Унгарија соопшти дека зела заем од една милијарда евра од Кина во април, додавајќи дека таквото финансирање веројатно ќе стане пошироко во иднина, бидејќи економските врски со азиската нација ќе растат.
Владата доби тригодишен заем од Кинеската развојна банка, „Експорт-импорт банк“ на Кина и унгарската филијала на Банката на Кина, соопшти во четвртокот Агенцијата за управување со долг, без да даде детали зошто не е објавено официјално соопштение досега. Според агенцијата, заемот ќе помогне во финансирањето инфраструктурни, транспортни и енергетски проекти. Унгарија претходно зеде заем од 917 милиони долари во 2022 година од „Експорт-импорт банка“ за финансирање на железничкиот проект Белград-Будимпешта, дел од Кинеската иницијатива „Појас и пат“, покажуваат податоците на агенцијата.
Последниот заем дојде непосредно пред кинескиот претседател Шји Џјинпинг да ја посети Будимпешта во мај за да потпише договори со унгарскиот премиер Виктор Орбан за нови железнички и енергетски проекти. Тие ќе изнесуваат меѓу 5 и 10 милијарди евра, обично финансирани со заеми, рече тогаш министерот за економија Мартон Наѓ. Само планираниот железнички коридор околу Будимпешта, за поврзување на новите кинески фабрики за возила и батерии во Унгарија со Западна Европа, ќе изнесува неколку милијарди евра, рече Наѓ за време на посетата на Шји.
Кинески производи
„На кинеските компании им треба помош за транспорт на нивните стоки“, рече Наѓ во интервју за „Инфорадио“ во четвртокот. „Кога унгарската држава ќе направи инфраструктурни подобрувања, може да очекува кинеско финансирање бидејќи кинеските стоки ќе патуваат по железницата и автопатиштата“.
Покрај продлабочените економски врски со Кина, Орбан месецов ги вознемири западните сојузници со интензивирањето на дипломатските врски со Шји и рускиот претседател Владимир Путин во самонаречената „мировна мисија“.
Премиерот исто така започна со скапи проекти, како што е купувањето на аеродромот во Будимпешта, во време кога голем дел од финансирањето на Унгарија од Европската Унија останува суспендиран. Сепак, покрај новите кинески заеми, Унгарија продолжи да се потпира на продажба на меѓународни обврзници во долари и евра, како и на домашниот малопродажен долг, за да го финансира својот зголемен буџетски дефицит.
Податоците за бруто-домашниот производ што ќе бидат објавени следната недела ќе покажат дека индустрискиот извоз во Западна Европа сè уште ја кочи економијата, рече Наѓ во интервјуто за „Инфорадио“.
.webp){kind=icon}
