Сакате ролекс „пепси“ или „бетмен“? Има голема разлика

Дали вашиот часовник добива или губи вредност? Бојата на неговата рамка - прстенот околу лицето на часовникот - може да биде пресудна.

Индексот Bloomberg Subdial Watch покажува дека два модела на „Ролекс“ (Rolex) се разликуваат по цена на секундарниот пазар, иако нивната единствена разлика е шемата на бои.

Цените за најновата верзија на ГМТ Мастер II (Rolex GMT Master II) со црвена и сина керамичка рамка, наречен „пепси“, се зголемија за 4,1 отсто на околу 21.000 долари во текот на изминатата година, според податоците од „Сабдајл“ (Subdial), платформа за тргување со часовници со седиште во Велика Британија. Во исто време, цените за часовникот познат како „бетмен“ - во суштина истиот модел, но со црно-сина рамка - се намалија за 10,1 отсто на околу 16.000 долари.

Двата часовника се продаваат за иста цена на мало - околу 10.700 долари - и ја имаат истата челична нараквица „ролекс ојстер“ (Rolex Oyster).

Разликата покажува како актуелноста на моделот и согледаниот недостаток може да влијаат на цените. Дилерите, колекционерите и медиумите во индустријата за часовници шпекулираа дека „пепси ГМТ“ (Pepsi GMT) може да биде укинат оваа година поради разговорите за производствените предизвици при изработката на црвено-сината рамка. Тоа не беше случај и моделот продолжува да биде во каталогот на „Ролекс“.

Со повеќе од 10 милијарди швајцарски франци (11,1 милијарди долари) годишна проценета продажба, „Ролекс“ со седиште во Женева е најголемиот швајцарски бренд за часовници, контролирајќи околу една третина од вкупниот пазар за премиум швајцарски часовници, според процените на банките, вклучувајќи ги РБЦ (RBC) и „Морган Стенли“ (Morgan Stanley). „Ролкес“ не ги открива бројките за производство за поединечни часовници или целокупно. Аналитичарите проценуваат дека брендот вкупно произведува околу 1,2 милиони часовници годишно.

„Ролекс“ гради нов производствен погон во швајцарскиот кантон Фрибург, кој треба да се отвори во 2029 година, кој ќе додаде капацитет на постоечките четири домашни производствени капацитети во Женева и Бил.

„Пепси“, која беше оригиналната боја на рамката кога ГМТ за првпат беше претставен во 50-тите, останува еден од најтешките часовници на „Ролекс“ за купување на мало од овластен продавач. Како и кај хронографот „дејтона“ (Daytona), побарувачката далеку ја надминува понудата, а клиентите можат да чекаат со месеци или години пред да добијат повик за продажба. „Ролекс“ го претстави „бетмен ГМТ“ во 2013 година.

Добивката од 4,1 отсто на „пепси“ за една година е во контраст со загубата од 5,7 отсто за индексот на цените на ролекс часовниците, изготвен од „Сабдајл“.