Потезите на американскиот претседател Доналд Трамп ја обележија неделата што изминува. Во текот на викендот тој објави дека САД воведуваат царини кон Канада и Мексико од 25 отсто и 10 отсто кон Кина. Тој најави дека „апсолутно“ ќе бидат воведени царини и кон Европската Унија затоа што блокот не применува фер трговски практики кон САД.
Веднаш по најавата на Трамп, Мексико и Канада најавија контрамерки, па американскиот претседател ги одложи царините за еден месец. Пекинг возврати на ударот на Трамп отворајќи истрага за „Гугл“ и воведувајќи нови царини.
Од денеска престанува со работа УСАИД, исто така како резултат на потезите на новиот американски претседател. Вработените се на принуден одмор и треба да се вратат во САД. Во текот на викендот Маск ја нарече агенцијата „криминална организација“, која треба „да умре“. „Корупцијата и отпадот се искоренуваат во реално време“, објави Маск на X, велејќи дека службениците од неговиот оддел за владина ефикасност „забрзано запираат“ исплати кон таквите организации.
Неделава силно одекна и изјавата на Трамп дека САД сакаат економски да го развијат подрачјето за Газа, како што рече, да стане „нова ривиера на Блискиот Исток“. На заедничката прес-конференција со израелскиот премиер Бенјамин Нетанјаху тој рече дека САД треба да ја преземат контролата над Појасот Газа, кој е разорен од војна, и дека Палестинците треба да бидат преселени во други земји.
Прочитајте повеќе:
Трговците се обложуваат на „ролеркостер“ за еврото
Трамп ѝ се наврте на чистата енергија, ги чешла заемите дадени за таа намена
Во земјава во тек е дебатата за кошничката и минималната плата. Владата најави дека ќе утврдува своја минимална кошничка затоа што таа на ССМ содржи сезонски овошја што не се вообичаени за овој период. Откако ќе се утврди новата кошничка, ќе се разговара и за минималната плата. Власта исто така најави дека ако синдикатите и работодавците (ОРМ) постигнат некаков договор, таа ќе го почитува. Но ССМ и ОРМ се далеку од договор. ССМ бара минималецот да изнесува 450 евра, ОРМ преку анкета проверува дали компаниите се согласуваат на зголемување над законот. Ние, пак, анализиравме кој зема минимална плата во земјава. Податоците за исплатите во декември покажуваат дека помалку од четири отсто од вработени работат за минималец.
Го анализиравме и јавниот долг. Земјава е на граница да ја пробие границата од 10 милијарди евра долг, а задолжувањето продолжува. И нови обврски достасуваат. По одлука на Уставниот суд, државата ќе треба да им врати на компаниите околу 50 милиони евра по основ на солидарен данок.
Лошите вести продолжија и во автомобилскиот сектор во земјава. Големите странски инвестиции најавуваат повлекување и отпуштања, а и пред тоа бројките за извозот и индустријата беа лоши.
Прочитајте повеќе:
Најбарани професии: Во светот земјоделци, во Македонија оператори во кол-центри
Линкдин, Апворк или Индид - како најбрзо до работа и квалификуван кадар?
Инфлацијата во еврозоната неочекувано забрза и ја оправда Европската централна банка, која претходно најави претпазливост во однос на натамошното намалување на каматните стапки. Народната банка на Македонија, го следеше последниот потег на ЕЦБ и ја намали каматата за 0,2 п.п.
На глобалните пазари на капитал, претставувањето на новиот кинески модел на вештачка интелигенција Дипсик минатата недела создаде паника на берзите и предизвика сомнеж во моменталната вредност на големите технолошки компании како „Енвидија“, чија пазарна вредност во еден ден се намали за рекордни 593 милијарди долари и веќе не е највредна компанија во светот. Сепак, вчера берзите беа во зелено, а златото продолжи да урива рекорди.
Пишувавме и за случувањата на домашниот пазар на капитал. Ќе сведочиме ли на трка за првата ИПО во Македонија? „Дајнерс клуб Македонија“ и „Глеј“ се подготвуваат да излезат на берза, анализиравме и колкав е интересот за ЕТФ-ови во Македонија.
.webp){kind=icon}
