Извршниот одбор на Народната банка на Србија на вчерашната седница донесе одлука за воведување две нови валути на листата валути со кои се тргува на српскиот девизен пазар. Станува збор за валутата на Обединетите Арапски Емирати - дирхам и за македонскиот денар. Истовремено, валутата на Република Хрватска - куна се брише од листата на валути со кои се тргува на девизниот пазар на Република Србија.
Одлуката ќе стапи во сила од 1 ноември 2022 година, освен одредбите за бришење на хрватската куна од листата на валути со кои се тргува на домашниот девизен пазар, која ќе стапи во сила на 1 јануари 2023 година, кога Р. Хрватска ќе влезе во еврозоната.
„При донесувањето на одлуката за воведување на дирхам на листата на валути со кои се тргува на домашниот девизен пазар, Народната банка на Србија се водеше од специфичните потреби на стопанските субјекти и потенцијалот на економската и другите форми на соработка, имајќи го предвид значењето што би го имало воведувањето на дирхам на оваа листа за понатамошната соработка на нашите две земји, пред се во смисла на дополнителни капацитети за инвестирање и работење на домашните компании и компании од Обединетите Арапски Емирати, како и за промоција на нашата земја во Обединетите Арапски Емирати“, соопшти НБС.
Оттаму додаваат дека при донесувањето на одлуката за вклучување на македонскиот денар во листата на валути со кои се тргува на домашниот девизен пазар, Народната банка на Србија се водела од развиените економски и други форми на соработка меѓу двете земји, како и потенцијалот за понатамошен развој на оваа соработка, особено по започнувањето на иницијативата „Отворен Балкан“.
„Бидејќи оваа иницијатива претставува одговор на барањата на економијата и реалниот сектор и поддршка на постоечките регионални иницијативи, воведувањето на македонскиот денар во листата на валути со кои може да се тргува во Република Србија треба да го олесни постигнувањето на дефинираните цели на иницијативата“, велат од НБС.
Одлуката за бришење на хрватската куна од листата на валути со кои се тргува на домашниот девизен пазар е донесена имајќи го предвид влезот на Република Хрватска во еврозоната на 1 јануари 2023 година, со што нејзината национална валута се заменува со евро.
„Со влегувањето во сила на Одлуката, од 1 ноември 2022 година, Народната банка на Србија ќе започне со објавување на курсната листа за официјалниот среден курс на динарот и курсната листа за девизи, во која ќе биде вклучен и курсот на динарот во однос на дирхамот и македонскиот денар, додека курсот на динарот во однос на хрватската куна ќе биде исклучен од 1 јануари 2023 година. Според тоа, граѓаните до крајот на 2022 година ќе можат да ја менуваат хрватската куна за динари во менувачниците и банките во Република Србија, а потоа размената ќе биде можна само во одредени институции во Република Хрватска“, информираат од НБС.
.webp){kind=icon}
