.webp){kind=icon}
Апликацијата Тредс (Threads) на компанијата „Мета“ (Meta) доживеа бум во првите неколку дена, надминувајќи 100 милиони корисници. По три недели од лансирањето на новата апликација, бројот на корисници достигна речиси 120 милиони, а се очекува да надмине 230 милиони следната година. Анализираме дали македонските граѓани и компании ги следат светските трендови на социјалните мрежи и дали новата апликација ќе им биде од корист на компаниите.
Колку користиме социјални мрежи?
Околу 1,15 милион корисници од Северна Македонија се регистрирани на некоја од социјалните мрежи. Од нив, 65 отсто активно користат барам еден вид социјална мрежа, покажуваат податоците на компанијата „Пикаса“, која преку својата онлајн платформа „Аналитикс лајв“ (Analytics.live) во реално време следи повеќе од 1.300 медиуми. На врвот на листата најкористена социјална мрежа останува Фејсбук, а најмалку се користи Твитер.
Сепак, ако се анализираат трендовите, иако Фејсбук и Инстаграм имаат најголем број корисници, од почетокот на годинава се забележува пад на во употребата. Тоа, според „Пикаса“, се должи на миграцијата на луѓето кон други мрежи, како Тикток, која се смета за најбрзорастечка апликација во земјава.
„Тредс е еден од најпребаруваните зборови на Гугл (Google) во изминатите недели“, вели Ивана Смиљанска, оперативна менаџерка во „Пикаса“. „Бидејќи станува збор за платформа што постои само три недели, не можеме да утврдиме колку корисници веќе се регистрирани, но можеме да кажеме дека оваа апликација е најсимнувана на мобилните уреди од страна на граѓаните во тој период“.
Им треба ли Тредс на компаниите?
Ивана Смиљанска/Приватна архива
За ова прашање се консултиравме со комуникологот Бојан Кордалов, кој е дециден дека без претходна анализа компаниите не треба да инвестираат во рекламирање и промоција на дигиталните канали. Иако сме дефинитивно една од нациите што се „најзависни“ од социјални медиуми, не секогаш рекламирањето на овие платформи дава плод. Секоја нова мрежа што станува популарна го менува пазарот, но и личните ставови на луѓето. „Бројките брзо се достигнаа, но, според некои статистики, растот во моментов е забавен, така што останува да се види како ќе се развива. Во секој случај, совет до компаниите и бизнисите е да направат анализа дали нивните целни групи се наоѓаат на таа мрежа и во согласност со тоа да решат дали имаат потреба да ангажираат дополнителни ресурси во овој дел“, вели Кордалов.
Бојан Кордалов/Приватна архива
Ви треба ли Тредс за работа?
Познавачите на социјалните теми имаат неколку совети за користење на новата апликација. Во овој момент се чини како одлична шанса за работодавците да ги видат вашите работни способности. Од друга страна, можете да се ребрендирате себеси, па наместо преземање на сите следбеници од вашиот инстаграм-профил, можете да создадете нова лична биографија, создавајќи нов профил на апликацијата Тредс, велат експертите за „Блумберг“.
