„Економскиот раст во сите земји од регионот Адрија значително ќе се влоши во 2023 година“, истакна Иван Одрчиќ, шеф за макроекономија и анализа на пазарот на капитал во „Блумберг Адрија“, а како главни „виновници“ за таквите движења ги посочи нарушената лична потрошувачка и влошувањето на извозот.
„Личната потрошувачка следната година, исто како и оваа, ќе биде под влијание на високи стапки на инфлација, што ќе има многу неповолно влијание врз реалната куповна моќ на граѓаните. Извозните стапки ќе бидат под големо влијание на помалите нарачки од главните трговски партнери, пред сè од Германија како економски мотор не само на Европа туку и на овој регион“, објасни Одрчиќ.
Тој рече дека има и трет фактор што ќе придонесе негативно за забавување на БДП на земјите од регионот, а тоа се инвестициите.
„Следната година тие ќе бидат под уште поголемо влијание на сè поскапото и недостапно финансирање, најмногу поради зголемувањето на каматните стапки, а намалената побарувачка исто така ќе има негативно влијание врз нивното движење“.
Што се однесува до инфлацијата, според Одрчиќ, таа и следната година ќе биде изненадувачки висока.
„Очигледно, домашната побарувачка е сè уште многу силна. На пример, цените на храната паѓаат на глобално ниво веќе неколку месеци, но ние не го гледаме тоа во податоците за инфлацијата. Некои производители очигледно досега го имаат вградено целото зголемување на влезните трошоци во цените по кои им продаваат на трговците на мало, но има и големи производители на храна што сè уште не ги пренеле сите трошоци од првиот бран поскапувања“, објасни тој, осврнувајќи се и на цените на енергентите.
„Тие се еден од најважните двигатели на високите стапки на раст на цените во текот на годинава и има силна индикација дека таквиот тренд ќе продолжи. На пример, поради одмрзнувањето на административно регулираните цени во текот на пролетта“, рече Одрчиќ, додавајќи дека се очекуваат нешто пониски стапки на инфлација поради базниот ефект.
Тој прогнозира дека монетарното затегнување ќе продолжи до пролет, по што каматните стапки ќе останат високи, а пазарот нестабилен.
.webp){kind=icon}
Во моментов нема коментари за веста. Биди прв да коментира...