.webp){kind=icon}
Словенија започна со процена на човечките и економските загуби предизвикани од поплавите, кои по рекордните врнежи во Централна Европа погодија делови од оваа алпска земја, во која живеат 2,1 милиони луѓе.
Најмалку шест лица загинаа, а илјадници беа принудени да ги напуштат своите домови поради, како што рече словенечкиот премиер Роберт Голоб, „најлошата природна катастрофа во поновата историја на Словенија“. „Словенија ќе мора за реконструкцијата да направи ребаланс на буџетот“, изјави Голоб во понеделникот за државната телевизија РТВ Словенија и додаде: „Денес ја мериме штетата во милијарди“, што значително ја надминува неговата прва процена од 500 милиони евра, која ја даде викендов.
Откако почнаа да паѓаат обилни дождови, акциите на најголемите словенечки осигурителни компании „Триглав осигурување“ и „Сава Ре“ од четвртокот паднаа за повеќе од девет отсто.
Bloomberg
Од поплавите што ги зафатија и соседните Хрватска, Австрија и Унгарија, најмногу настрада Словенија. Во текот на викендот владата во Љубљана презеде чекори за забрзување на испораката на помош во најпогодените области и има намера да побара помош од Европската Унија.
Како што доаѓаа понудите за помош, Голоб во петокот им рече на новинарите дека поплавите „веројатно ќе предизвикаат најголема штета од природни катастрофи во историјата на независна Словенија“, мислејќи на одвојувањето на земјата од Југославија во 1991 година.
