По вчерашната кривична пријава поднесена од страна на МВР против бизнисменот Фатмир Етеми во која е наведено дека тој користел инсајдерски информации за да купи акции на банка од Скопје, денеска со реакција се огласи и самиот Етеми.
„Сакам да ја информирам јавноста дека станува збор за погрешно утврдена фактичка состојба со која надлежните институции и граѓаните се доведени во заблуда, а на мене лично ми е нанесена штета и нарушен угледот кој го градам години наназад во бизнис секторот“, се наведува на почетокот од реакцијата.
За појаснување, кривичното дело за кое се товари Етеми е „Измама при работењето со хартии од вредност и удели“ по член 275, став 3 од Кривичниот законик.
„Пријавениот во својство на член на Надзорен одбор на банка од Скопје, злоупотребил внатрешна информација која се однесува на висината на дивидендата за 2023 година, која како член на надзорен одбор ја дознал во текот на 2024 година. На тој начин користејќи ja ценовно чувствителната информација истиот се стекнал со 500 обични акции...“, се наведува во вчерашното соопштение од МВР.
Според МВР, нелегално добиените информации Етеми ги споделил и на трети лица, поточно на членови на негово потесно семејство и на тој начин тие купиле 701 акција на банката.
„Односно за акциите биле вкупно платени 11.520.967,00 денари, а овозможило да се стекнат со вкупна корист од 639.000,00 по основ на ценовната промена на акцијата како и вкупно 646.100,00 денари по основ на дивиденда“, посочија од надлежното министерство.
Според Етеми, пак, станува збор за неточни информации пласирани во јавноста кои имаат цел, како што вели, да го моделираат јавното мислење и однапред да креираат атмосфера на линч.
„Сакам јасно да кажам дека нема апсолутно никаков основ за злоупотреба на внатрешни информации која се однесува со висината на дивидендата за 2023 година, бидејќи моето стекнување на 500 акции е речиси еден месец подоцна, од кога висината на дивидендата за 2023 година е јавно објавена за целата јавност на СЕИ Нет, Систем за електронски информации за котирани акционерски друштва на Македонска берза за хартии од вредност“.
Бизнисменот во реакцијата посочува дека висината на дивидендата била јавно објавена на СЕИ Нет на 30.01.2024 во Програмата за мерки и активности на деловната политика и Финансиски план за 2024 година на банката, додека, како што вели, неговото стекнување на акции е на крајот од месец февруари 2024-та.
„Дополнително и напротив од тврдењата дека акциите се стекнати по пониска цена, сакам да истакнам дека моето лично купување и купување на лица од моето потесно семејство е по далеку повисоки цени од берзанските цени кои биле во периодот после објавувањето на висината на дивидендата која е објавена во Финансиски план за 2024 година на банката, сè до моето стекнување на акции на крајот од месец февруари 2024. Во овој меѓу период вкупно од страна на останати инвеститори и лица се стекнале и се истргувале повеќе од 17.000 акции од банката кои се количини на акции далеку поголеми и цени далеку пониски од моето стекнување на 500 акции на крајот од месец февруари“, објаснува Етеми.
Тој додава дека неговото лично стекување на акции и купувањето на лица од неговото потесно семејство е извршено во редовно класично тргување по цени кои биле берзански и пазарни на денот на купувањето, врз основа на побарувачката и понудата на редовниот пазар на Македонската берза.
„Не е основано ниту тврдењето дека имам прибавено некаква противправна имотна корист со купувањето на акциите оваа година, бидејќи акциите кои ги купувам лично и акциите кои ги купува моето потесно семејство се купуваат континуирано и сукцесивно во изминатите 5-6 годни, истите акции се купуваат стратешки и долгорочно и немам извршено никаква продажба на акции за да имам остварено некаква противправна имотна корист за мене или за моето семејство“, се истакнува во реакцијата во која Етеми изразува уверување дека институциите ќе бидат на ниво на задачата и како што вели, нема да подлегнат на притисоците и ќе одлучуваат исклучиво врз база на законите и прописите во земјата.