Патниците на аеродромите во Обединетото Кралство се предупредени да се подготват за прекини во текот на денешниот ден, бидејќи службениците на граничните служби стапуваат во штрајк.
Штрајкот ќе ги погоди лондонските аеродроми Хитроу и Гетвик, како и тие во Манчестер, Бирмингем, Кардиф и Глазгов и пристаништето Њухавен. Ќе се одржи од 23 до 26 декември и од 28 до 31 декември.
Стив Дан, главен оперативен директор на граничните служби рече дека плановите за вонредни состојби треба да ги задржат „повеќето, ако не и сите пристаништа отворени“.
Аеродромите го намалија бројот на летови што пристигнуваат за време на штрајкот, додека авиокомпаниите им нудат на патниците можност да се префрлат на летови во деновите кога нема да има штрајк и тоа без дополнителни трошоци.
Од Хитроу инсистираат на тоа дека повеќето патувања нема да бидат засегнати, но велат дека патниците треба да бидат подготвени за подолго време на чекање при контролата на пасошите, предупредување што го повторија и главните авиокомпании.
Велика Британија се наоѓа во период на серија штрајкови во различни сектори, вклучувајќи возови, автобуси, Кралска пошта, државната служба и Националната здравствена служба. Повеќето се однесуваат на нивоата на платите, во услови на инфлација од над 10 отсто во последните месеци.
Штрајкот на граничните служби го организира Синдикатот на јавните и трговските служби, кој бара повисоки плати и поголема безбедност на работните места за своите членови.
.webp){kind=icon}
