Сингапур и Цирих го надминаа Њујорк и станаа најскапите градови за живеење во светот оваа година, според новото глобално истражување.
Небесно високите трошоци за сопственост на автомобили, скапиот алкохол и зголемените цени на намирниците придонесоа Сингапур да избие пред американскиот град, со кој го делеше првото место минатата година, според извештајот за трошоците на животот во светот на „Економист интелиџенс јунит“ (Economist Intelligence Unit / EIU) за 2023 година.
Цирих скокна од шестото место минатата година и сега го споделува првото место, делумно благодарение на силниот швајцарски франк, како и скапите намирници, покуќнината и рекреацијата.
Женева е изедначена со Њујорк на третата позиција, а Хонгконг ја заокружува листата на првите пет најскапи места. Севкупно, глобалните цени пораснале во просек за 7,4 отсто на годишно ниво во локална валута, што е благо намалување во однос на минатогодишниот пораст од 8,1 отсто.
Кинеските градови се со најголеми осцилации во рангирањето, главно поради бавното закрепнување на земјата по пандемијата и намалената побарувачка на потрошувачите.
Други наоди од студијата се:
- Лос Анџелес (шесто место) и Сан Франциско (10) се единствените други американски градови кои се најдоа меѓу топ 10;
- Најевтин град остана сирискиот главен град Дамаск, и покрај тоа што неговата потрошувачка кошничка се зголеми за 321 отсто;
- Мексиканските Сантијаго де Керетаро и Агуаскалиентес го имаат најголемиот скок во рангирањето откако пезосот зајакна во однос на американскиот долар;
- Поради послабиот јапонски јен Токио падна за 23 места на 60. место, а Осака падна за 27 места и се рангираше на 70. место;
- Иако Тел Авив влезе во топ 10, истражувањето беше спроведено пред војната меѓу Израел и Хамас, која веројатно влијаеше на цените;
- Цените на комуналните услуги пораснаа најбавно меѓу 10-те анализирани категории на стоки и услуги, зголемувајќи се за 5,7 отсто.
„Шоковите од страната на понудата што доведоа до зголемување на цените во 2021-2022 година се намалија откако Кина ги укина ограничувањата за Ковид-19 кон крајот на 2022 година, додека скокот на цените на енергијата забележан по инвазијата на Русија во Украина во февруари 2022 година, исто така се намали“, рече Упасана Дут, раководителка на одделот за светски трошоци за живот на EIU. „И покрај нагорните ризици, очекуваме инфлацијата дополнително да се забави во 2024 година, намалувајќи ги цените на глобално ниво“.
Истражувањето беше спроведено помеѓу 14 август и 11 септември и спореди повеќе од 400 индивидуални цени во 173 градови на глобално ниво.
Ова e листатата на 10 најскапи градови во светот, во нивното рангирање за 2023 година. Некои градови се изедначени:
Сингапур - 1
Цирих - 1
Женева - 3
Њујорк - 3
Хонгконг - 5
Лос Анџелес - 6
Париз - 7
Копенхаген - 8
Тел Авив - 8
Сан Франциско - 10
.webp){kind=icon}
