text size
„Њујорк тајмс“ (NYT) ги тужеше „Мајкрософт“ и „Опен еј-ај“ за користење на неговите медиумски содржини за развој на услуги за вештачка интелигенција, во знак на сè понапорната врска помеѓу медиумите и технологијата, која може да ја наруши медиумската индустрија.
Технолошките компании се потпираа на милиони написи заштитени со авторски права за да обучуваат четботови, како ЧетГПТ на „Опен еј-ај“, и други алатки за вештачка интелигенција, наводно предизвикувајќи милијарди долари законска и вистинска штета. Во тужбата поднесена во средата, „Њујорк тајмс“ не ги прецизира своите монетарни барања.
„Опен еј-ај“ се соочи со критики за широко преземање текст од интернет за да го обучи својот популарен четбот што дебитира пред една година. Иако и претходно беше тужен од истакнати автори, ова е прва тужба од голема медиумска организација. Стартапот бараше договори за лиценцирање со издавачите, слично како што направија „Гугл“ на „Алфабет“ и „Фејсбук“ на „Мета“ во последниве години, но „Тајмс“ во тужбата наведе дека издавачот контактирал со „Мајкрософт“ и со „Опен еј-ај“ во април и не бил во можност да постигне решение што ќе им овозможи на двете страни да бидат задоволни.
„Ги почитуваме правата на креаторите и сопствениците на содржини и посветени сме да работиме со нив за да се осигуриме дека тие имаат корист од технологијата за вештачка интелигенција и новите модели на приходи“, истакна портпаролот на „Опен еј-ај“ во соопштението. „Нашите тековни дискусии со медиумската куќа беа продуктивни и напредуваат конструктивно, па затоа сме изненадени и разочарани од ваквиот развој“. „Мајкрософт“ одби да коментира.
Depositphotos
Во јули „Опен еј-ај“ потпиша договор со „Асошиејтед прес“ за пристап до дел од архивите на новинската агенција. Во декември „Опен еј-ај“ склучи тригодишен договор со „Аксел Спрингер“ (Axel Springer SE) за користење на ресурсите на германската медиумска компанија за необјавена сума.
„Се надеваме дека ќе најдеме заемно корисен начин да работиме заедно, како што правиме со многу други издавачи“, рече во средата портпаролот на „Опен еј-ај“ .
„Опен еј-ај“ беше цел на повеќе тужби од производители на содржини, кои се жалеа дека нивните дела се користат неправилно за обука на вештачка интелигенција. Компанијата исто така се соочува со групни тужби од личности од областа на културата, како што се комичарката Сара Силверман и авторот на „Игра на тронови“, Џорџ Р.Р.
Случаите сè уште се во рана фаза, а нивното целосно решавање може да потрае со години. Судија од Сан Франциско во текот на месецов посочи дека ќе отфрли дел од тужбата на комичарката Силверман против „Опен еј-ај“. Судијата веќе отфрли дел од слична тужба, Силверман против „Мета“.
Bloomberg
Ново финансирање
„Опен еј-ај“ моментално преговара со инвеститорите за ново финансирање во вредност од 100 милијарди долари, што ќе го направи втор највреден стартап во САД, објави „Блумберг њуз“ минатата недела.
„Мајкрософт“ е најголемиот поддржувач на „Опен еј-ај“ и ги инкорпорираше алатките за вештачка интелигенција на стартапот во неколку свои производи. Во тужбата, „Њујорк тајмс“ тврдеше дека „Мајкрософт“ копирал написи од вести буквално за својот пребарувач Бинг и ја користел технологијата на „Опен еј-ај“ за да ја зголеми вредноста на компанијата за трилион долари.
Цената на акциите на „Мајкрософт“ се зголеми за 55 отсто откако ЧетГПТ дебитира во ноември 2022 година, зголемувајќи ја нејзината пазарна капитализација на 2,8 трилиони долари. Акциите беа малку променети во средата, затворајќи на 374,07 долари во Њујорк.
„Ако ’Мајкрософт’ и ’Опен еј-ај’ сакаат да ја користат нашата работа за комерцијални цели, законот бара од нив прво да добијат наша дозвола“, наведе портпаролот на „Њујорк тајмс“ во изјавата испратена по е-пошта.
.webp){kind=icon}
