Ова се 50 компании што вреди да се следат во 2026 година

Аналитичарите на „Блумберг интелиџенс“ (Bloomberg Intelligence) следат илјадници компании од различни индустрии - од компјутерската и автомобилската до финансиската и прехранбената. Еве 50 компании што ги издвојуваат како вредни за внимателно следење оваа година, без разлика дали се во подем или во пад.

Нивната анализа комбинира спротивставени гледишта и катализатори на промени, како ново раководство, продажба или аквизиции на имот, како и планови за производи и услуги.

При составувањето на листата, „Блумберг интелиџенс“ се фокусирал и на потенцијалните ефекти од промените во американската царинска политика, трката за преземање контрола врз резервите од клучни ресурси и трансформативните влијанија на вештачката интелигенција. – Тим Крегхед

1. Индустрија: градежништво
АЦС (ACS)
Пазарна капитализација (млд. долари): 25
Главен раководител: Флорентино Перез Родригез, претседател
Проценета промена на приходите за 2025 година: 8 отсто
Проценета продажба за 2026 година (млд. долари): 62
Правно име: „Активидадес де конструксион и сервисиос“ (Actividades de Construcción y Servicios SA)

Оперативната добивка на шпанската инженерска и градежна компанија би требало да им пркоси на прогнозите на аналитичарите во 2026 година. Клучна улога има американската единица „Тарнер“ (Turner), водечки изведувач на работи во САД, каде што предничи според нарачките за центри за податоци. Неодамнешните планови за ширење на големите технолошки компании укажуваат на понатамошен раст. – Соња Балдеира

2. Здравство: медицински уреди
„Аџилент“ (Agilent)
Пазарна капитализација (млд. долари): 42
Главен раководител: Падраиг Мекдонел, претседател/извршен директор
Проценета промена на приходите за 2025 година: 5 отсто
Проценета продажба за 2026 година (млд. долари): 7,4
Правно име: „Аџилент технолоџис“ (Agilent Technologies Inc.)

Производителот на лабораториска опрема и потрошен материјал е на пат кон профитни маржи што ќе бидат подобри од очекуваното во 2026 година. Веројатно ќе има корист од клиентите што заменуваат клучни производи, од намалувањето на трошоците по реструктурирањето и од растечката побарувачка во Кина, која моментално учествува со 15 отсто во продажбата. – Џонатан Палмер

3. Индустрија: воздухопловство
„Ер Франс-КЛМ“ (Air France-KLM)
Пазарна капитализација (млд. долари): 3,4
Главен раководител: Бенџамин Смит, извршен директор
Проценета промена на приходите за 2025 година: 4 отсто
Проценета продажба за 2026 година (млд. долари): 40
Правно име: „Ер Франс-КЛМ“ (Air France-KLM)

Откако профитираше од пониските трошоци за гориво во текот на 2025 година и од повисоките цени на билетите на почетокот од годината, изгледите стануваат сè потурбулентни за француско-холандската авиокомпанија. Очекуваното зголемување на платите и поголемите трошоци за одржување на авионите им се закануваат на профитните маржи. Сè поголемата конкуренција на европските и трансатлантските рути, кои сочинуваат околу две третини од вкупните летови на „Ер Франс-КЛМ“ (Air France-KLM), претставува дополнителен предизвик. – Конрој Гејнор

4. Здравство: здравствено осигурување
„Алајнмент хелткер“ (Alignment Healthcare)
Пазарна капитализација (млд. долари): 3,6
Главен раководител: Џон Као, извршен директор/основач
Проценета промена на приходите за 2025 година: 30 отсто
Проценета продажба за 2026 година (млд. долари): 5,1
Правно име: „Алајнмент хелткер“ (Alignment Healthcare Inc.)

Давателот на администрирана здравствена заштита (managed-care provider), со фокус на постарите лица, веќе неколку години по ред бележи раст на добивката, а 2026 година би требало да му донесе и зголемување на пазарниот удел. „Алајнмент“ (Alignment) има значително помал број хоспитализации, посети на итна помош и повторни приеми во споредба со конкуренцијата. Тоа, пак, ги намали трошоците и го олесни привлекувањето нови членови, додека компанијата се шири на постојните пазари како Калифорнија или на нови како Аризона. – Глен Лосев

5. Здравство: биотехнологија
„Алнилам фарма“ (Alnylam Pharma)
Пазарна капитализација (млд. долари): 60
Главен раководител: Ивон Гринстрит, извршна директорка
Проценета промена на приходите за 2025 година: 44 отсто
Проценета продажба за 2026 година (млд. долари): 5,4
Правно име: „Алнилам фармасјутикалс“ (Alnylam Pharmaceuticals Inc.)

Биотехнолошката компанија го разви првиот одобрен лек за лекување АТТР (ATTR), задебелување на срцевиот ѕид што ја намалува ефикасноста на работата на срцето, од кое страдаат дури 500.000 луѓе во светот. Оваа класа на лекови би можела да стане прв избор за терапија за болеста и главен двигател на растот за „Алнилам“ (Alnylam). – Ен-Хантер ван Кирк

6. Индустрија: транспортна опрема
„Алстом“ (Alstom)
Пазарна капитализација (млд. долари): 12
Главен раководител: Анри Пупар-Лафарж, извршен директор
Проценета промена на приходите за 2025 година: 4 отсто
Проценета продажба за 2026 година (млд. долари): 23
Правно име: „Алстом“ (Alstom SA)

Францускиот производител на железнички и подземни системи има потенцијал да генерира 2,5 милијарди евра (2,9 милијарди долари) паричен тек до 2028 година (значително над консензусот), благодарение на продажбата на попрофитабилни производи и растот на бројот на нарачки. Сегментите за сигнализација и услуги со висока маржа ќе имаат корист од имплементацијата на новиот регионален систем за управување со европските железници. Повеќегодишниот напор на Германија да го подобри својот проблематичен железнички систем ќе биде дополнителен поттик. – Омид Вазири

7. Материјали: челик
„Арцелормитал“ (ArcelorMittal)
Пазарна капитализација (млд. долари): 34
Главен раководител: Адитија Митал, извршен директор
Проценета промена на приходите за 2025 година: 8 отсто
Проценета продажба за 2026 година (млд. долари): 67
Правно име: „Арцелормитал“ (ArcelorMittal)

Поради обилните слободни капацитети и намалената индустриска побарувачка во Европа, производителот на челик со седиште во Луксембург тешко ќе може да ги зголеми цените онолку колку што очекува пазарот. Ситуацијата би можела да се влоши ако премногу затворени фабрики повторно се активираат како одговор на ограничувањата на ЕУ за увоз на челик. Многу аналитичари премногу се фокусираа на потенцијалните придобивки од царините и од изградбата на инфраструктура во Германија, занемарувајќи ги ризиците што ги носи вишокот капацитети. – Алон Олша

8. Финансии: осигурување
„Авива“ (Aviva)
Пазарна капитализација (млд. долари): 26
Главен раководител: Аманда Бланк, извршна директорка
Проценета промена на приходите за 2025 година: 8 отсто
Проценета продажба за 2026 година (млд. долари): 50
Правно име: „Авива Плц“ (Aviva Plc)

Откако стана најголемиот автоосигурител во Обединетото Кралство преку купувањето на конкурентот „Дајрект лајн“ (Direct Line), „Авива“ претрпе пад на премиите и раст на трошоците за отштетни побарувања. Нејзиниот удел на пазарот се удвои, но компанијата се бори со зголемувањето на цените. Целта да го зголемува профитот за 10 отсто годишно во следните две години се чини тешко остварлива. – Кевин Рајан

9. Индустрија: воздухопловство
„Боинг“ (Boeing)
Пазарна капитализација (млд. долари): 141
Главен раководител: Кели Ортберг, претседател/извршен директор
Проценета промена на приходите за 2025 година: 10 отсто
Проценета продажба за 2026 година (млд. долари): 97
Правно име: „Боинг“ (Boeing Co.)

По седум години загуби, производителот на авиони се врати на профитабилност, а се очекува тоа закрепнување да продолжи и покрај геополитичките ризици и бавниот економски раст. Зголемувањето на производството на комерцијални авиони кај „Боинг“ го поттикнува растот на добивката, додека големиот заостаток на нарачки ѝ овозможува на компанијата краткорочните испораки да ги пренасочи надвор од пазарите каде што се соочува со високи царини. На подолг рок, новите нарачки би требало да имаат корист од перцепцијата дека квалитетот се стабилизирал, како и од купувањата на земјите што настојуваат да го урамнотежат трговскиот биланс со САД.
– Џорџ Фергусон

10. Здравство: биотехнологија
„Бриџ био фарма“ (BridgeBio Pharma)
Пазарна капитализација (млд. долари): 14
Главен раководител: Нил Кумар, извршен директор/коосновач
Проценета промена на приходите за 2025 година: 84 отсто
Проценета продажба за 2026 година (млд. долари): 0,9
Правно име: „Бриџ био фарма“ (BridgeBio Pharma Inc.)

Биотехнолошката компанија разви орален лек за најчестиот облик на џуџест раст, состојба што погодува дури 250.000 луѓе во светот. Таблетата на „Бриџ био“ претставува значаен исчекор во однос на претходните терапии што бараа секојдневни инјекции, што ја отежнуваше доследната примена. Се чини дека пазарот исто така го потценува потенцијалот на лекот за лекување поблаг облик на џуџест раст, примена што би можела повеќе од двојно да ги надмине сегашните консензусни очекувања за продажба. – Ен-Хантер ван Кирк

11. Дискрециска потрошувачка: ресторани
„Бринкер“ (Brinker)
Пазарна капитализација (млд. долари): 6,7
Главен раководител: Кевин Хокман, претседател/извршен директор
Проценета промена на приходите за 2025 година: 3 отсто
Проценета продажба за 2026 година (млд. долари): 5,8
Правно име: „Бринкер интернешнл“ (Brinker International Inc.)

Приходите на сопственикот на синџирите ресторани со американско-италијанска храна „Чилиз“ (Chili’s) и „Маџијанос“ (Maggiano’s) се на пат да ги надминат очекувањата. „Бринкер“ го засили маркетингот за „Чилиз“, а новите понуди, како замрзнати маргарити со текила „патрон“ (Patrón), поквалитетни ребра и подобрени начос, значително ја зголемија продажбата. Реновирањето на рестораните за создавање попријатна атмосфера би требало да помогне во привлекувањето поголем број гости. – Мајкл Хејлен

12. Дискрециска потрошувачка: малопродажба на облека
„Канада гус“ (Canada Goose)
Пазарна капитализација (млд. долари): 1,4
Главен раководител: Дани Рајс, претседател/извршен директор
Проценета промена на приходите за 2025 година: 5 отсто
Проценета продажба за 2026 година (млд. долари): 1,5
Правно име: „Канада гус холдингс“ (Canada Goose Holdings Inc.)

Неодамна именуваниот креативен директор на производителот на зимски јакни, Хајдер Акерман, почнува да има позитивно влијание врз компанијата и помага добивката да порасне повеќе отколку што предвидуваа многу аналитичари. Од неговото доаѓање во 2024 година, Акерман воведе колекции како премиум линијата „Сноу гус“ (Snow Goose). Новата маркетиншка кампања и фокусот на попрофитабилна директна продажба на купувачите исто така придонесуваат за позитивните изгледи. – Андреа Фердинандо Леџиери

13. Финансии: банкарство
„Капитек“ (Capitec)
Пазарна капитализација (млд. долари): 27
Главен раководител: Греам Ли, извршен директор
Проценета промена на приходите за 2025 година: 18 отсто
Проценета продажба за 2026 година (млд. долари): 3,4
Правно име: „Капитек банк холдингс“ (Capitec Bank Holdings Ltd.)

Јужноафриканската банка е на пат да оствари раст на добивката од 15 отсто или повеќе до 2028 година. Бизнис-моделот со ниски трошоци и ниски цени, кој го разви за потрошувачите, го применува и во деловното банкарство, осигурувањето и хипотекарните кредити. Пазарните очекувања дека растот ќе забави изгледаат премногу внимателни. – Филип Ричардс

14. Материјали: градежни материјали
„Карлајл“ (Carlisle)
Пазарна капитализација (млд. долари): 13
Главен раководител: Д. Кристијан Кох, претседател/извршен директор
Проценета промена на приходите за 2025 година: 3 отсто
Проценета продажба за 2026 година (млд. долари): 5,1
Правно име: „Карлајл“ (Carlisle Cos.)

Производителот на градежни материјали е подготвен да ги надмине прогнозите за добивка во 2026 година, бидејќи поострите временски услови ги погодуваат дотраените покриви во САД, додека осигурителните компании ги заоструваат барањата купувачите подобро да ги одржуваат своите домови. Градежните работи што произлегуваат од враќањето на производството во земјата и од инфраструктурните проекти, особено во регионот Сан Ббелт, претставуваат дополнителен катализатор за раст. – Кевин Којам

15. Финансии: банкарство
КБА (CBA)
Пазарна капитализација (млд. долари): 167
Главен раководител: Мет Комин, извршен директор
Проценета промена на приходите за 2025 година: 4 отсто
Проценета продажба за 2026 година (млд. долари): 20
Правно име: „Комонвелт банка на Австралија“ (Commonwealth Bank of Australia)

Пазарот има високи очекувања за растот на најголемата австралиска банка; вреднувањето на КБА (CBA) е едно од највисоките меѓу глобалните кредитори. Сепак, се чини дека нејзината добивка ќе разочара поради растечките трошоци, влошувањето на квалитетот на кредитното портфолио и претстојното намалување на каматните стапки од страна на австралиската централна банка. – Мет Инграм

16. Материјали: хемикалии

„ЦФ индастрис“ (CF Industries)
Пазарна капитализација (млд. долари): 12
Главен раководител: Тони Вил, претседател/извршен директор
Проценета промена на приходите за 2025 година: -6 отсто
Проценета продажба за 2026 година (млд. долари): 6,6
Правно име: „ЦФ индастрис холдингс“ (CF Industries Holdings Inc.)

Американскиот производител на ѓубрива рано влезе на пазарот на син амонијак (blue ammonia), верзија на ова соединение со понизок јаглероден удел, чија употреба брзо расте во Европа. Политиката на ЕУ за оданочување на јаглеродот за периодот 2026–2027 би требало да ја поттикне продажбата на оваа состојка во ѓубривата, хемикалиите, пластиката и средствата за чистење, а со оглед на производствената база во САД, трошоците на ЦФ се приближно двојно пониски од трошоците на неговите европски конкуренти. – Алексис Максвел

17. Индустрија: градежништво
„Чајна рејлвеј груп“ (China Railway Group)
Пазарна капитализација (млд. долари): 18
Главен раководител: Чен Венџиан, претседател

Проценета промена на приходите за 2025 година: 1 отсто
Проценета продажба за 2026 година (млд. долари): 160
Правно име: „Чајна рејлвеј груп“ (China Railway Group Ltd.)

Со растот на кинеската потрошувачка за инфраструктура на најниско ниво во последните четири години, на големите државни изведувачи, како овој лидер, сè потешко им е да ги исполнат целите за приходи. По една деценија големи сообраќајни и инфраструктурни проекти, фокусот на Пекинг се префрла на дигитални проекти, зелена енергија и урбана обнова, што значи дека „Чајна рејлвеј груп“ (China Railway Group) ќе се соочи со поголема конкуренција од помали компании. – Денис Вонг

18. Комунални услуги: нуклеарна енергија
„Констелејшн“ (Constellation)
Пазарна капитализација (млд. долари): 112
Главен раководител: Џозеф Домингез, претседател/извршен директор
Проценета промена на приходите за 2025 година: 11 отсто
Проценета продажба за 2026 година (млд. долари): 26
Правно име: „Констелејшн енерџи“ (Constellation Energy Corp.)

Најголемиот американски оператор на нуклеарни централи е подготвен да ги надмине очекувањата за профит во следните неколку години, бидејќи ја задоволува растечката побарувачка за чиста и сигурна електрична енергија за центри за податоци што обезбедуваат компјутерска моќ за развој на вештачката интелигенција. Во клучни држави како Илиноис, склучува нови попрофитабилни договори, кои ја потврдуваат неговата улога како долгорочен снабдувач со енергија. – Ники Хсу

19. Дискрециска потрошувачка: автоделови
„Континентал“ (Continental)
Пазарна капитализација (млд. долари): 15
Главен раководител: Николај Зецер, претседател/извршен директор
Проценета промена на приходите за 2025 година: -2 отсто
Проценета продажба за 2026 година (млд. долари): 23
Правно име: „Континентал“ (Continental AG)

Профитните маржи на германскиот производител на гуми веројатно ќе ги надминат прогнозите во следните две години, бидејќи го оптимизира своето работење. „Континентал“ (Continental) го премести производството во поголеми и поевтини фабрики во Кина и ги укинува неефикасните единици, вклучувајќи го производството на гуми за камиони и автобуси во Индија. Завршувањето на планираната продажба на одделот за индустриски решенија „Контитек“ (ContiTech) ќе ѝ овозможи на компанијата дополнително да се фокусира на гумите.
– Џилијан Дејвис

20. Финансии: банкарство
„Данске“ (Danske)
Пазарна капитализација (млд. долари): 39
Главен раководител: Карстен Егерис, извршен директор
Проценета промена на приходите за 2025 година: 1 отсто
Проценета продажба за 2026 година (млд. долари): 8,9
Правно име: „Данске банка“ (Danske Bank A/S)

Поради растот на добивката, се очекува „Данске банка“ да ја зголеми дивидендата во 2026 година, бидејќи тригодишното ограничување на исплатата, наметнато од регулаторите, заврши во 2025 година. Нејзината профитабилност расте благодарение на силните приходи од кредитирање и солидната кредитна способност, а со капитална заштита значително над целта, кредиторот располага со речиси три милијарди евра што може да ги искористи за поголеми дивиденди и откуп на акции. – Маријана Блек

21. Дискрециска потрошувачка: обувки
„Декерс“ (Deckers)
Пазарна капитализација (млд. долари): 13
Главен раководител: Стефано Кароти, претседател/извршен директор
Проценета промена на приходите за 2025 година: 7 отсто
Проценета продажба за 2026 година (млд. долари): 5,6
Правно име: „Декерс аутдор“ (Deckers Outdoor Corp.)

Производителот на обувки „угг“ (Ugg) и „хока“ (Hoka) се надева дека иновациите ќе ја ублажат загриженоста на инвеститорите поради забавувањето на продажниот замав. „Хока“ планира да го прошири својот удел од околу еден отсто на глобалниот пазар на спортски обувки со нови производи и со велепродажен пробив во Европа, Блискиот Исток, Африка и Азија. „Угг“ воведува стилови што ќе останат релевантни и по зимските месеци, а истовремено ќе ја зголемат привлечноста кај мажите. Кога сето тоа ќе се собере, се чини дека растот на продажбата во 2026 година ќе ги надмине насоките на менаџментот. – Ебигејл Гилмартин

22. Основни потрошни производи: пијалаци
„Дијажо“ (Diageo)
Пазарна капитализација (млд. долари): 51
Главен раководител: Дејв Луис, извршен директор
Проценета промена на приходите за 2025 година: 1 отсто
Проценета продажба за 2026 година (млд. долари): 20
Правно име: „Дијажо“ (Diageo Plc)

Новиот извршен директор Дејв Луис очекува закрепнување по намалувањето на прогнозата две години по ред. Ако нивото на резерви се стабилизира, стравувањата од царини се ублажат, а потрошувачите продолжат да купуваат производи од највисоките ценовни категории, британскиот производител на алкохол би можел да го удвои растот на продажбата на четири отсто. – Данкан Фокс

23. Основни потрошни производи: супермаркети
„Дино Полска“ (Dino Polska)
Пазарна капитализација (млд. долари): 11
Главен раководител: Томаш Бернацки, претседател на надзорниот одбор
Проценета промена на приходите за 2025 година: 18 отсто
Проценета продажба за 2026 година (млд. долари): 11
Правно име: „Дино Полска“ (Dino Polska SA)

Полскиот синџир на супермаркети и натаму се соочува со конкурентски предизвици и високи трошоци за плати, кои сè повеќе ќе влијаат врз неговата оперативна добивка. „Дино“ работи исклучиво во матичната земја, каде што дисконтните синџири „Алди“ (Aldi) и „Лидл“ (Lidl) брзо се шират. Тоа ја изложува компанијата на ризик од долготрајна ценовна војна и го зголемува притисокот врз растот на промотивната потрошувачка. – Евгениј Батчваров

24. Технологија: софтвер
„Дајнатрејс“ (Dynatrace)
Пазарна капитализација (млд. долари): 14
Главен раководител: Рик Меконел, извршен директор
Проценета промена на приходите за 2025 година: 15 отсто
Проценета продажба за 2026 година (млд. долари): 2,2
Правно име: „Дајнатрејс“ (Dynatrace Inc.)

Програмите на компанијата за инфраструктурен софтвер овозможуваат следење на безбедноста и сигурноста на ВИ-апликациите во компаниите во реално време. Како што примената на ВИ се шири во сите индустрии, продажбата на „Дајнатрејс“ (Dynatrace) во 2026 година повторно би требало да ги надмине очекувањата. – Сунил Рајгопал

25. Комуникации: видеоигри
„Електроник артс“ (Electronic Arts)
Пазарна капитализација (млд. долари): 51
Главен раководител: Ендрју Вилсон, претседател/извршен директор
Проценета промена на приходите за 2025 година: 6 отсто
Проценета продажба за 2026 година (млд. долари): 8,3
Правно име: „Електроник артс“ (Electronic Arts Inc.)

Новиот наслов „Бетлфилд 6“ (Battlefield 6) на оваа компанија за развој на видеоигри ги надмина рекордите на преднарачки за најновиот „Кол оф дјути“ (Call of Duty) на „Мајкрософт“ (Microsoft Corp.), водечката франшиза во жанрот игри со пукање од перспектива на играчот, и е на пат да продаде дури 20 милиони примероци. Фудбалските наслови на „Електроник артс“ (Electronic Arts) исто така би требало да добијат поттик од Светското првенство во 2026 година, поради што насоките за заработка се чинат внимателни. – Нејтан Наиду

26. Индустрија: електрична опрема
„Емерсон“ (Emerson)
Пазарна капитализација (млд. долари): 74
Главен раководител: Лал Карсанбаи, претседател/извршен директор
Проценета промена на приходите за 2025 година: 5 отсто
Проценета продажба за 2026 година (млд. долари): 19
Правно име: „Емерсон електрик“ (Emerson Electric Co.)

Производителот на опрема за индустриска автоматизација е подготвен да профитира од новите енергетски проекти и од преселувањето на производството во САД. На пример, петте американски терминали за извоз на течен природен гас најавени во 2025 година укажуваат на значајни нарачки за системите на „Емерсон“ за контрола на протокот и за софтверските системи со вештачка интелигенција, што би требало да помогне заостатокот на нарачки на компанијата да порасне на нов рекорд. – Мустафа Окур

27. Комуникации: сателити
„Јутелсат“ (Eutelsat)
Пазарна капитализација (млд. долари): 1,8
Главен раководител: Жан-Франсоа Фалашер, извршен директор
Проценета промена на приходите за 2025 година: 2 отсто
Проценета продажба за 2026 година (млд. долари): 1,4
Правно име: „Јутелсат комјуникејшнс“ (Eutelsat Communications SA)

Парискиот сателитски оператор е во одлична позиција да профитира, бидејќи Европа ги зголемува вложувањата во безбедноста за да се спротивстави на растечката закана од Русија. Француската армија во јуни потпиша договор со „Јутелсат“ (Eutelsat) вреден до една милијарда евра, додека се подготвуваат и други зделки. Компанијата веројатно ќе има корист и од проширувањето на независната сателитска мрежа на ЕУ, Ирис2 (Iris2). – Џон Дејвис

28. Материјали: бакар
„Фрст квантум“ (First Quantum)
Пазарна капитализација (млд. долари): 19
Главен раководител: Тристан Паскал, извршен директор
Проценета промена на приходите за 2025 година: 25 отсто
Проценета продажба за 2026 година (млд. долари): 6,4
Правно име: „Фрст квантум минералс“ (First Quantum Minerals Ltd.)

Пазарот се обложува дека рудникот за бакар „Кобре Панама“ (Cobre Panama) на „Фрст квантум“ повторно ќе се отвори на средината на 2026 година, но тоа изгледа премногу оптимистички. Тоа беше најголемиот рудник на компанијата пред да го затвори Панама пред две години, а засега нема јасна временска рамка за преговорите за повторно стартување на производството. Со оглед на претходните протести околу рудникот и економските интереси на двете страни, одложувањето и понатаму е веројатно. – Грант Споре

29. Здравство: медицински средства
„Ајритам“ (iRhythm)
Пазарна капитализација (млд. долари): 5,9
Главен раководител: Квентин Блекфорд, претседател/извршен директор
Проценета промена на приходите за 2025 година: 17 отсто
Проценета продажба за 2026 година (млд. долари): 0,8
Правно име: „Ајритам технолоџис“ (iRhythm Technologies Inc.)

Додека се подготвува да воведе мобилен уред за срцева телеметрија што може да открие аритмија и да испраќа податоци во реално време во центри за следење, производителот на медицински уреди е на пат до 2027 година да оствари раст на продажбата поголем од 20 отсто. „Ајритам“ (iRhythm) е лидер во сегментот на уреди за долгорочно следење на срцевата функција, а новиот уред ѝ ветува на компанијата силно присуство и на мобилниот пазар. – Мет Хенриксон

30. Здравство: договорни истражувања
„Џоин лабс“ (Joinn Labs)
Пазарна капитализација (млд. долари): 2,7
Главен раководител: Јуксиа Фенг, претседателка/извршна директорка/основачка
Проценета промена на приходите за 2025 година: 9 отсто
Проценета продажба за 2026 година (млд. долари): 0,3
Правно име: „Џоин лабораторис (Чајна)“ (Joinn Laboratories (China) Co.)

Напорот на Кина да ја зајакне својата фармацевтска индустрија во странство претставува можност за нејзините биотехнолошки компании. Сепак, тоа ќе подразбира отстапување од генеричките терапии и од локално спроведените испитувања на лекови, што би можело да ѝ наштети на оваа кинеска организација за договорни истражувања и тестирања. Со оглед на тоа што околу 80 отсто од приходите доаѓаат од матичната земја, намалувањето на бројот на договори и недостигот од клинички испитувања го зголемуваат ризикот „Џоин“ да не ги оствари своите прогнози за продажба за 2026 година. – Џејми Мартен

31. Финансии: банкарство
„Касикорнбанк“ (Kasikornbank)
Пазарна капитализација (млд. долари): 14
Главен раководител: Катја Индаравиџаја, извршна директорка
Проценета промена на приходите за 2025 година: -1 отсто
Проценета продажба за 2026 година (млд. долари): 5,9
Правно име: „Касикорнбанк“ (Kasikornbank PCL)

Како што забавува растот на Тајланд, а земјата се соочува со трговски тензии, вториот најголем кредитор се соочува со намалување на кредитното портфолио и со ризичен квалитет на средствата. Слабите приходи од кредитирање и потребата за издвојување сè поголеми средства за покривање сомнителни заеми би можеле да ја намалат добивката на банката во 2026 година под прогнозите. – Сара Џејн Махмуд

32. Недвижности: центар за податоци РЕИТ (REIT)
„Кепел ДЦ“ (Keppel DC)
Пазарна капитализација (млд. долари): 4,3
Главен раководител: Ло Хви Лонг, извршен директор
Проценета промена на приходите за 2025 година: 9 отсто
Проценета продажба за 2026 година (млд. долари): 0,3
Правно име: „Кепел ДЦ риит“ (Keppel DC REIT)

Сингапурскиот инвестициски фонд за недвижности се фокусира исклучиво на центри за податоци, а репутацијата на земјата за политичка стабилност и безбедност му дава предност на „Кепел“ во привлекувањето закупци за објекти наменети за услуги во облак и инфраструктура за вештачка интелигенција. РЕИТ-фондот успеа да ги зголеми и кириите, бидејќи сè повеќе компании бараат простор во постојните центри, додека истовремено го проширува портфолиото на недвижности низ Азија. – Кен Фунг

33. Индустрија: машини
„Кион“ (Kion)
Пазарна капитализација (млд. долари): 9,7
Главен раководител: Роб Смит, извршен директор
Проценета промена на приходите за 2025 година: 6 отсто
Проценета продажба за 2026 година (млд. долари): 14
Правно име: „Кион груп“ (Kion Group AG)

Германскиот производител на виљушкари и складишна опрема профитира од напорите за декарбонизација, ширењето на е-трговијата и растечката автоматизација во рамките на цикличкото закрепнување. Големиот раст на нарачките во 2025 година најавува зголемување на продажбата во 2026 година, додека преминот кон системи на батерии претставува дополнителна предност со оглед на водечката позиција на „Кион“ во сегментот електрични камиони. – Омид Вазири

34. Технологија: опрема за полупроводници
„Лам рисрч“ (Lam Research)
Пазарна капитализација (млд. долари): 199
Главен раководител: Тим Арчер, претседател/извршен директор
Проценета промена на приходите за 2025 година: 9 отсто
Проценета продажба за 2026 година (млд. долари): 22,3
Правно име: „Лам рисрч“ (Lam Research Corp.)

Порастот на вложувањата во вештачка интелигенција веројатно ќе придонесе за раст на приходите и заработката на производителот на опрема за полупроводници во следните две години. Како што сè повеќе компании влегуваат во оваа област, производителите на мемориски чипови, како „Самсунг електроникс“ (Samsung Electronics) и „СК Хајникс“ (SK Hynix), ќе мора да инвестираат во производствени алати за изработка на процесори и мемориски чипови за ВИ-сервери. – Масахиро Вакасуги

35. Технологија: полупроводници
„Марвел“ (Marvell)
Пазарна капитализација (млд. долари): 81
Главен раководител: Мет Марфи, претседател/извршен директор
Проценета промена на приходите за 2025 година: 16 отсто
Проценета продажба за 2026 година (млд. долари): 9,3
Правно име: „Марвел технолоџи“ (Marvell Technology Inc.)

Очекувањата за продажбата изгледаат премногу внимателни за овој производител на специјализирани чипови, кои се клучни за компјутерските мрежи. „Марвел“ забележа забрзан раст на нарачките од ВИ-центри за податоци, со клиенти како „Мајкрософт“ (Microsoft) и „Амазон“ (Amazon), и работи на повеќе од 20 мегапроекти. Со околу 7,5 милијарди долари веќе обезбедени од сегашното портфолио од 75 милијарди долари, компанијата е подготвена за уште поголем раст. – Кунџан Собхани

36. Дискрециска потрошувачка: спортска облека
„Најк“ (Nike)
Пазарна капитализација (млд. долари): 97
Главен раководител: Елиот Хил, претседател/извршен директор
Проценета промена на приходите за 2025 година: 4 отсто
Проценета продажба за 2026 година (млд. долари): 48
Правно име: „Најк“ (Nike Inc.)

По три години намалување на прогнозите за профит, спортскиот гигант почнува да има корист од иновациите во новите производи. Станува збор за патиките за трчање „пегасус премиум“ (Pegasus Premium) и „вомеро 18“ (Vomero 18), кошаркарските патики „коби протро“ (Kobe Protro), колекцијата облека „24.7“ (24.7) и проширувањето на франшизата „Ер“ (Air) - сето тоа претставено во 2025 година. „Најк“ исто така ги продлабочува партнерствата со „Фут локер“ (Foot Locker) и „Амазон“, а лансира и нова линија женска фитнес-облека во соработка со „Скимс“ (Skims). – Пунам Гојал

37. Материјали: челик
„Нукор“ (Nucor)
Пазарна капитализација (млд. долари): 37
Главен раководител: Леон Топалијан, претседател/извршен директор
Проценета промена на приходите за 2025 година: 6 отсто
Проценета продажба за 2026 година (млд. долари): 35
Правно име: „Нукор“ (Nucor Corp.)

Царините значат дека производите на американскиот производител на челик би можеле да го заменат увозот, зголемувајќи ја оперативната добивка побрзо отколку што сугерираат пазарните проекции. „Нукор“ има најширока линија производи во САД и слободни капацитети за да ја задоволи побарувачката. Компанијата се приближува и кон завршување инвестициски план вреден 16 милијарди долари, насочен кон проширување на понудата надвор од основните челични производи и додавање производи погодни за развој на инфраструктура и примена во центри за податоци. – Ричард Бурк

38. Финансии: банкарство
„ОТП банка“ (OTP banka)
Пазарна капитализација (млд. долари): 9,6
Главен раководител: Петер Чањи, извршен директор
Проценета промена на приходите за 2025 година: 6 отсто
Проценета продажба за 2026 година (млд. долари): 9,4
Правно име: „ОТП банка“ (OTP Bank Nyrt.)

Со оглед на тоа што добивката сè повеќе расте, исплатите кон акционерите на унгарскиот кредитор би можеле значително да се зголемат во следните две години. Работењето во Источна Европа го поттикнува растот на ОТП, чие кредитно портфолио се зголемуваше за 10 отсто годишно од 2020 година. Управата би можела да ги зголеми дивидендите и откупот на акции од сегашното ниво од околу 45 отсто, за повеќе да се усогласи со конкурентите, кај кои исплатите од 70 отсто се норма. – Илија Шчупко

39. Дискрециска потрошувачка: малопродажба
„Пик ен пеј“ (Pick n Pay)
Пазарна капитализација (млд. долари): 1,1
Главен раководител: Шон Самерс, извршен директор
Проценета промена на приходите за 2025 година: 11 отсто
Проценета продажба за 2026 година (млд. долари): 7,7
Правно име: „Пик ен пеј сторс“ (Pick n Pay Stores Ltd.)

Јужноафриканскиот синџир на супермаркети изгледа подготвено за закрепнување на профитот, бидејќи намалените цени го поттикнуваат растот на продажбата, реновирањата ги прават продавниците попривлечни за купувачите, а менаџментот настојува да ја прошири понудата на големи брендови. Поради сите овие фактори, се чини дека заработката значително ќе расте во 2026 година. – Чарлс Ален

40. Технологија: социјална мрежа
„Редит“ (Reddit)
Пазарна капитализација (млд. долари): 43
Главен раководител: Стив Хафман, извршен директор/коосновач
Проценета промена на приходите за 2025 година: 38 отсто
Проценета продажба за 2026 година (млд. долари): 2,9
Правно име: „Редит“ (Reddit Inc.)

Како што услугите со вештачка интелигенција сè почесто прикажуваат линкови до извори во резултатите од пребарувањето, овој интернет-портал за споделување информации и дискусија меѓу корисници е подготвен да профитира, бидејќи сè повеќе ги насочува луѓето кон своите страници. Силниот раст на посетителите и на огласите што им се прикажуваат би можел да ги подигне приходите во 2026 година над консензусот. – Мандип Сингх

41. Финансии: хипотекарни кредити
„Рокет“ (Rocket)
Пазарна капитализација (млд. долари): 57
Главен раководител: Варун Кришна, извршен директор
Проценета промена на приходите за 2025 година: 66 отсто
Проценета продажба за 2026 година (млд. долари): 11
Правно име: „Рокет“ (Rocket Cos.)

Интернет-хипотекарниот кредитор веројатно ќе забележи послаба заработка од очекуваното во 2026 година поради аквизицијата на конкурентот „Мистер Купер“ (Mr. Cooper) во 2025 година. Компанијата би можела да има тешкотии во остварувањето на очекуваните заштеди на трошоци ако нискобуџетниот модел на „Мистер Купер“ се приспособи кон пристапот на „Рокет“, кој е повеќе ориентиран кон услуги. Дополнителна пречка се и високите каматни стапки што го забавија одобрувањето хипотеки. – Бен Елиот

42. Технологија: полупроводници
„Самсунг електроникс“ (Samsung Electronics)
Пазарна капитализација (млд. долари): 420
Главен раководител: Ли Џе-Јонг, претседател
Проценета промена на приходите за 2025 година: 18 отсто
Проценета продажба за 2026 година (млд. долари): 262
Правно име: „Самсунг електроникс“ (Samsung Electronics Co.)

Најголемиот светски производител на мемориски чипови веројатно ќе оствари поголема добивка од очекуваното во 2026 година, бидејќи растечката побарувачка го поттикнува растот на цените на конвенционалните ДРАМ-чипови, еден од главните производи на „Самсунг“ (Samsung). Конкурентите „СК Хајникс“ и „Мајкрон“ (Micron Technology) повеќе се фокусираат на мемории со висока пропусност за вештачка интелигенција, што му дава дополнителна предност на „Самсунг“ во развојот на традиционалните чипови. – Масахиро Вакасуги

43. Комунални услуги: обновливи извори на енергија
„Скатек“ (Scatec)
Пазарна капитализација (млд. долари): 1,5
Главен раководител: Терје Пилског, извршен директор
Проценета промена на приходите за 2025 година: 12 отсто
Проценета продажба за 2026 година (млд. долари): 0,6
Правно име: „Скатек“ (Scatec ASA)

Норвешкиот производител на обновлива енергија, кој развива проекти за соларна, ветерна и хидроенергија на пазарите во развој, е добро позициониран за повисока добивка од очекуваното во периодот 2026–2028 година. Соларните капацитети на „Скатек“ во Египет и Јужна Африка би требало да го зголемат оперативниот капацитет за околу 50 отсто, што ќе резултира со поголемо производство на електрична енергија при стабилни профитни маржи. – Алесио Мастрандреа

44. Индустрија: угостителство
„Содексо“ (Sodexo)
Пазарна капитализација (млд. долари): 7,6
Главен раководител: Тјери Делапорт, извршен директор
Проценета промена на приходите за 2025 година: 4 отсто
Проценета продажба за 2026 година (млд. долари): 28
Правно име: „Содексо“ (Sodexo)

Благодарение на зголемувањето на цените и новите договори, француската угостителска компанија е подготвена да се врати на раст по две години намалени финансиски прогнози. Сепак, компанијата што снабдува деловни субјекти, училишта и болници мора да ја подобри стапката на задржување клиенти, која е за 94 отсто пониска од онаа кај конкурентите. Тоа веројатно ќе биде клучен фокус за извршниот директор Тјери Делапорт, кој ја презеде функцијата во ноември. – Стјуарт Гордон

45. Финансии: осигурување
„Сони фајненшл“ (Sony Financial)
Пазарна капитализација (млд. долари): 6,7
Главен раководител: Тошихиде Ендо, претседател/извршен директор
Проценета промена на приходите за 2025 година: 7 отсто
Проценета продажба за 2026 година (млд. долари): 6,9
Правно име: „Сони фајненшл груп“ (Sony Financial Group Inc.)

Јапонскиот осигурител веројатно ќе им врати на акционерите многу повеќе отколку што очекува пазарот по повторното котирање на Токиската берза во септември. Неговата силна капитална позиција го поддржува најавениот план за откуп на акции, а заедно со готовинските дивиденди, вкупните приноси за акционерите би можеле да достигнат 100 милијарди јени (640 милиони долари). – Стивен Лам

46. Финансии: исламско осигурување
„Тавнија“ (Tawuniya)
Пазарна капитализација (млд. долари): 4,9
Главен раководител: Отман Јусеф Алкасаби, извршен директор
Проценета промена на приходите за 2025 година: 15 отсто
Проценета продажба за 2026 година (млд. долари): 6,5
Правно име: „Компанијата за кооперативно осигурување“ (The Company for Cooperative Insurance (Tawuniya))

Саудискиот осигурител смета на поголем раст на заработката од очекуваното, додека се шири на пазарот на здравствено осигурување во земјата, вреден 60 милијарди долари. Како што владата се повлекува од својата доминантна улога во секторот, одделот за примарна здравствена заштита „Мина“ (Meena) расте побрзо од конкуренцијата. Хибридниот модел на услуги во живо и дигитални услуги помага да се намали бројот на барања за болничко лекување и итни случаи. – Саломе Схиртладзе

47. Комуникации: телекомуникации
„Телком Индонезија“ (Telkom Indonesia)
Пазарна капитализација (млд. долари): 21
Главен раководител: Ангга Рака Прабово, претседател на повереници
Проценета промена на приходите за 2025 година: 3 отсто
Проценета продажба за 2026 година (млд. долари): 9,2
Правно име: „ПТ Телком Индонезија“ (PT Telkom Indonesia (Persero) Tbk.)

По падот на приходите од мобилните услуги во последните две години, индонезискиот оператор е подготвен за силно закрепнување во 2026 година. Под ново раководство, ги зголемува почетните цени, промовира пакети што комбинираат фиксни и мобилни телефонски планови и профитира од поголемата потрошувачка на податоци. Приходите од продажба на споредни средства, како работењето во велепродажба на пристап до оптички мрежи или комуникациски кули, исто така би можеле да помогнат во зголемувањето на дивидендите. – Крис Мукенстурм

48. Технологија: полупроводници
ТСМЦ (TSMC)
Пазарна капитализација (млд. долари): 1.200
Главен раководител: Ц.Ц. Веи
Проценета промена на приходите за 2025 година: 22 отсто
Проценета продажба за 2026 година (млд. долари): 147
Правно име: „Тајван семикондактор“ (Taiwan Semiconductor Manufacturing Co.)

Со оглед на силната побарувачка за ВИ-чипови и ограничената конкуренција во напредното производство, консензусните прогнози за профит за водечката светска фабрика за полупроводници изгледаат прениско. ТСМЦ, кој произведува ВИ-чипови за „Енвидија“ (Nvidia), „Бродком“ (Broadcom) и АМД (AMD), како и други процесори за долгогодишни клиенти како „Епл“ (Apple), е добро позициониран за зголемување на цените и маржите. – Чарлс Шум

49. Финансии: управување со инвестиции
„Воја“ (Voya Financial)
Пазарна капитализација (млд. долари): 6,7
Главен раководител: Хедер Лавали, извршна директорка
Проценета промена на приходите за 2025 година: 6 отсто
Проценета продажба за 2026 година (млд. долари): 8,2
Правно име: „Воја фајненшл“ (Voya Financial Inc.)

Прогнозите за заработката во 2026 година веројатно ќе продолжат да растат, потпомогнати од растот во сите сегменти од работењето на „Воја“. Нејзините програми за здравствено осигурување „стоп-лос“ (stop-loss), кои ги ограничуваат здравствените трошоци на работодавците, остваруваат корист од повисоките цени за обновување на полисите. Покрај тоа, одделот за пензиски и инвестициски услуги управува со имот на клиенти вреден повеќе од еден билион долари, што генерира дополнителни приходи. – Џефри Флин

50. Енергетика: транспорт на нафта и гас
„Вестерн мидстрим“ (Western Midstream)
Пазарна капитализација (млд. долари): 16
Главен раководител: Оскар Браун, претседател/извршен директор
Проценета промена на приходите за 2025 година: 11 отсто
Проценета продажба за 2026 година (млд. долари): 4,2
Правно име: „Вестерн мидстрим партнерс“ (Western Midstream Partners LP)

Паричниот тек кај операторот на нафтоводи, гасоводи и водоводи веројатно ќе биде подобар од очекуваното. Фокусот на „Вестерн мидстрим“ (Western Midstream) на собирање и преработка на природен гас од Пермскиот басен е клучен двигател на растот, иако индустријата е загрижена поради ниските цени на енергијата. Аквизицијата на „Ариса“ (Arisa), компанија што се занимава со загадена вода од нафтени и гасни дупчења, исто така би требало да поттикне раст и заштеди на трошоци. – Талон Кастер