Европската Унија мора да инвестира дополнителни 700 милијарди евра (763 милијарди долари) годишно ако сака да ја зазелени економијата и да ги исклучи евтините руски фосилни горива, се наведува во нацрт-извештајот на извршната власт на Унијата.
Според нацрт-извештајот, поголемиот дел од парите треба да биде обезбеден од приватен извор. Оваа сума е значително повисока од онаа што беше предложена од претседателката на Европската комисија, Урсула фон дер Лајен, пред помалку од две години.
„Зелената транзиција бара инвестиции без преседан“, се наведува во таканаречениот извештај за стратегиско предвидување, кој сè уште ќе подлежи на промени пред објавувањето в среда.
Европската Унија, чија цел е намалување на емисиите за 55 отсто оваа деценија, треба да ги зголеми трошоците за чисти технологии во услови на растечка конкуренција од САД и Кина. Блокот исто така мора да обезбеди енергетска безбедност додека се одвикнува од рускиот гас, истовремено справувајќи се со зголемените трошоци за задолжување и огромните долгови создадени од компаниите за време на пандемијата.
ЕУ веќе одвои 578 милијарди евра, речиси една третина од својот повеќегодишен буџет, за климатскиот план за периодот од 2021 до 2027 година. Во ноември 2021 година, пред руската инвазија на Украина да предизвика енергетска криза и неизбежна инфлација, Урсула фон дер Лајен рече дека ќе бидат потребни дополнителни 470 милијарди евра годишно.
Со оглед на ограничените ресурси на буџетот на ЕУ, најголемиот дел од новите инвестиции треба да дојде од приватниот сектор, додека земјите-членки исто така ќе треба да користат сопствени средства. Во нацрт-извештајот се истакнува и ризикот од појава на трка меѓу земјите што би барале субвенции. Европската комисија секоја година подготвува извештај за стратегиско предвидување за своите повеќегодишни програми.
.webp){kind=icon}
