Израел го прогласи генералниот секретар на ОН за персона нон грата

Израел го прогласи шефот на Обединетите нации (ОН), Антонио Гутереш, за персона нон грата, обвинувајќи го дека не го осудил конкретно ракетниот напад на Иран врз Израел.

„Секој што не може недвосмислено да го осуди грозоморниот напад на Иран врз Израел не заслужува да стапне на израелска почва“, изјави министерот за надворешни работи,Израел Кац.

„Ова е антиизраелски генерален секретар, кој им дава поддршка на терористите, силувачите и убијците“, додаде тој.

Кац нагласи дека Гутереш, за кого рече дека ги поддржува „убијците од Хамас, Хезболах, Хутите и сега Иран, татковината на глобалниот терор, ќе биде запаметен како дамка во историјата на ОН за генерациите што доаѓаат“.

По ракетниот напад на Иран врз Израел доцна во вторникот, Гутереш го осуди „проширениот конфликт на Блискиот Исток“, критикувајќи ја ситуацијата на „ескалација по ескалација“ во регионот.

„Ова мора да престане. Апсолутно ни треба прекин на огнот“, рече Гутереш.

Израел е остар критичар на ОН, а врските меѓу државата и меѓународната организација уште повеќе се влошија по нападите на Хамас на 7 октомври.

Гутереш постојано повикуваше на прекин на огнот за да се запрат борбите и во Газа и во Либан.