Стапката на базична инфлација во Србија во септември порасна за 0,7 проценти во однос на претходниот месец, достигнувајќи 8,6 отсто и надминувајќи ги проекциите на Народната банка на Србија (НБС), од каде што наведоа дека врвот на базичната инфлација ќе изнесува околу 7 отсто.
Стапката на раст на цените по исклучување на храната, енергијата, алкохолот и цигарите се зголеми веќе дванаесетти месец по ред и достигна највисока вредност од октомври 2009 година. За растот на цените најмногу придонесуваат храната и енергенсите, исто како и до сега.
„Сепак, базичната инфлација во Србија продолжува да се движи на значајно ниско ниво и во однос на вкупната инфлација и во однос на базичната инфлација во споредба со некои од земјите од Централна и Источна Европа. Ниското ниво на базична инфлација продолжува да придонесува за зачувување на релативната стабилност на девизниот курс во исклучително неизвесни глобални услови“, се наведува во соопштението од НБС.
Од октомври олеснувања
Од централната банка на Србија предвидуваат дека септемвриските стапки на инфлација се всушност максимумот што растот на цените ќе го достигне, како и дека во следните месеци може да се очекува постепено забавување на растот на цените.
„Во насока на смирување на инфлаторните притисоци, покрај досегашното заострување на монетарните услови, ќе делува и очекуваното слабеење на светските фактори кои го предводеа растот на цените на енергенсите и храната во претходниот период, како и пониската екстерна побарувачка во услови на неповолни прогнози за светскиот економски раст“, додаваат од НБС.
НБС ги зголемува каматните стапки
Годишната стапка на вкупна инфлација во Србија, исто така, константно расте од август 2021 година, а во мај годинава за прв пат стана двоцифрена. Со цел растот на цените да го сведе на посакуваното ниво меѓу 1,5 и 4,5 отсто, Народната банка на Србија во април годинава почна да ги зголемува каматните стапки.
Цените на задолжување до сега пораснаа седум пати за вкупно 3 проценти. Референтната каматна стапка моментално изнесува 4 отсто, а следниот состанок на Извршниот одбор на централната банка, на кој што ќе се одлучува за натамоните чекори во монетарната политика, ќе се одржи на 10 ноември.
.webp){kind=icon}
