Почнете го денот како шеф: Што слушаат директорите на пат кон работа?

Добре дојдовте во Менаџери лично, рубрика во месечникот „Блумберг бизнисвик Адрија“, каде што шефовите од целиот свет ни кажуваат како управуваат со своето време во и надвор од канцеларијата, кои се нивните навики и трикови.

Овој пат ги прашавме што слушаат кога патуваат до и од работа, но и на други дестинации. Одговорите не опфаќаат само широк спектар на плејлисти. Тука се поткастите и радиоемисиите, но не потценувајте ја и моќта на добрата аудиокнига.

Dohee Kwon - Bloomberg Pursuits / Bloomberg Businessweek

 

Соња Илиќ, менаџерка за продажба во хотелот „Џамп ин“ (JUMP INN), Белград, пешачи од дома до работа, период кога од слушалките до нејзините уши доаѓа музика за подобрување на расположението или некоја обука за ВИ.

„На пат кон работа слушам музика што ме подигнува и ме исполнува со енергија за денот што претстои. Во последно време сè почесто избирам обука за вештачка интелигенција бидејќи тоа е единствениот тивок момент кога можам да учам. Како мајка на тригодишно момче, тешко ми е да најдам време за личен развој во текот на денот, па овој ритуал станува мој мал простор за напредок“, вели Илиќ.

Dohee Kwon - Bloomberg Pursuits / Bloomberg Businessweek

 

Радиостаниците се друштвото до работа на Мохан Шреста, директор на синџирот на снабдување во „Полимарк“ (POLIMARK), Белград.

„Додека одам кон работа, во потрага сум по утринско расположение, па обично менувам радиостаници додека да наидам на побрз ритам“, вели Шреста. На враќање условите се малку поинакви, патувањето минува во телефонска комуникација според претходно направен список. „Продолжуваат деловните, но и неформалните теми со колегите и деловните партнери, а има и релаксирачки разговори со семејството и пријателите. Но, секако, станува збор за корисно потрошено време“.

За разлика од нив, од радиото на Ивана Симиќ, директорка на хотелот „Данубиа парк“ (DANUBIA PARK), Сребрено Езеро, не доаѓаат баш често музички ноти.

„Обожавав да ја слушам емисијата ‘Будење’ сè додека не ја укинаа на радио. Во последно време кога возам, обично не слушам ништо бидејќи или се концентрирам на возењето во градскиот метеж или сум на спикерфон за деловни и приватни разговори“, вели Симиќ. Сепак, кога патува надвор од градот избира некоја од локалните радиостаници врз основа на музиката. „Имам ‘диџеј’ на совозачкото седиште, па често се скока од една станица на друга во потрага по добра песна“.

„Слушам радио додека возам, бидејќи така се информирам, а наедно го чувствувам и пулсот на локалната средина“, вели Јања Божиќ Маролт, сопственичка и директорка на „Медиана“ (Mediana), најголема фирма за анализа на јавното мислење во Словенија, која работи и во Хрватска и во Србија. „Важно ми е да знам што се случува во локалната средина бидејќи така добро информирана одам на состаноци, особено во Хрватска и во Србија. Морам да кажам дека имам некои професионални деформитети во тој поглед бидејќи во ‘Медиана’ ја истражуваме публиката“, вели Маролт, која засега не слуша поткасти во автомобилот.

Dohee Kwon - Bloomberg Pursuits / Bloomberg Businessweek

 

Хуморот на радио е тоа што го зголемува расположението на Александар Симон Бастл, сопственик и директор на „Бас“ (Bass d.o.o), словенечка компанија што нуди сеопфатни софтверски решенија.

„На пат кон работа во автомобилот најчесто слушам ‘Радио 1’, главно поради опуштениот хумор и лесната музика“, вели Бастл.

Петер Грум, директор на „Фурс“ (Furs), словенечка даночна агенција, обично оди пеш на работа, па не слуша музика. „Но во автомобил слушам многу различни работи, најчесто 'Val202' или Спотифај. Обожавател сум на стар рок (Пинк флојд, Дајар стрејтс, Ролинг стоунс...), како и на словенечки (Креслин, Ми2, Дан Д, Табу...) и понови словенечки бендови ('MRFY', Батиста кадилак, Кокоси, Машарик...). Исто така, ми се допаѓа стариот југословенски рок, а претпочитам да го прескокнам турбофолкот“, вели Грум.

Dohee Kwon - Bloomberg Pursuits / Bloomberg Businessweek

 

Лука Главаш, коосновач на хрватскиот стартап „Фластер“ (Flaster), слуша музика и поткасти, но во различен период од денот.

„Најчесто слушам музика на пат кон работа бидејќи е прерано за поткасти - ги слушам почесто навечер или пред спиење. Наутро слушам нешто што ќе ме разбуди и веднаш ќе ми го подобри расположението, претежно странски рап од 2000-тите. Музиката влијае на моето расположение, таа е присутна во текот на целиот ден, па до крајот на денот многу жанрови се испреплетени“, вели Главаш. Тој редовно слуша и поткасти, меѓу кои „Бихајнд д намбрс“ (Behind the Numbers), поткастот „Он прпоуз“ (On Purpose) на Џеј Шети, поткастот „Личрли“ (Literally) на Роб Лоу, како и „Гериви аудиоекспириенс“ (Garyvee audio experience).

За Марк Ројс, претседател на „Џенерал моторс“ (General Motors Co.), времето за патување до работа наедно е и време за евалуација на производот: тој го вози секое возило што го произведува „Џенерал моторс“, почнувајќи од „шевролет тракс“ (Chevrolet Trax) од 20.500 долари до „кадилак селестик“ (Cadillac Celestiq) од 360.000 долари. „Ги возам сите пред да им ги испорачаме на клиентите“, вели тој, „и обрнувам големо внимание на нивните манири и карактеристики на патот, па што и да слушам завршува како бучава во заднината на овој процес“. Сепак, тој слуша или локални радиостаници или сателитски вести за да ги следи најновите деловни вести.

„Голем обожавател сум на поткасти и се обидувам максимално да го искористам времето за патување до работа и вежбање слушајќи микс што ме информира, а наедно и ме забавува“, вели извршниот директор на „Фрејзер јахтс“ (Fraser Yachts), Андерс Куртен. Неговата компанија има 20 канцеларии низ целиот свет и портфолио од чамци вредни повеќе од шест милијарди долари. „Мојата омилена поткаст-листа ги вклучува ‘Пивот' (Pivot) за увид во технолошкиот свет, ‘Проф џи маркетс' (Prof G Markets) за остри погледи на стратегијата и финансиите, како и ‘Пасореле' (Passerelles), што ми помага да го одржувам мојот француски“, вели Куртен, додавајќи дека го слуша и финскиот поткаст „ХС Визио“ (HS Visio) за, како што вели, да остане во тек со клучните случувања дома и низ нордиските земји.

-Текстот е напишан со помош од Наташа Давидов, Урбан Червек, Марта Премужак, Кејт Кредер, Хана Елиот и Џејмс Терми.

Во моментов нема коментари за веста. Биди прв да коментира...

Остави коментар