По долгата напорна недела следува очекуваниот викенд, период кога секој на различен начин се обидува да го исполни своето слободно време, да ужива, можеби да спортува, да се дружи со семејството или со пријателите, да патува или на каков било начин да ги наполни батериите и да собере енергија за нов циклус долги напорни работни денови. Во овој број на нашата рубрика „Менаџери лично“ читаме за викендите на девет менаџери во светот.
За Дамјан Манчевски, директор за стратегиски сметки и генерален менаџер на Балканот на „Мак систем“ (Mak-system), компанија што е водечки светски провајдер на медицински софтвер за менаџмент на крв, плазма, ткива и клетки, викендите задолжително се резервирани за семејството.
Дамјан Манчевски, директор за стратегиски сметки и генерален менаџер на Балканот на „Мак систем“ (Mak-system)
Приватна архива
Прочитај повеќе
Униформата на шефовите - како се облекуваат нашите менаџери?
Минатиот месец ја отворивме оваа наша рубрика со тоа од каде менаџерите ја црпат енергијата, а сега продолжуваме со нивниот избор на облека и модни адути.
10.01.2025
Што прават менаџерите кога мозокот им е „исклучен“?
Осум менаџери ги откриваат својата поп-култура и задоволствата кога не се на работа.
29.11.2024
„Сите имаме доста обврски во текот на неделата и сакаме да уживаме заедно за време на викенд. Често одиме и во нашата викендичка на село, каде што има чист воздух, но и работа низ градината. Јас особено за викенд сакам да готвам за ручек и не давам никој да ми се меша во кујната :)“, вели Манчевски. Тој е голем филмофил, па секогаш наоѓа време за добар филм или серија. Во последно време повторно интензивно чита книги, а навечер најчесто излегува во друштво со сопругата и пријателите.
„Без разлика дали е викенд или не, тука е и неизбежното трчање или вежбање во раните утрински часови, без кое не можам. Така што кога ќе се собере сѐ, иако е викенд, јас не сум навикнат да не правам ништо и секогаш наоѓам активности во кои уживам“, вели Манчевски.
Петар Андреевски е главен извршен директор на друштвото за управување со отворени и затворени инвестициски фондови, „ВФП фонд менаџмент“ АД Скопје, кое е дел од групацијата ВФП (WVP Group) од Австрија, присутна во неколку држави во Европа. Тој е дел од надзорните одбори на неколку компании ќерки на фирмата во регионот, па работните денови за него се долги. Затоа, целиот викенд им го посветува на фамилијата и обврските дома, како и на спортски активности. Напролет и налето во викендите задолжително игра тенис, а во зима е посветен на скијањето.
Петар Андреевски, главен извршен директор на друштвото за управување со отворени и затворени инвестициски фондови, „ВФП фонд менаџмент“ АД Скопје, дел од групацијата ВФП (WVP Group)
Приватна архива
„Се обидувам колку што може да отидам на викенд или неколку дена со пријателите или семејството на скијање. Мојот син професионално игра фудбал и задолжително гледаме натпревари, а ќерката рекреативно игра тенис, па обврските се околу тоа и, секако, фамилијарен ручек. Напролет и налето задолжително играм по час-два тенис и во сабота и во недела. Фокусиран сум на тоа бидејќи во текот на неделата често сум на службени патувања и домашните не ме гледаат, па викендите им ги посветувам ним и на сите заеднички активности“, вели Андреевски.
Питер Курк е извршен директор на платформата за тргување и инвестиции со криптовалути „Икономи“ (Iconomi) и до неговата 35-та година интензивно се занимавал со спорт, а сега слободното време го поминува со семејството и практикува неколку хобија.
„Во топлите месеци сакам да возам мотор, а во зима скијам. Главно одморам за време на викендите. Можеби ова отстапува од идејата дека ‘менаџерите секогаш треба да се активни’, но навистина го користам слободното време за квалитетен сон и добро да се одморам“, вели Курк.
Ранко Шмигоц, директор на словенечки „Марпром“ (Marprom), „Шпорт Марибор“(Šport Maribor) и „Местне непремичнине“ (Mestne nepremičnine), претпочита слободното време да го поминува со семејството и пријателите бидејќи тоа му овозможува да се опушти и да собере нова енергија за многубројните деловни предизвици.
„Во компаниите што ги водам, покрај нашите основни активности, спроведуваме и многу амбициозни развојни проекти, така што имам релативно малку слободно време. Кога го имам, се трудам да го користам што е можно повеќе. Кога не сум на работа сакам да поминам околу еден час на Похорје или во некој од спортските објекти со кои управуваат нашите компании. Исто така, уживам во посета на странски град или некој настан, каде што секогаш може да наидете на нови инспиративни идеи“, вели Шмигоц.
Sarah Cliff / Bloomberg Businessweek
Како извршен директор и коосновач на „Анфоргетбл травел“ (Unforgettable Travel Co.), Греам Картер троши многу време во смислување маршрути за луксузни тури во 50 меѓународни дестинации, од посета на островите во Хрватска до извонредна културна турнеја низ Виетнам. Меѓутоа, во саботите тој има рутина: „Играм пиклбол (pickleball)“, вели тој. Неговиот ентузијазам за удирање топки преку мрежа датира одамна: „Пораснав во Јужна Африка со тениски рекет во раката“. Тој дури и се натпреваруваше во неговите школски години и тренираше на Меѓународната тениска академија во Делреј Бич, Флорида (сега се нарекува Проворлд тенис академи). Тој е сè уште конкурентен: „Бидејќи сум во средината на 40-тите и речиси 20 години помлад од другите играчи, се враќам дома со чувство на непобедлив, како Роџер Федерер“, вели Картер.
Sarah Cliff / Bloomberg Businessweek
Во нејзината улога како извршна директорка и коосновачка на софтверската платформа „Констелејшн“ (Constellation), Дијана Ли и нејзиниот тим им помагаат на бизнисите да ја зголемат својата маркетиншка и рекламна содржина; во 2020 година „Констелејшн“ од страна на „Инк. 500“ (Inc. 500) беше вброена меѓу топ 10 најбрзорастечки приватни компании во сопственост на жени. Викенд-рутината на Ли во нејзиниот роден град Њујорк е едноставна: „Прво, наутро со мојот сопруг практикуваме пилатес. Потоа одам во ’Блустоун лејн’ (Bluestone Lane) на органски појадок и на крајот одам во ’Ејч март’ (H Mart) - култниот омилен азиски синџир на супермаркети - за да купам намирници за моето семејство и моите вработени“, вели Ли.
„Би сакала да кажам дека мојата омилена активност за викенд е одењето на фудбалските натпревари на моите два сина“, вели Дина Розенблум, извршна директорка на „Хеарстори“ (Hairstory). „Но мислам дека тоа не е мојот идеален викенд“. Во работните денови таа раководи со десетгодишниот бренд за нега на коса, чии производи добија национално признание и широка база на обожаватели поради промената на начинот на кој луѓето ја мијат косата.
Sarah Cliff / Bloomberg Businessweek
„Надвор од работното време мојата омилена активност е планинарење во шума, санкање или скијање во северниот дел на Њујорк во текот на есента, зимата и пролетта, а налето денот го поминувам на плажа на островот Фајр“, вели таа.
Sarah Cliff / Bloomberg Businessweek
Мајкл Ахенбаум, кој ја предводи хотелската групација „Генсвурт“ (Gansevoort) од Њујорк, добива удари од дружењето со своето дете за време на викендите, буквално. Неговата омилена активност е да го гледа синот како учи карате. „Шестгодишниците што се занимаваат со карате носат најсмешни, а сепак најгорди моменти за еден родител“.
Sarah Cliff / Bloomberg Businessweek
Има само едно нешто што Ендрју Барнард сака да го прави за време на викендите: „Сурфање со змејови - веројатно најдобриот индивидуален спорт на планетата“. Извршниот директор на „Сансвепт ризортс“ (Sunswept Resorts), компанија за управување со хотели со комплетна услуга, во чии рамки е „Бадихолидеј“ (BodyHoliday), првото велнес-одморалиште на Карибите. „Физички тоа е многу напорен спорт, кој овозможува да ве води адреналинот, но на крајот целокупниот ментален фокус што го бара спортот го прави една од најрелаксирачките занимации што можам да ги замислам. Нема телефони и нема паузи или прекини - само целосна концентрација што предизвикува огромно чувство на релаксација. Тоа е како медитација“, вели Бернард.
Во пишување на текстот беше вклучена и Кејт Кредер.
.webp){kind=icon}
