.webp){kind=icon}
Дејвид Бекам трпеше пораз по пораз во неговиот речиси децениски долг обид да го претвори Мајами во фудбалски град.
Сега, поранешната ѕвезда на Манчестер Јунајтед и Реал Мадрид има можност за голем пробив на ова поле: Благодарение на договорот кој вклучува милиони долари од „Епл“ (Apple Inc.) и „Адидас“ (Adidas AG), Бекам дојде до тоа да го убеди Лионел Меси да игра за неговиот тим Интер Мајами (Inter Miami). Она што е уште повпечатливо е што аргентинската суперѕвезда, наводно, одбива 400 милиони долари годишно од Саудиска Арабија за да се пресели во САД, нанесувајќи му удар на обидот на кралството да ги зајакне своите амбиции во сферата на спортот.
Бекам (48) со партнерите почна да работи за подигање на Интер Мајами во 2014 година. Тоа беше дел од договорот што го преговараше со америкатската Мејџор лиг сокер (МЛС) кога го напушти Реал Мадрид во 2007 година за да се приклучи на ЛА Галакси (LA Galaxy), што му даде право по пензионирањето да купи тим во МЛС за 25 милиони долари.
Интер Мајами вредеше 585 милиони долари на крајот на минатата година, според „Спортико“ (Sportico), што го прави 10-от највреден клуб во МЛС, врз основа на приходите и недвижниот имот. Додека Бекам има само малцински удел во франшизата, потенцијлното доаѓање на најпознатиот фудбалер во светот треба да ја зголеми нејзината вредност.
„Бекам беше голем, а Меси е поголем“, вели Стив Дејвис, фудбалски новинар и аналитичар на ФК Далас (FC Dallas). „Доаѓањето на Меси ќе додаде многу вредност на договорите со медиумите, клубовите, додава вредност во купувањето играчи. Ако Меси е таму, тоа ќе биде поголема мотивација и за други фудбалери да дојдат во лигата“.
Трансферот на Меси може да биде позначаен за американскиот фудбал дури и од периодот кога бразилската легенда Пеле излезе од пензија на 34 години и во 70-тите мина три сезони во Њујорк Космос (New York Cosmos).
За да ја оствари целта, Бекам има моќни сојузници. На Меси му нудат договори за споделување на профитот со „Адидас“ и „Епл“, објави „Атлетик“ (The Athletic), цитирајќи извори запознаени со ситуацијата. „Епл“, поттикнат од успехот на серијата на фудбалска тема „Тед Ласо“ (Ted Lasso), склучи 10-годишен договор од 2,5 милијарди долари со МЛС за прикажување на натпревари на својата ТВ+ (TV+) платформа. „Адидас“ се обидува да врати дел од значителниот пазарен удел што го загуби во САД од „Најки“ (Nike Inc.) додека се бори со пропаѓањето на својата франшиза „Јизи“ (Yeezy).
Доведувањето на Меси може да биде пресвртница за Бекам и Интер Мајами. Пред само неколку дена, клубот го отпушти својот главен тренер - поранешниот соиграч на Бекам, Фил Невил - бидејќи се наоѓа на дното на источната конференција на МЛС.
Клубот мина низа проблеми, при што две засебни понуди за изградба на стадиони на брегот беа одбиени од градот. Сопственоста, исто така се промени, оставајќи ги браќата милијардери Хорхе и Хозе Мас како главни акционери. Тие се сопственици на „Мастек“ (MasTec Inc), градежен изведувач вреден 8,6 милијарди долари, кој гради ветерници, канализациони системи и нафтоводи.
Бекам, кој беше капитен на Англија, ја освои тројната круна со Манчестер Јунајтед, играше извонредно за Реал Мадрид и изведуваше неверојатни слободни удари, го гледа Интер Мајами како дел од неговото фудбалско наследство.
Дејвид Бекам
Bloomberg
„Секако дека сакате да се споредувате со големите клубови финансиски и очигледно на теренот“, рече Бекам во интервју за Си-ен-би-си (CNBC) во 2020 година. „Сакаме нашите деца да се појават на стадионот по 10, 15, 20 години од сега и да кажат - ова го создаде нашиот татко“.
Дури и пред Меси, среќата на Интер Мајами почна да се менува. Мас и Бекам минатата година ги убедија градските власти на Мајами да се согласат со 99-годишен закуп за реконструкција на кантри клубот во градска сопственост, во приватно финансиран имот кој ќе вклучува фудбалски стадион, хотел, деловен парк, малопродажен простор и јавен парк.
Додека мега проектот за стадионот допрва треба да се реализира, Меси ќе дојде во актуелниот дом на Интер Мајами и во сосема поинаква средина од онаа што ја имаше во Барселона, клубот за кој играше уште од тинејџерските години, пред да се приклучи на Пари Сен Жермен (ПСЖ) во 2021 година. Дом на Интер Мајами е стадионот DRV PNK (се изговара Драјв пинк / Drive Pink) во Лодердејл, Флорида, што понекогаш го дели со Атлетското здружение на средните училиште во Флорида за организација на државни првенства.
Собира едвај 18.000 гледачи - во споредба со речиси 100.000 седишта на Камп Ноу во Барселона. Но можеби наскоро интересот во Мајами за овој спортот ќе ескалира.
„Нема подобра шанса да се развие љубовта кон МЛС од сега, бидејќи тие ќе имаат можност да го гледаат најдобриот играч на сите времиња во Мајами“, вели Дејвис.
