.webp){kind=icon}
Европската централна банка (ЕЦБ) овој месец веројатно ќе ги зголеми трошоците за задолжување за половина бод, смета Габриел Меклаф, член на Управниот совет, и на тој начин ќе го забави темпото на покачување на каматните стапки како резултат на умерената инфлација за првпат во година и пол.
„Порастот од 50 базични бода е приближно нивото на кое ќе се заврши годината“, рече денеска Меклаф, кој потенцира дека ако биде така, ќе следува ново зголемување на каматите на следните состаноци. Тој смета дека чекорот од покачување за половина бод е минимално потребен за да продолжи инфлацијата да се движи кон правецот за два отсто, колку што изнесува целта на ЕЦБ. Моменталната инфлација е пет пати повисока од тоа.
Bloomberg Mercury
„Мора да бидеме отворени за движење на каматите на рестриктивното подрачје во одреден период. Прерано е да се говори за крајната точка на каматните стапки среде период на неизвесност“, рече шефот на ирската централна банка.
Откако ги покачија каматите за 75 базични бода на последните два состанока, се чини дека надлежните од ЕЦБ се сè поподготвени за помала корекција на последниот годинашен состанок, кој треба да се одржи на 14 и 15 декември.
Коментарите на Меклаф се совпаѓаат со тие на неговите колеги, вклучувајќи го и Французинот Франсоа Волеро де Гала, кој вчера рече дека му дава предност на чекорот од 50 базични бода. Со оглед на тоа дека американските Федерални резерви исто така се подготвени да попуштат во својата борба со растечките потрошувачки цени, пазарот проценува дека ЕЦБ ќе ги покачи каматите за околу половина бод.
„Ако погледнеме кон иднината и какви одлуки се очекуваат од ЕЦБ, за декември проценуваме дека ќе има помал пораст од претходните два состанока“, рече Марио Кантено, шеф на португалската централна банка. Но додека сè укажува дека долгоочекуваниот врв на инфлацијата во еврозоната може да биде всушност во овој квартал, тој смета дека ЕЦБ мора да остане одлучна. „Мора да продолжиме да живееме со тоа дека ЕЦБ ќе продолжи со борбата против инфлацијата за да ја спушти на посакуваното ниво“, додаде Кантено.
