Нафтата порасна втор ден по ред, што очекувано го зголеми ризикот поврзан со испораките на сурова нафта од Блискиот Исток. Глобалниот репер брент се искачи над 74 долари за барел, откако накратко порасна за повеќе од пет отсто во вторникот по иранскиот напад, а ВТИ (West Texas Intermediate) напредуваше до близу 71 долар.
Брентот за испорака во декември поскапе за 1,5 отсто, а ВТИ за ноември поскапе за 1,6 отсто. Иако Израел и Иран имаат несогласувања од избувнувањето на војната во Газа - претходните скокови на нафтата беа краткотрајни, бидејќи немаше намалување на производството. Според податоците на ОПЕК, Иран во август испумпувал околу 3,4 милиони барели дневно.
Во вторникот поскапеа и обврзниците, златото и американскиот долар, по последната во серијата ескалации на конфликтот во овој дел од светот. Сепак, веќе во средата златото се стабилизира и моментално вреди 2.670 долари за унца. Меѓу металите, паладиумот е единствен во зелено утрово.
Ова се светските настани во среда.
ПОЛИТИКА
Растат тензиите на Блискиот Исток
Иран истрела околу 200 балистички проектили врз Израел во вторникот, како дополнителна ескалација на конфликтот на Блискиот Исток. Израелските одбранбени сили соопштија дека поголемиот број ракети биле пресретнати, а првичните извештаи покажаа дека едно лице загинало на Западниот Брег. Нападот беше извршен како одмазда за серијата израелски напади врз Либан, во кои, меѓу другото, беше убиен и лидерот на Хезболах, Хасан Насрала.
Патем, израелскиот воздушен напад во кој беше убиен Насрала во бункер во Бејрут - беше кулминација на една од најсмртоносните целни воени кампањи во модерната историја.
Потсетуваме дека ескалацијата на конфликтот на Блискиот Исток ги избрка инвеститорите во САД од ризичните средства, а во видеото погледнете што вели американскиот претседател Џо Бајден за иранскиот напад.
Во САД потпретседателска дебата меѓу Волц и Венс
Заврши ТВ-дебатата на кандидатите за потпретседател на САД. Тим Волц и Џеј Ди Венс за време на првата дебата ги судрија мислењата за низа прашања - од економијата и надворешната политика до кризата на Блискиот Исток, но и за правата на абортусот. Заклучокот, пак, е дека и двајцата кандидати ги исполниле очекувањата и дека не направиле некој поголем гаф што би можел да го загрози рејтингот на нивната партија.
Волц, демократскиот кандидат, ја започна дебатата со остра критика кон Доналд Трамп, велејќи дека многу советници на поранешниот претседател се сомневаат во соодветноста на Трамп за претседателската функција. По тоа, Венс постојано ја критикуваше демократската кандидатка Камала Харис, тврдејќи дека во изминатите четири години требало да стори повеќе за да го реши хаосот во странство, но и состојбата на економијата што се бори да излезе од пандемискиот период.
БЕРЗА
Европа
Фјучерсите на европските акции се тргуваа главно во минус во средата наутро. Со загуби вчерашното тргување го затворија и европските берзи, иако последните податоци покажаа дека инфлацијата во еврозоната минатиот месец се намали на 1,8 отсто, што е под целта на Европската централна банка (ЕЦБ).
Претседателката на ЕЦБ, Кристин Лагард, во понеделникот ја навести можноста за олабавување на монетарната политика, велејќи им на пратениците на ЕУ дека официјалните лица ќе го земат предвид зголемениот оптимизам во контекст на потрошувачките цени кога ќе ја носат својата следна одлука на 17 октомври.
Bloomberg
САД
Во исто време, фјучерсите на американските индекси се тргуваат мешано. Вредноста на американските акции падна вчера, по новата ескалација на конфликтот на Блискиот Исток. Како резултат на тоа, инвеститорите бараа сигурни засолништа, па поризичните класи на средства се тргуваа во црвено. Нафтата и златото многу брзо поскапеа.
На крајот од тргувањето во вторникот, берзанскиот индекс S&P 500 беше послаб за 0,93 отсто, Dow Jones Industrial Average за 0,41, додека технолошкиот Nasdaq 100 падна за 1,43 отсто. Акциите на „Епл“ (Apple) и на „Енвидија“ (Nvidia) паднаа за повеќе од три проценти.
Азија
Акциите во азиско-пацифичкиот регион исто така се тргуваат мешано. Акциите во Хонгконг се во зелено, откако кинеските стимулативни мерки продолжија да имаат позитивен ефект врз инвеститорите. Од друга страна, акциите во Јапонија и во Јужна Кореја паднаа, откако Иран истрела серија проектили кон Израел. Израелските одбранбени сили соопштија дека многу од ракетите биле пресретнати, додека премиерот Бенјамин Нетанјаху вети одмазда.
КОМПАНИИ
Општата распродажба на акциите ги погоди и технолошките компании, поради што акциите на „Епл“ во вторникот паднаа за речиси три отсто. Поточно, инвеститорите продолжуваат да ги анализираат прелиминарните податоци за побарувачката за најновиот ајфон 16 (iPhone 16), за кој се надеваат дека ќе придонесе за раст на приходите на компанијата. „Епл“ исто така се подготвува да претстави нов поевтин телефон на почетокот на следната година, заедно со надградените ајпади.
.webp){kind=icon}
