Годината 2022 беше сè само не здодевна. Кога би морале да издвоиме една личност што оставила посебен белег во неа, за жал не по добро, тоа би бил рускиот претседател Владимир Путин. Неговиот напад врз Украина на крајот на февруари го поттикна економскиот домино-ефект поради кој денес сите знаеме за Володимир Зеленски.
Мора да ги истакнеме и централните банкари, кои до дивеењето на инфлацијата предизвикана од војната и енергетската криза спиеја во монетарен зимски сон. Најекспонирани на светската сцена во 2022 година дефинитивно беа американскиот централен банкар Џером Пауел и шефицата на Европската централна банка, Кристин Лагард. Сите тие влијаеја и на случувањата во регионот Адрија, но ги нема на нашата листа на ТОП 50 највлијателни луѓе во регионот, во рамките на првото издание на нашето печатено списание, Businessweek.
Листата се состои од луѓе кои ја одбележаа изминатата година, и тоа во многу попозитивен тон од глобалните инфлуенсери. Станува збор за навистина шаренолико друштво, меѓу кое се и некои многу познати лица од спортот и политиката, но и релативно непознати генијалци од светот на бизнисот и науката, кои го ставија регионот Адрија на светската мапа како место на неисцрпен извор на таленти.
Кој е на листата?
Од македонската Марсовка и српскиот математички гениј, преку босанската тинејџерка што го освојува светот на пливањето, па сè до тајни странски инвеститори - тоа е само дел од богатата листа на луѓе од овие простори кои оставиле свој посебен печат во 2022 година.
Во однос на бизнисот, минатата година кај нас најголемо внимание привлече Нина Ангеловска, која најави „револуција во регионалната онлајн трговија“. Во 2022-та, „Групер“ беше преземен од српската компанија „Ананас“, а 34-годишната Ангеловска речиси истовремено стана директорка за меѓународен развој.
Покрај неа, на листата се и лица од сферата на науката и музиката. Мартина Димоска на крајот на октомври 2022-та беше во Интегрираниот лунарно-марсовски аналоген центар на Универзитетот во Северна Дакота, кој е важен дел од „Мисијата на Марс“ на НАСА. Тука е и врвниот македонски пијанист, Симон Трпчевски, кој соработува со над 100 оркестри на четири континенти, а неговиот проект „Македонисимо“, кој ја популаризира македонската етномузика, силно одекна во десетици театри низ светот.
Критериуми
Како избравме ТОП 50 луѓе од регионот? Секоја регионална редакција - хрватската, српската, словенечката, босанската и македонската - номинираше свои кандидати во шест категории - бизнис, политика, финансии, наука и технологија, спорт и забава. Вкупно имаше над 120 номинирани. Потоа дојде гласањето. Листата ТОП 50 ги вклучува номинираните со најмногу гласови во сите редакции.
.webp){kind=icon}
