.webp){kind=icon}
Американскиот претседател Џо Бајден размислува за посетата на Израел во моменти кога предупреди против долгорочна израелска окупација на Појасот Газа, додека Белата куќа се обидува да ја балансира поддршката за земјата со стравувања дека регионалната криза може да ескалира.
Според две лица запознаени со ситуацијата, сè уште не е донесена одлука дали да се патува во Израел. Портпаролот на Националниот совет за безбедност рече дека Белата куќа нема што да објави во однос на патување.
Но, можното патување - и признавањето на загриженоста изразена од Палестинците во Газа и арапските лидери ширум регионот - се последниот сигнал дека САД се обидуваат да ја спречат кризата од понатамошна ескалација. Американскиот државен секретар Антони Блинкен непланирано ќе се врати во Израел в понеделник по разговорите со арапските претставници, откако претставници на администрацијата го предупредија Иран во однос на каква било вмешаност.
Бајден го истакна своето уверување дека Израел ќе постапи според правилата на војната и дека невините цивили ќе имаат пристап до лекови, храна и вода во интервју за „60 минути“ на Си-би-ес (CBS News). Тој рече дека не верува оти Израел треба долгорочно да ја контролира територијата, велејќи дека наместо тоа, територијата треба да биде управувана од „палестинска власт“.
„Мислам дека тоа би било голема грешка“, рече Бајден. „Погледнете, она што се случи во Газа, според мене, е Хамас, а екстремните елементи на Хамас не го претставуваат целиот палестински народ“.
Интервјуто, кое беше емитувано во неделата навечер, дојде додека израелските одбранбени сили подготвуваат копнена инвазија на Газа, што предизвика стотици илјади жители да избегаат на југ. Масовната миграција предизвика загриженост за хуманитарна криза, а палестинските власти соопштија дека повеќе од 2.600 луѓе во Газа се убиени.
Доколку Бајден ја прифати поканата на премиерот Бенјамин Нетанјаху - упатена во телефонски разговор во саботата - тоа може да сигнализира солидарност по смртоносниот напад на Хамас. Тоа, исто така, може да помогне да се забрзаат регионалните напори за ограничување на опсегот на конфликтот и обезбедување хуманитарна помош.
Наруштена врска
Американскиот претседател и израелскиот лидер последен пат се сретнаа во септември за време на состаноците на Обединетите нации во Њујорк. Нивниот однос годинава е нарушен поради напорите на Нетанјаху да ја одземе моќта од судската власт на Израел.
Блинкен треба да се врати во Израел в понеделник по средбите со саудиските и египетските лидери, а „Аксиос“ објави дека египетскиот претседател Абдел Фатах Ел-Сиси, исто така, го поканил Бајден на меѓународна конференција во врска со конфликтот. Палестинските и израелските лидери го притискаа Египет да помогне во посредувањето во конфликтот, а САД ја повикаа земјата да го отвори граничниот премин Рафах.
Советникот за национална безбедност на Белата куќа, Џејк Саливан, исто така во неделата рече дека САД зад сцената водат разговори со иранските лидери за да ги предупредат за ескалација. Тој рече дека САД не можат да ја исклучат можноста Иран да интервенира или директно или преку Хезболах, милицијата со седиште во Либан, која е под негова закрила.
Во своето интервју, Бајден рече дека неговиот тим разговарал за воспоставување безбедна зона за жителите на Газа и разговарал со египетската влада за помош во извлекувањето на жените и децата од зоната на конфликтот.
„Израелците ќе направат сѐ што е во нивна моќ за да избегнат убиства на невини цивили“, рече Бајден.
Тој рече дека Израел треба да одговори по првичниот напад на Хамас во кој загинаа најмалку 1.300 луѓе - вклучувајќи 30 Американци - и остави илјадници други повредени.
Бајден во интервјуто повтори дека не гледа причина американските трупи директно да интервенираат во ситуацијата, иако ги притисна пратениците да обезбедат дополнителна воена помош за Израел и Украина. Бајден рече дека дисфункционалноста на Капитол Хил - каде републиканците во Претставничкиот дом повеќе од една недела не можат да изберат нов спикер што ќе го замени Кевин Мекарти - ја зголемува опасноста во светот.
