Регрес за годишен одмор: Девет македонски работници добиваат колку еден Словенец

Со истекот на првата половина од годината, почнува сезоната на исплата на К-15 или регресот за годишен одмор. Регулативата предвидува овој надоместок, кој се поврзува со правото на користење годишен одмор, да се исплати на секој работник кој работел 6 месеци во тековната година кај ист работодавец.

Најнискиот износ кој мора да легне на сметката на секој работник изнесува 40 отсто од просечната исплатена нето-плата на државно ниво во последните три месеци. Ова значи дека работниците што го добиваат овој надоместок во јули ќе добијат најмалку 19.115 денари.

Најнискиот задолжителен износ се менува секој месец, како што се менува просечната плата. Па така, исплатата во јули годинава е за над 1300 денари поголема од јули лани. Крајниот рок за исплата на К-15 е 31 декември. Вообичаено, работниците што добиваат К-15 пред Нова година земаат поголем надоместок.

За исплатениот регрес на годишен одмор компаниите не плаќаат придонеси туку само персонален данок на доход во висина од 10 отсто.

Која е горната граница за К-15?

Горната граница за исплата на регресот за годишен одмор не е дефинирана, но дефинирани се давачките кон државата. Максималниот износ кој компаниите можат да го платат на своите вработени во јули, без дополнителни давачки, изнесува 80 отсто од последните три просечни плати.

Просечната исплатена плата во периодот од февруари до април годинава, според вчерашното соопштение на Државниот завод за статистика, изнесува 47.788 денари, што значи дека највисокиот износ во јули може да изнесува 38.230 денари по вработен.

Се разбира дека работодавците можат и повеќе да го одврзат паричникот, но секоја исплата над 80 отсто од нето платата е непризнат расход и за него се плаќа данок на добивка.

Колку К-15 добиваат работниците во земјите од регионот?

Србија - износот не е регулиран

Според српското законодавство регресот за годишен одмор не се смета за бонус, туку за право на вработениот и обврска на работодавецот, но законот не пропишува точен износ кој треба да се исплати туку тоа се уредува со општ акт и договор за работа.

Исплатата на овој надоместок во земјата се даночи со персонален данок, а за него се плаќаат и придонеси што значи дека се третира како примање на вработениот во рамките на пресметката на платата.

Законот не пропишува ни кога мора да се исплати надоместокот. Работодавците користат повеќе опции за исплата: еднократно, на повеќе делови, или заедно со некоја од месечните плати.

 

Хрватска - не е законска обврска

Во Хрватска компаниите најчесто исплатуваат регрес за годишен одмор иако тоа право не произлегува од Законот за работни односи.  Хрватската регулатива овој надоместок го става во рамките на таканаречените пригодни награди кои ги добиваат вработените, а меѓу нив се и надоместоците за празниците Божиќ или Велигден.

Сепак, постои законски лимит колку може да изнесуваат овие награди, а притоа да не подлежат на давачки кон државата. Лимитот изнесува 700 евра. Ако вкупниот износ на пригодните награди исплатени во текот на календарската година надмине 700 евра, на разликата се плаќаат и персонален данок и придонеси. Не е пропишано кога треба да се исплати, ниту начинот на плаќање.

Босна и Херцеговина - различни правила во различни ентитети

Република Српска и Федерација БиХ се разликуваат во однос на регулацијата на исплатата на надоместот за годишен одмор.

Во Федерацијата тој не е законска обврска, но ако прашањето е регулирано со колективен договор, правилник за работа или договор за работа тогаш станува задолжителен во моментот кога работникот исполнува услови за користење годишен одмор.

Исплатата на регрес до 50 отсто од просечната нето-плата за последните три месеци не подлежи на давачки. Исплатата може да се врши одеднаш или во делови.  

Во Република Српска законски е предвидена исплатата на регрес, а висината се утврдува со колективните договори по дејности.

Словенија - од 1.400 до 2.800 евра

Рокот на исплата на регрес за годишен одмор во Словенија е 1 јули. Само ако фирмата докаже дека има финансиски потешкотии, исплатата може да ја одложи до 1 ноември. Исплатата на регресот е едно од клучните права на словенечките работници. Минималниот износ за регрес за годишен одмор изнесува колку месечна минимална плата или 1481,88 евра.

За јавниот сектор е утврдено дека надоместокот изнесува минимална плата плус 10 отсто или 1.630 евра и мора да се исплати најдоцна со априлската плата. Годинава словенечките административци добија 288 евра повеќе во однос на лани.

Компаниите од приватниот сектор пак, кога го пресметуваат регресот најчесто ја користат горната граница за која не се плаќаат давачки. Таа граница е последната просечна исплатена бруто плата. Со оглед на тоа дека рокот за исплата во оваа земја истекува идната недела, обврската во најголем дел од компаниите е исполнета. Компаниите кои дадоа регрес на почетокот на годината можеа да платат и до 2.791 евра без дополнителни давачки.