намалување на капиталните инвестиции во последните три години. Во 2020 година тоа беше најочигледно. Во целиот регион е забележано намалување на Capex (капитални вложувања) во споредба со западните конкуренти, главно поради падот на инвестициите во ФЦА -Србија и „Ревоз“. Сепак, производителите на автоделови успеваат да држат чекор со своите глобални конкурентни, па дури и да ги надминат.

„Главниот предизвик за производителите на автомобилски компоненти во иднина ќе биде да го задржат нивото на инвестиции, не само поради слабеењето на основите за поддршка на продажбата туку и поради зголемувањето на цената на капиталот благодарение на глобалното затегнување на монетарните политики“, истакнуваат аналитичарите.

Според нив, проблемите поврзани со синџирот на снабдување со полупроводници се намалија во 2022 година, што доведе до поголем обем на производство и исполнување на нарачките. Иако приходите на клучните играчи се зголемија во третиот квартал годинава, одржувањето на цените ќе биде клучно за одржување на нивоата на продажната вредност во услови на слаба побарувачка.

Според нашиот аналитички тим, очигледното поместување кон електричните возила ќе ја оттргне побарувачката од компонентите што се специфични за возилата со мотори со внатрешно согорување. Ова е поткрепено со податоците за продажбата на електрични возила во Европа. Во 2021 година е забележана продажба на повеќе од 1,2 милион возила, што е раст од 63 отсто во однос на 2020 година.