Добре дојдовте во Менаџери лично, рубриката што минатиот месец ја воведовме во „Блумберг бизнисвик Адрија“. Целта е да ги откриеме различните навики на менаџерите во нивното слободно време, но и кога се ангажирани, а кои директно или индиректно придонесуваат за нивната успешност и изглед за пример. Ја отворивме рубриката со тоа од каде ја црпат енергијата, а продолжуваме со нивниот избор на облека и модни адути.
За Аида Терзиќ, сопственичка на агенцијата „Рилекс турс“ (Relax Tours) и директорка на хотелот „Пино нејчр“ (Pino Nature), важно е да се биде пример за колегите и затоа најчесто практикува деловен кодекс на облекување (англ. dress code - збир на правила што го одредуваат начинот на облекување во одредена пригода, на пример канцеларија, клуб, настан итн.), кој вклучува сако, деловни здолништа, панталони по кројка, кошули и марами. Сепак, најудобно се чувствува во лежерна комбинација од фармерки, памучни маици и фустани со линии.
Заедно со нејзината сестра Мајда го лансираа брендот „Стајлингер“ (Stylinger), чиј фокус е на истакнување на женската убавина преку облека направена од природни материјали, како кашмир, волна, свила, памук и лен, при што секое парче облека зрачи со уникатност. Нивниот пристап се темели на ограничени колекции, кои дополнително ја нагласуваат ексклузивноста на брендот.
Тихомир Петрески, претседател и член на Управниот одбор на „Триглав пензиско друштво“
Фото: „Блумберг Адрија“
Изборот на модни парчиња за Тихомир Петрески, претседател на УО во „Триглав пензиско друштво“ АД Скопје, зависи од обврските и неговата дневна агенда. „Во денови кога календарот е исполнет со деловни средби, во изборот преовладува паметен деловен стил (business smart). Во спротивно, преферирам варијанта на деловен лежерен стил (business casual), која е помалку формална и која ми го олеснува подолгиот престој во канцеларија“, вели Петрески, додавајќи дека во слободно време секогаш се облекува лежерно (casual) и тогаш барем едно парче облека му е од спортски карактер.
„Мојот стил на облекување е едноставен. Претпочитам наутро да се облечам за што е можно покусо време и не сакам да размислувам премногу за мојата облека“, вели Грегор Ребољ, ИТ-експерт, претприемач, бизнис-ангел и коосновач на фондот „Силикон гарденс“ (Silicon Gardens). Кога ќе најде кошула што му се допаѓа (едноставна, памучна и без видливо лого), купува по 10, обично во темносина и црна боја. „Дури дозволив мојата сопруга да ме убеди да одам и на светлосина боја“, вели Ребољ.
Тој најчесто маиците ги носи со темносини волнени панталони и класичен волнен џемпер во иста боја. „На тој начин за 10 минути сум готов дури и со куферот за службени патувања“, изјави Ребољ.
„Преферирам да се облекувам лежерно, бидејќи верувам дека облеката е таа што ме изразува како личност, а не функцијата. Никогаш не сум бил љубител на брендови. За мене модата е повеќе од само лого“, вели Марко Подгорник Вердев, директор на мариборската компанија „Микро+Поло“ (Micro+Polo), кој инаку во словенечкиот деловен свет се истакнува со својата искреност, директност и храброст.
Тој носи црно само за сериозни настани бидејќи ја доживува повеќе како униформа отколку како боја. Во секојдневниот живот ужива да комбинира бои што ги одразуваат енергијата и разновидноста што го инспирираат. Во лето често носи шорцеви и апостолки, дури и на работа, бидејќи за него е клучна релаксацијата. За посебни пригоди бара уникатно парче облека од словенечкиот дизајнер Давид Хојник.
Илустрацијата е на Сајмон Бејли за „Блумберг бизнисвик“ (Illustrations by Simon Bailly for Bloomberg Businessweek)
Како надзорничка во „Содексо лајв“ (Sodexo Live!), компанија што се грижи за големи настани како Олимпијадата во Париз и ГН на Формула 1 во Мајами, Белинда Оукли има облека за секакви пригоди.
„Пакувањето би било многу полесно со ролки и фармерки како униформа, но колку би било досадно тоа? Сакам бои и женственост во мојата гардероба. Сакам безвременски и винтиџ-инспирирани парчиња и нагласен струк“, вели таа.
Арон Луо, чија компанија „Кара“ (Caraa) нуди модерни торби што им одговараат на сите, од планинари до деловни патници и нови родители, е голем обожавател на блејзери. „Добро погоден блејзер е најсестраното парче модна облека што секој маж може да го има. Не е важно дали го носиш со џемпер, ролка, маица, кошула или без кошула. Со оглед на тоа што секој ден од мојата недела е толку различен, носам блејзер што врши работа за секоја пригода“, вели тој.
Илустрацијата е на Сајмон Бејли за „Блумберг бизнисвик“ (Illustrations by Simon Bailly for Bloomberg Businessweek)
Пред да ја лансира својата лежерна линија на облека „Такернак“ (Tuckernuck), Џослин Гејлиот работеше во инвестициска банка во Њујорк и со недвижности во Хонгконг, па е добро упатена во облека што одговара во многу пригоди. „Наесен тоа е добар блејзер, плетена блуза со линии, трендовски фармерки, кул рамни чевли или мокасини и шик парче горна облека. Избирам парчиња што се лесни и класични, но секогаш се трудам да додадам некој неочекуван елемент“, вели таа.
Претприемачот Рајан Денеи ја лансира „Електрик еј-ај“ (Electric AI) во 2016 година, компанија што нуди ИТ-управување за мали и средни бизниси во САД. Неговата стандардна униформа е еднобојна. „Се обидувам да ја задржам едноставноста: црна маица, црни панталони, црни патики и црн ‘ролекс' (Rolex)“, вели тој. Но, тоа не е неговиот единствен изглед. „Надвор од канцеларијата поминувам многу време возејќи велосипед или тркачки автомобил, па половина од мојот плакар е со комплети за велосипедизам ‘пас нормал' (Pas Normal) или тркачка облека ‘алпинстарс' (Alpinestars)“, додава Данеи.
Во пишувањето на текстот учествуваа Нејра Џаферагиќ (Босна и Херцеговина), Урбан Червек (Словенија) и Кејт Кредер (Блумберг).
.webp){kind=icon}
