text size
Истражувањето и развивањето на вештачката интелигенција ѝ донесоа тужба на компанијата „Опен еј-ај“ за прекршување на авторските права од страна на медиумската куќа „Њујорк тајмс“. Се чини дека фокус во 2024 година ќе биде развивањето на вештачката интелигенција, која зема сè поголем замав.
Добро утро! Ова се петте вести што треба да ги знаете на почетокот од денот.
Ќе го пробие ли биткоинот плафонот во 2024-та?
Годинава во криптосекторот имаше многу турбуленции, стечаи, парични и затворски казни. Oд судскиот процес против Сем Банкмен-Фрид поради скандалот со криптоберзата FTX, преку До Квон, коосновачот на „Тераформ лабс“, до казната за „Бајненс“ (Binance) за прекршување на законите во САД и падот на Чангпенг Жао.
За очекувањата во 2024 година во криптоиндустријата разговаравме со Александар Тасевски, соосновач на „Крипто хаус“ во Скопје и генерален секретар на криптоздружението „Кон месечината“, кој смета дека случаите како FTX и „Бајненс“ секако дека малку ќе го забават растот во криптоиндустријата, но, како што вели, на сите би требало да им биде јасно дека перспективата на криптото не е ставена под знак прашалник.
Хари Потер е магична алатка за истражување на вештачката интелигенција
Повеќе од две децении откако Џеј-Кеј Роулинг го запозна светот со универзум од магични суштества, забранети шуми и тинејџерски волшебници, Хари Потер повторно е во центарот на вниманието, иако во сосема друга сфера: истражување на вештачка интелигенција.
Сè поголем број истражувачи ги користат популарните книги за Хари Потер за да експериментираат со технологијата за генеративна вештачка интелигенција, наведувајќи го трајното влијание на книгите врз популарната култура и широкиот речник и сложените игри на зборови на нејзините страници. Оваа листа на студии и академски трудови во кои се споменува Хари Потер нуди преглед на најновите истражувања за вештачката интелигенција
Македонија низ букви и бројки за комотни бизнис-кројки
Еден краток поглед назад, за голем чекор напред. Од ден на ден, од недела на недела, од месец на месец ја испишавме цела 2023 година, трудејќи се да го обележиме секој важен настан во изминатите 365 дена. Анализиравме со релевантни соговорници и со помош на аналитичкиот тим на „Блумберг Адрија“, истражувавме на терминалот на „Блумберг“.
ББА-анализите открија незапирлив егзодус и минимален раст на вработеноста и дека сме поголеми од ЕУ во потенцијалот кај соларната енергија. Ги најдовме и најголемите подароци и наследства во македонски акции. Македонците што живеат во ЕУ, пак, за десет години пратиле дома над две милијарди евра. Додека Македонците со „тесла“ полесно стигнуваат до Франција отколку до Маврово, ама затоа ги „шијат“ Европејците по сопствени станови, а најдоа и рецепт за бесплатен престој во странство.
Светскиот „карневал на обврзници“ ги води до најдобрите два месеца досега
Глобалниот пазар на обврзници е на пат да ги забележи најдобрите два месеца во историјата, а главната причина е уверувањето на пазарот дека централните банки ќе ги намалат каматните стапки во 2024 година. Индексот Global Aggregate Total Return на „Блумберг“ порасна за речиси 10 отсто во ноември и декември, што е најдобро остварување од 1990 година, колку што се во тек податоците.
Додека обврзниците имаа малку послаб ден во четвртокот, стравувањата од рецесија продолжуваат да владеат на пазарите. Поради тоа, инвеститорите „трчаат“ во обврзници, обложувајќи се дека централните банки ќе мора да ги намалат стапките за да не го стимулираат економскиот раст.
Раст на каматите на кредитите и депозитите во ноември
Во ноември 2023 година, просечната каматна стапка на вкупните кредити изнесува 5,48 проценти и бележи минимално месечно намалување од 0,01 п.п., додека на годишно ниво е зголемена за 1,07 п.п., соопшти Народната банка. Оттаму додаваат дека просечната каматна стапка на вкупните депозити оствари месечен и годишен раст од 0,07 п.п. и 0,97 п.п., соодветно, и изнесува 1,74 процент.
Просечната каматна стапка на новоодобрените кредити на домаќинствата тој месец изнесува 5,35 проценти, што претставува месечен раст од 0,07 п.п. Растот се објаснува со зголемените каматни стапки на денарските кредити во странска валута (за 0,42 п.п.), каматните стапки на денарските кредити без валутна клаузула (за 0,16 п.п.), како и каматните стапки на кредитите со валутна клаузула (за 0,02 п.п.).
.webp){kind=icon}
