За да го ублажи растот на цените на горивата, хрватската владата денека ги намали акцизите за горивото и ги ограничи маржите на трговците на мало и на дистрибутерите.
Премиерот Андреј Пленковиќ на прес-конференција информира дека донеле одлука за измена на уредбата за висината на акцизите за енергенсите и електрична енергија и уредбата за утврдување највисоки малопродажни цени на нафтените деривати.
Со оваа одлука акцизите на бензинот се намалуваат за дополнителни 40 липи (0,053 евро) по литар, вкупно 80 липи (0,11 евро), а на дизелот за дополнителни 20 липи (0,027 евро), што е вкупно 40 липи (0,053 евро). Маржата на трговците со нафтени деривати на бензин, дизел и син дизел е намалена за дополнителни 10 липи (0,013 евро), јави „Хина“.
Сето ова, според очекувањата на Владата, од среда благо ќе ги намали цените на горивата на бензинските пумпи, додека утре од правни причини цените ќе останат исти.
„Досега ги намаливме акцизите од 3,86 куни (0,51 eвро) за литар на 3,06 куни (0,41 евро) за литар за бензин и од 3,06 куни (0,41 евро) на 2,66 куни (0,35 евро) за литар дизел гориво, што значи 80, односно 40 липи за литар“, рече Пленковиќ, потсетувајќи дека за синиот дизел нема акциза.
Премиерот најави и дека со новата уредба се воведува пресметковен период од 14 дена, односно цените на нафтените деривати ќе се менуваат на секои 14 дена.
Регулативата за акциза ќе биде во сила еден месец, по што ќе се преоценува состојбата.
Премиерот посочи и дека со уредбата дополнително се ограничува маржата за производителите и дистрибутерите, за дополнителни 10 липи.
„Трошоците за владините мерки за ублажување на зголемените цени на горивото се проценуваат на 130 милиони куни месечно (17.283.037 евра)“, рече Пленковиќ, додавајќи дека сите, вклучително и трговците на мало и дистрибутерите, треба да се прилагодат на новите околности.
Во моментот, на повеќето бензински пумпи во Хрватска, литар основен бензин Еуросупер 95 се продава за 13,86 куни (1,84 евро), додека литар основен еуродизел чини 13,14 куни (1,75 евро).
.webp){kind=icon}
