ЕЦБ е при крај со затегнувањето, но каматите ќе останат високи

Европската централна банка e при крај со зголемувањето на каматните стапки, но потоа ќе ги задржи на „високо ниво“ за да се осигура дека тие ќе имаат влијание врз економијата, рече членот на Управниот совет Франсоа Вилерој де Галу.

Рекордниот циклус на затегнување на ЕЦБ ќе ја доведе инфлацијата до целта од 2 отсто до 2025 година, рече гувернерот на Банката на Франција. „Растот на цените во Франција веќе го помина својот врв, забавувајќи се на 5,3 провценти од над 7 проценти претходно оваа година“, додаде тој.

„Во еврозоната, верувам дека наскоро ќе ја достигнеме највисоката точка на каматните стапки“, рече Вилерој на конференцијата во Екс-ан-Прованс, Франција. „Но, кога велам висока точка, ова не е врв, туку ќе биде високо плато, на кое ќе треба да останеме доволно долго време за целосно да ги пренесеме сите ефекти на монетарната политика“.

Коментарите на францускиот централен банкар претходат на одлуката на 27 јули, за која е сигурно дека ќе донесе зголемување на каматната стапка за четвртина поен. Креаторите на политиките дебатираат дали повторно да ги зголемат трошоците за задолжување на нивниот следен состанок во септември.

Гувернерот на Банката на Португалија, Марио Сентено, говорејќи на истиот панел со Вилерој, рече дека ЕЦБ има напредок во ставањето на растот на цените под контрола.

„Инфлацијата се намалува побрзо отколку што се качуваше“, рече тој. „Треба да го поттикнеме овој процес и да бидеме многу уверени дека можеме да го направиме тоа“.

Тој, исто така, забележа дека пазарот на труд во Европа е „најсилен“ досега.

Вилерој се осврна на дебатата за целта за инфлација на ЕЦБ од два проценти велејќи дека нема смисла таа да се подигне. Според него, тоа ќе создаде несигурност за инфлацијата и ќе го оштети кредибилитетот на централната банка.

Францускиот министер за финансии Бруно Ле Мер вчера ја поздрави дискусијата меѓу економистите за тоа дали повисока цел може да обезбеди пониски трошоци за задолжување за финансирање на климатската транзиција, велејќи дека „не треба да има табуа“.

„Верувам дека тоа е пример за лажна добра идеја“, рече Вилерој. „Ако објавиме дека нашата цел на инфлација е 3 наместо 2 проценти, кредиторите веднаш ќе побараат повисоки каматни стапки“., додаде тој.

Во моментов нема коментари за веста. Биди прв да коментира...

Остави коментар