Ловците на глави немаат мир од банкарите што бегаат од „Кредит Суис“

Работодавците низ светот добиваат невиден број повици од банкарите од „Кредит Суис“, кои бараат нови работни места откако УБС го презеде швајцарскиот банкарски гигант пред целосно да пропадне. Од Сингапур преку Лондон до Њујорк, регрутерите или популарните „ловци на глави“ и ривалските банки во изминатите неколку дена добиваат повици од вработените на „Кредит Суис“.

Една фирма во Сингапур вчера одговараше на прашањата за достапните работни места поставени од триесетина банкари од „Кредит Суис“, додека друг регрутер во Хонгконг разговараше со повеќе од 20 високи инвестициски банкари. Регрутер од Лондон, каде што „Кредит Суис“ вработува околу 5.500 луѓе, рече дека одговарал на повици целиот викенд. Особен интерес за нова работа имало од лицата во одделот за капитал на „Кредит Суис“,  каде што преклопувањето со постојниот бизнис на УБС е големо.

Ловец на глави од Њујорк рече дека неколку илјади луѓе во „Кредит Суис“ се надевале дека ќе бидат ангажирани од „Кредит Суис фрст Бостон“ - спиноф за инвестиции што беше во срцето на претходните напори за реструктурирање на заемодавецот од Швајцарија. Тоа сега изгледа малку веројатно да се случи и многумина се надеваат дека ќе му се приклучат на УБС, според Мајкл Нелсон, извршен директор во фирмата за вработување „Квест груп“ (Quest Group).

„Ако не одат во КСФБ, ќе мора да емигрираат во одделот на УБС за фиксен приход, што е многу помал бизнис од оној на ’Кредит Суис’“, рече тој во интервјуто. „Моја претпоставка е дека тие ќе ги отпуштат и ќе ги истераат на улица“.

Големиот број повици ја истакнуваат зголемената вознемиреност од персоналот на „Кредит Суис“ поради преземањето што претседателот на УБС, Колм Келехер, го опиша како „итно спасување“. Нивната потрага по нови можности е отежната од актуелната состојба на пазарот на трудот. Имено, големите банки, како „Голдман Сакс“ и „Номура холдингс АД“, го намалуваат бројот на вработените.

„Ние ги охрабруваме колегите да продолжат во потрагата по најдоброто во согласност со нивните способности “, вели за „Блумберг“ портпаролката на „Кредит Суис - Сингапур“. „На крајот на краиштата, ќе сториме сè што можеме за да обезбедиме уредна транзиција и да им служиме на нашите клиенти што е можно подобро“.

УБС не одговори на нашето барањето за коментар преку мејл.

Вил Тан, извршен директор на ПТЕ, регрутна компанија од Сингапур, вели дека повиците од персоналот на „Кредит Суис“ се засилиле во текот на изминатиот месец.

„Најдобрите во ’Кредит Суис’ веројатно веќе заминаа“, рече Тан. Тој посочи на предизвикувачката околина за вработување. „Дефинитивно нема доволно простор за сите“.

Кога го објави договорот, главниот извршен директор на УБС, Ралф Хамерс, рече дека комбинацијата ги поддржува амбициите за раст на управувањето со средствата на банката во Америка и Азија. Тој додаде дека УБС со нетрпение очекува да ги поздрави новите клиенти и колеги низ целиот свет.

Но УБС беше јасен дека ќе има намалување на работните места. Иако не беше соопштена точна бројка, се проценува дека може да бидат скратени 9.000 работни места.

Неколку алумни на „Кредит Суис“ излегоа на социјалните медиуми, нудејќи помош и совети за работниците. Ханади ал Хамуи, која помина една деценија во седиштето на швајцарската банка во Лондон, ги покани своите поранешни колеги да побараат помош доколку е потребно, според „Линкдин пост“. Други во светот на приватниот капитал, како „Спартан советници“, исто така мирисаат можност да соберат талент и бараат од засегнатиот персонал на „Кредит Суис“ да се пријави за работа кај нив.