По Шпанија и Италија, инфлацијата падна и во Франција

Инфлацијата во Франција забави на најниско ниво во претходните 14 месеци, што е дополнителен знак дека Европската централна банка (ЕЦБ) напредува во борбата против инфлацијата и дека зголемувањето на каматните стапки дава резултати.

Индексот на потрошувачките цени во втората по големина економија во еврозоната на годишна основа во јуни се зголеми за 5,3 отсто, објави статистичката агенција „Инси“ (Insee). Во мај стапката на инфлација беше шест отсто, а економистите анкетирани од „Блумберг“ предвидуваа раст од 5,4 отсто.

Стапка на инфлација во Франција (бела линија), Италија (сина линија) и Шпанија (розова линија) Bloomberg

Италија, Белгија и Холандија забележаа забавување на инфлацијата овој месец, а во Шпанија стапката на годишен раст на цените падна под целта на ЕЦБ од два процента. Се очекува и извештајот за целата еврозона (објавен подоцна во текот на денот) да покаже слабеење на растот на цените.

Сепак, ЕЦБ мора да смета на мешаните сигнали. Растот на потрошувачките цени во Германија забрза овој месец, а се очекува забрзување на базичната инфлација во еврозоната, која во претходните месеци стана клучен репер за централните банкари.

„Нашите идни одлуки на прво место ги условивме со проекциите за инфлацијата. На второ место е движењето на базичната инфлација и на трето е темпото на пренос на ефектите од монетарната политика“, рече претседателката на ЕЦБ, Кристин Лагард, на годишниот состанок во Португалија оваа недела. „Доколку нема материјални промени во проекцијата, ќе продолжиме да ги зголемуваме стапките во јули“, додаде таа.

Нејзиниот колега, потпретседателот на ЕЦБ, Луис де Гвиндос, ја опиша таквата одлука како „завршена работа“, но рече дека можноста за дополнително зголемување на следниот состанок во септември останува отворено прашање меѓу официјалните лица, бидејќи тие сè уште ја оценуваат издржливоста на базичната инфлација.

Во своите прелиминарни податоци за инфлацијата, Франција не известува за базичната инфлација, која не вклучува нестабилни ценовни категории, како што е енергијата. Статистиката покажа дека цените на услугите пораснале за 2,9 отсто, што е второ последователно месечно намалување. Сепак, инфлацијата на индустриските производи забрза на 4,3 отсто.

Зголемените трошоци за живот во Франција веќе се одразуваат на потрошувачите, а економијата оваа година ќе забележи слаб раст. Во посебна изјава, „Инси“ соопшти дека трошоците на домаќинствата се зголемиле за 0,5 отсто во мај, бидејќи трошоците за облека, храна и енергија повторно пораснале. Ова е малку под нивото од 0,7 проценти што ги очекуваа економистите во истражувањето на „Блумберг“.

Во моментов нема коментари за веста. Биди прв да коментира...

Остави коментар