Замислете си како се будите додека зората руменее над океанот, завиткани во мека, бела постелнина. Облекувате луксузна италијанска бањарка од брендот „Фрете“ (Frette) и го гледате изгрејсонцето од џакузито на вашата приватна тераса. Батлерот тропа и внесува „мимози“ (коктел од шампањско и сок од портокал).
Не, не се наоѓате во ресорт со пет звезди; не сте дури ни на копно. Пловите на новата генерација крстосувачки бродови - помали, слични на јахти и многу полуксузни од сличните бродови дизајнирани за голем број патници. И како и остатокот од џетсетот, целосно сте воодушевени од тоа.
На овие луксузни бродови не недостигаат патници, иако цените за крстосувања почнуваат од 14.000 долари за седумдневен престој за двајца (вклучувајќи неограничени количества шампањ и кавијар). Познатите брендови на луксузни одморалишта, вклучувајќи ги „Фор сизнс“ и „Аман“, воведуваат нови бродови за да ги задоволат таквите потреби на пазарот, а има и голем број нови луксузни концепти што ги осмислиле милијардери како што се Бернар Арно од францускиот конгломерат „ЛВМХ Луј Витон Моет Хенеси“ и Франсоа Пино од холдинг компанијата „Артемис груп“.
На пример, третата јахта во рамките на луксузната линија јахти за крстосување на „Риц-Карлтон“, „Луминара“, која може да прими 452 патници, ќе исплови летово, а патниците ќе можат да уживаат во неограничени количества шампањ „моет и шандон“, луксузни третмани за лице со дијамантска прашина, како и понуда од седум ресторани. Брендот „Ориент експрес“ на Арно (кој делумно е во сопственост на групацијата „Акор“) следната година ќе лансира ултралуксузна едриличарска јахта, која може да прими 108 патници.
Ваквите искуства се далеку од вообичаената перцепција за масовните крстосувања како пловечки градови со аквапаркови, тобогани и бескрајна шведска маса - услуги што истовремено може да привлечат илјадници патници што сакаат да го извлечат максимумот за поволна цена. (Со други зборови, пекол за оние што бараат ексклузивно и софистицирано искуство.) Можеби дури ќе ги наречете целосни спротивни, особено кога ќе ги споредите дестинациите до кои пловат. Малите отмени бродови пловат до затскриени области - покрај грчкиот град Монемвазија на Пелопонез и живописното крајбрежно одморалиште Санари-сур-Мер во југоисточна Франција, тие пловат и до Арктикот и Антарктикот.
Пред пандемијата, патниците на луксузни линии од добропознатите компании за крстосување како „Реџент севн сис“ (Regent Seven Seas), „Силверси“ (Silversea) и „Сибурн“ (Seabourn) беа претежно бебибумери (луѓе родени во периодот меѓу 1946 и 1964 година), кои доста трошеа уживајќи во своето пензионирање. Меѓутоа, на неодамнешното крстосување по Медитеранот со „Риц-Карлтон“, видов богати милениумци (родени меѓу 1981 и 1996 година), припадници на генерација X (родени меѓу 1965 и 1980 година) и семејства со деца. Со коктели од јузу (јапонско цитрусно овошје што може да се комбинира со различни видови алкохолни пијалаци), тие споредуваа понуди за лежерни, но добро испланирани екскурзии до Сен Тропе, како што е запирање во кафуле за да се пробаат локални колачи или да се одигра боче во јавен парк. Во текот на крстосувањето по Карибите, организирано од „Експлора џрнис“ (Explora Journeys), бренд лансиран во 2023 година од приватната „МСЦ груп“ (MSC Group), технолошките и финансиските директори ја проверуваа берзата од своите штандови со лелеави завеси покрај базенот.
Овој најексклузивен сегмент на крузери, кои обично превезуваат од 100 до 950 патници и се одликуваат со нивната супериорна услуга, пространост и поголем број персонал по патник, расте два и пол пати побрзо од остатокот од индустријата. Луксузните крузери сега можат да сместат 1,2 милион патници годишно, а според процените на Меѓународната асоцијација на крстосувања (КЛИА - CLIA), до 2028 година капацитетот ќе надмине 1,5 милион патници, што одговара на воведување барем десетина нови брода. Всушност, експертите во хотелиерството целосно го менуваат концептот на крстосување.
„Зборот ‘крстосување’ донекаде го следи имиџ на масовна потрошувачка“, признава Ана Неш, новоназначената претседателка на „Бренд експлора“ (Brand Explora) и поранешна извршна директорка во „Аман“. Таа вели дека претпочита да се занимава со патувања по море.
„Фор сизнс“ ги упатува своите лојални гости на луксузна јахта со 95 апартмани, „Фор сизнс 1“, која ќе исплови во јануари 2026 година на седумдневно крстосување по Карибите. Цените за апартманите почнуваат од 20.000 долари и не ги вклучуваат сите оброци. Седумдневен престој во пентхаус со површина од 929 квадратни метри, сместен во стаклена купола на бродот, чини 330.000 долари, а за тие пари можете да изнајмите пристојна јахта со целото гориво и храна. Ако го изземеме пентхаусот, тоа не е најскапиот брод што е пуштен во употреба.
Јахтата „Ориент експрес“, долга 730 метри и со 54 апартмани, ќе биде лансирана во летото во 2026 година и ќе има спа-центар „Герлен“ и водни активности, а храната ќе ја приготвува францускиот готвач Јаник Аљено, чии ресторани во Париз и Куршевел имаат вкупно 17 ѕвездички на „Мишелин“. Тридневно крстосување по Азурниот Брег ќе чини 16.800 евра (19.075 долари) по кабина.
Услугите и карактеристиките на овие бродови ја оправдуваат високата цена. Додека пловите со јахтата „Илма“ на „Риц-Карлтон“ со капацитет од 448 патници, деновите кога е закотвена на пристаниште може да ги поминете не само шетајќи низ Монте Карло туку и уживајќи во базенот со морска вода во замокот на надувување, закотвен во средината на Лигурско Море. На јахтата „Експлора I“, базенот во стилот на стаклена градина навечер се трансформира во кино на отворено.
Сепак, највредното нешто во врска со патувањето со мали бродови не може да се купи, вели Неш, долгогодишна патничка на крстосувања. А тоа е заедницата. Таа вели дека секогаш е воодушевена од тоа како луѓето се дружат и создаваат пријателства. „Се чувствувате како да сте на трага од нешто за кое другите луѓе не знаат“, вели таа. „Никогаш не сум го доживеала тоа во хотелите“.
.webp){kind=icon}
Во моментов нема коментари за веста. Биди прв да коментира...