Две илјади дваесет и третата година сумирана во една реченица за Александра Пријовиќ - млада пејачка што на својата балканска турнеја ги исполни белградската „Арена“, загрепската „Арена“, сараевска „Зетра“, нишки „Чаир“, тузлански „Мејдан“, а веќе има закажано во рекордно време три концерти по ред во Осиек за 2024 година. Музичкиот вкус може да кажува едно, но бројките зборуваат сами за себе. А тие велат дека Александра Пријовиќ е првата жена изведувач што наполнила три белградски „Арени“, од што, според некои процени, заработила милион евра. А што да се каже, пак, за петте полни загрепски „Арени“, по што медиумите ја прогласија за регионален феномен, додека најчитаниот хрватски портал „Индекс.хр“ (Index.hr) ја смета за единствена фолк-дива од новата генерација.
Словенечката Н1 ја нарече балканската Тејлор Свифт, споредувајќи ја нејзината турнеја од Исток до Запад со онаа на американската поп-милијардерка. Иако според музиката се вбројува во фолк-милјето, по сѐ друго Александра Пријовиќ изгледа како да не припаѓа таму. Таа не ги полни написите во весниците со скандали, нејзините концерти, според познавачите, се организирани максимално професионално, со целосно естетско искуство, на кое таа лично инсистира. Во сето тоа ја поддржува и заедно со неа го води бизнисот нејзиниот сопруг Филип Живојиновиќ, син на поранешниот успешен југословенски тенисер Слободан Живојиновиќ, сега бизнисмен, кој со сопругата Лепа Брена практично управува со деловната империја. Десетте милиони евра, колку што, според некои процени, заработила Александра Пријовиќ во 2023 година, покажуваат дека добриот глас со добро менаџирана кариера е рецепт за успех на Балканот. Којзнае, можеби и пошироко.
.webp){kind=icon}
