Што прават менаџерите кога мозокот им е „исклучен“?

Добре дојдовте во Менаџери лично, новата рубрика на „Блумберг бизнисвик Адрија“ (Bloomberg Businessweek Adria), во која ќе ги откриеме секојдневните навики на менаџерите од регионот, но и од земјите низ светот. Што грицкаат, каде и како вежбаат, кој им е омилен пијалак или какво месо имаат секогаш на мени. Во овој број ќе читате за интересните задоволства и понекогаш необични активности што ги практикуваат кога не работат. Одговорите се навистина... 

Филомена Пљаковска Аспровска, главна извршна директорка на „КаСис АД“ Приватна архива

Филомена Пљаковска Аспровска е главна извршна директорка на „КаСис АД“, единствениот процесор во Македонија за трансакции со картички „виза“ (Visa), „мастеркард“ (Mastercard) и „дајнерс“ (Diners) и сертифицирано биро за персонализација на платежни картички. Таа во слободно време ужива во содржини за иновации во платежната индустрија и новите технологии и чита книги за приготвување храна. „Јас сум колекционерка на готвачи и ги читам како романи, во еден здив, веднаш штом ќе ги купам. Овој тип на содржини ме релаксира и ја поттикнува мојата креативност генерално, а особено ми дава идеи за рецепти, кои потоа ги објавувам на мојот блог за храна на Инстаграм“, вели таа.

Бојан Козомара, сопственик и главен извршен директор на „Д-р Козомара“ Приватна архива

А кој сака борење? И тоа кинеско? Бојан Козомара е сопственик и главен извршен директор на „Д-р Козомара“ од Бања Лука, БиХ. Кога сака да се опушти практикува винг-чун (wing-chun). „Освен тоа, најмногу ме опушта читањето книги. Последна што ја прочитав беше ‘Поглед на еден човек на светот’ од Ли Куан Ју, која е одлична и ја препорачувам. Од спортски активности сакам да тренирам во вежбалница и да пливам. А кога можам да стигнам, гледам и стручни канали на Јутјуб што се насочени на очната хирургија и сè што работам“, вели тој.

Ведран Пушиќ, сопственик и извршен директор на „Инфо медиа груп“ Приватна архива

Ведран Пушиќ е сопственик и извршен директор на „Инфо медиа груп“ (Info Media Group), која работи во 45 града во регионот Адрија и во Обединетите Арапски Емирати. Освен децата и семејството, издувен вентил и начин на полнење батерии му се трчањето, фудбалот, филмовите и книгите. „Веќе седум-осум години имам диктафон, па додека трчам ги снимам моите мисли и најдобрите бизнис-идеи ми паѓаат на ум додека трчам. Освен тоа, најдов тим во БиХ и во ОАЕ и во слободно време, како поранешен фудбалер, играм фудбал рекреативно. Тоа ми помага да ги одвлечам мислите бидејќи во текот на играта морам да се фокусирам исклучиво на топката и на противниците“.

Елена Младеновска-Јеленковиќ, извршна директорка на „М6 едукативен центар“/Приватна архива

Кога се одмора, Елена Младеновска-Јеленковиќ, извршна директорка на „М6 едукативен центар“, гледа документарни емисии поврзани со природата, најчесто на „Нешнл џиографик“ (National geographic) или „Нејчр“ (Nature), но ужива и во квизови. „Читам текстови поврзани со моето хоби - градинарство и обработка на дрво, со цел да научам повеќе и да уживам во подобар резултат. А најмногу се релаксирам кога играм бељот со пријателите“.

Ведран Јариќ, сопственик и извршен директор на „Планет софт груп“ Приватна архива

Ведран Јариќ е сопственик и извршен директор на „Планет софт груп“ (Planet Soft Group), која работи во Србија, БиХ и во Австрија. Најмногу се опушта со своите две мали деца. „Тогаш тотално се исклучувам од работата“, вели тој. „Освен тоа, тука се и тенисот и пешачењето. Тенисот ми служи како одмор и релаксација и често играм, а кога имам можност читам и некоја интересна книга. Практикувам и прошетки во природа надвор од градот“.

Како основачка на „Ритуал“ (Ritual), компанија од Јужна Калифорнија специјализирана за врвни женски додатоци во исхраната и пренатални витамини, и мајка на три деца, Катерина Шнајдер е експертка за оптимизација на своето лично време. „Кога ги мијам забите или ја правам рутината за нега на кожата, сакам да гледам емисии за недвижности, како ‘Selling Sunset’ или ‘Buying Beverly Hills’“, вели таа. „Тие се одлично бегство од реалноста, а јас ги почитувам дизајнот и архитектурата. Драмата ме привлекува и ме тера подолго да ги мијам забите“.

Пред Мајкл Долан да стане коосновач на „Михента текила“ (Mijenta Tequila), одржлив бренд на алкохолни пијалаци со сертификат B-Corp, кој користи отпад од агава за своите етикети и рециклирано стакло за шишињата, тој беше главен извршен директор на „Бакарди“ (Bacardi Inc). „Во текот на изминатите неколку години длабоко нурнав во старогрчката историја и книжевност - Херодот, Тукидид и во моментов повторно ја читам ‘Одисеја’ на Хомер“.

Пред повеќе од десетина години Лиза Кертис го лансира „Кули кули фудс“ (Kuli Kuli Foods), брендот што е пионер за климатски прифатлива суперхрана, како што е морингата богата со протеини, која ја набавува од мали фармери од Западна Африка. „Сакам да читам книги со фантазија. Некои од моите неодамнешни фаворити се сериите ‘A Deadly Education’, ‘Fourth Wing’ и ‘Mistborn’“, вели Кертис.

Во пишувањето на текстот учествуваше и Кејт Кредер/„Блумберг бизнисвик“ (Kate Krader/Bloomberg Businessweek).