.webp){kind=icon}
Точно 1.615 барања за азил во Европската унија поднеле македонски граѓани во првата половина од годинава, што е повеќе отколку останатите земји од регионот Адрија (БиХ-610, Србија-1.475), покажуваат новите податоци на Евростат.
Од европската статистичка организација информираа дека само во јуни 2024 година, се евидентирани вкупно 70.375 азиланти (граѓани кои не се членки на ЕУ) кои прв пат поднеле барање за меѓународна заштита во земјите на ЕУ, што е намалување за 17 проценти во споредба со јуни 2023 година (84.730). Во јуни годинава се регистрани и 6.540 последователни апликанти, што претставува зголемување од шест проценти во споредба со јуни 2023 година (6.185).
Во јуни 2024 година, Сиријците се најголемата група на луѓе кои бараат азил (10.165 апликанти за прв пат). По нив следуваат Венецуелците (6.340) и Авганистанците (5.930).
Земји кои добиле најмногу барања за азил се Германија (16.770), Шпанија (14.855), Италија (11.685) и Франција (10.510), што претставува 76 проценти од сите лица кои прв пат поднеле апликација за азил во ЕУ.
„Во јуни 2024 година, вкупниот број на баратели на азил во ЕУ за прв пат беше 15,7 на сто илјади луѓе“, информира Евростат.
Во јуни 2024 година, 2.395 малолетници без придружба за прв пат поднеле барање за азил во ЕУ, а повеќето од нив потекнуваат од Сирија (675), Авганистан (405) и Египет (255). Земји од ЕУ кои добиле најголем број барања за азил од малолетници без придружба се Германија (725), Бугарија (300), Грција (290), Холандија (260) и Шпанија (255).
