Опуштете се како шеф: Седум директори ги споделуваат своите омилени туристички дестинации

Добре дојдовте во „Менаџери лично“, рубриката на „Блумберг бизнисвик Адрија“, во која менаџерите низ светот одговараат како управуваат со своето слободно време. Овој пат седуммина од нив ни ги открија своите омилени туристички дестинации за краток одмор. Одговорите се навистина шаренолики и можеби некој од нив ќе ви биде инспирација за вашето следно патување.

Уживање во Хрватска, а активен одмор во Шпанија. Тоа е изборот на Милена Ѓориќ, маркетинг-директорка во „АИК банка“ во Србија. „По периоди кога работниот ден може да трае до 12 часа, важно ми е дестинациите за одмор да обезбедат баланс меѓу релаксација и истражување. Затоа веќе 15 години барем еднаш годишно одам во Ровињ, поради можноста да возам таму со моите омилени плејлисти и чувството дека сум дома, веднаш до морето“, вели Ѓориќ, посочувајќи дека уживањето го дополнува со тоа што знае каде да купи бакалар и најслатки домати за појадок, има омилено место за доцен ручек во комбинација со пливање, место за пршута и сирење во мал бар на пазарот, плажа со камења до која сака да вози велосипед, ја обожава тишината под боровите на островот Катарина и околните места каде што има одлични ресторани. „Секако, тука секогаш има многу луѓе што ги познавам, а и можност брзо да стигнам до Трст или Удине кога времето е лошо“, вели таа.

Depositphotos

 

„За поактивен одмор го избирам северниот дел од Шпанија, што е комбинација од нереални погледи на планините и морето, каде што можете да уживате во одлични ресторани со ’Мишелин’, долги прошетки, во храна на пазарите и генерално во автентичната убавина на градови како Сан Себастијан, Билбао (задолжително место за посета е Гугенхајм), Сантандер или Бијариц. Што се однесува до градот на кој секогаш му велам ‘да’ - тој е еден и единствен: кралскиот Мадрид“, вели Ѓориќ.

Маријан Папеж, генерален директор на државниот Завод за пензиско и инвалидско осигурување на Словенија, ужива во морето, и тоа сконцентриран на едно место.

„Голем дел од одморот поминувам на море, на островот Паг, колку што е можно повеќе да биде статички, без користење автомобил. Ако немаме некоја повреда, јас и сопругата речиси секое утро трчаме до 10 км, а потоа малку пливаме. Кога не е здраво да се биде на сонце, се оддалечуваме од плажата, бидејќи, за жал, нема сенка. Но, уживам да бидам на море кога сонцето заоѓа. Со оглед на тоа што имаме многу пријатели и познаници во близина, има и многу дружење со добра храна и пијалаци, а ако нема потреба да се пишуваат статии за време на одморот, тогаш е уште порелаксирано со читање книги“, вели Папеж.

Ивица Јакимовски, генерален директор на македонската градежна компанија „Голден арт“, ужива во планините и во активен одмор. Тој практикува да вози офроуд-тури со џип бидејќи, како што вели, тоа најмногу го релаксира. „Тука, во земјите од регионот, имам сѐ извозено“, вели Јакимовски, потенцирајќи дека тоа се однесува само кога „бега“ сам на одмор, додека со семејството практикува одмор со кампер-возила и практично постојано се во движење.

Ивица Јакимовски за време на турата со возење сопствени џипови од Македонија до Тунис во октомври 2024 година Приватна архива

 

„Има и еднодневни и, секако, повеќедневни тури, кои најчесто се комплетно во наша организација, со целосно креирање офроуд-мапи со цел сами да истражуваме“, вели Јакимовски. Меѓу поинтересните авантури е таа од октомври минатата година, кога возеле од Македонија до Тунис со сопствени џипови. „Таквите патувања нудат поинаков поглед на опкружувањето. Видикот е од сосема друга, дотогаш непозната страна и сѐ е различно. Самиот пристап е различен од опкружувањето, а тоа нуди огромно задоволство да се спознае една поинаква страна“, вели Јакимовски.

Ник Грин го предводи „Трив маркет“ (Thrive Market), онлајн платформата за намирници во САД базирана на членство, специјализирана за здрави и одржливи производи, која има повеќе од 1,6 милион члена и чија продажба лани надмина 700 милиони долари. „Шпанија има посебно место во моето срце - оттаму е мојата сопруга Каролина“, вели Грин за неговата омилена дестинација. „Секоја година целото наше семејство, сега шестмина, ги посетува нејзините родители во Кордоба, Андалузија. Животот таму се движи со побавно темпо, а ручекот е главниот настан - обично нешто приготвено од нашето пошироко семејство, како свежа риба со едноставни прилози од салата со домати и краставици“. Деновите имаат редовна рутина: „Утрата се тивки и непрекинати. По ручекот, додека сите одмораат во остатокот од попладнето, а тимот во САД се враќа онлајн, јас обично се префрлам на полн работен режим“, вели Грин.

Шефот на „Ледерах“ (Läderach), Јоханес Ледерах, ја претставува третата генерација што го води брзорастечкиот швајцарски производител на чоколадо. (Компанијата неодамна отвори две нови продавници во Лондон и има над 200 низ целиот свет.) „За време на патувањата, за да ги видам нашите одгледувачи на какао во Тринидад, заливот Маракас стана мое омилено место за вистинско бегство за рекуперирање. Пливањето во тие кристално чисти води е чисто блаженство“. Тој задолжително се препушта и на локалните специјалитети: „Ниедно патување не е комплетно без локалниот ‘бејк енд шарк’ (сендвич со пржена риба), кулинарско искуство што нема лесно да
го заборавите“. Тој не ја чува оваа тајна и со задоволство го споделил тоа парче рај со менаџерите на „Ледерах“ во форма на награда за нивната долгогодишна служба.

Depositphotos

 

Пред да ја основа „ Евелин и Боби“ (Evelyn & Bobbie), иновативна компанија за градници, во 2017 година, Бри Меккин работеше во финансии во Силициумската Долина, во фирмата за приватен капитал „Партенон капитал“ (Parthenon Capital). Во март брендот се прошири во Велика Британија, каде што неговите производи за интимни делови се продаваат во „Џон Луис“, а во текот на последните три години бизнисот доживеа годишна стапка на раст на нето-продажбата од 86 проценти. За да се одмори, Меккин бега во Мексико. „Во оваа фаза од животот со моето семејство сакаме да одиме во едно посебно мало одморалиште покрај плажа во рурална Оахака. Тоа е на неколку милји по крајбрежниот пат, а последниот пат кога бевме таму во најпрометниот ден имаше вкупно 10 луѓе на плажа. Изнајмивме куќа од локален жител. Првиот ден се снабдивме со неверојатни производи од отворениот пазар, а потоа едвај се качувавме во автомобилот“, вели Меккин.

Од 2013 година Моа Гурбизер од Шведска го проширува асортиманот на „Одбирд“ (Oddbird) со своето омилено култно вино без алкохол. Во август 2024 година таа лансира шест вина во САД. За да се релаксира, Гурбизер оди во Гечек, Турција. „Тоа е затскриен пристаништен град со помалку од 5.000 луѓе. Поминувам најмалку два дена на море на голема едрилица управувана од капетанот Али, неговата сопруга и деца и околу 30 други гости, а тие ве водат околу 12-те острови што се веднаш до брегот“. Времето што Гурбизер го поминува на море и не мора да биде долго. „Пет дена во Гечек се сè што ми треба за да ја обновам енергијата за цела година“.

 

Во пишувањето на текстот учествуваа Маријана Авакумовиќ, Урбан Червек, Кејт Кредер и Ники Екштајн.