БоЕ ги подигна стапките на највисоко ниво во последните 15 години

Банката на Англија (БоЕ) ги зголеми каматните стапки до нов 15-годишен рекорд, предупредувајќи дека нејзината борба против инфлацијата може да наметне построги услови за задолжување на подолг период.

Централната банка на Британија ја подигна основната стапка за 25 базични поени, на 5,25 отсто во четвртокот, што е помало покачување од зголемувањето за половина поен испорачано во јуни. Инвеститорите и економистите го очекуваа овој потег и прогнозираат натамошни зголемувања годинава.

Креаторите на политиката предводени од гувернерот Ендрју Бејли ја оставија отворена вратата за понатамошни мерки доколку инфлацијата остане и посочија дека нивниот став ќе остане „рестриктивен доволно долго“ за да се постигне целта од два отсто.

Банката ја намали прогнозата за раст во следните две години и ги зголеми очекувањата за изгледите за инфлацијата на среден рок, сигнализирајќи мрачна позадина за следните општи избори, кои мора да се одржат до почетокот на 2025 година. Премиерот Риши Сунак досега ја поддржуваше банка во борбата против инфлацијата, посочувајќи го преполовувањето на стапката на зголемување на цените како едно од неговите пет клучни ветувања за оваа година.

Одлуката укажа на растечката поделба на деветчлениот Комитет за монетарна политика за тоа како БоЕ треба да одговори на индикаторите кои покажуваат дека платите и цените растат премногу брзо, додека активноста во економијата слабее.

Кетрин Ман и Џонатан Хаскел гласаа за зголемување од половина поен. Свати Дингра не бараше промена. Останатите шест членови, вклучувајќи ги Бејли и неговите заменици, беа мнозинство и истакнаа дека нивната акција ќе тежи многу на домаќинствата и бизнисите.

„Инфлацијата паѓа и тоа е добра вест“, рече Бејли во изјавата објавена во четвртокот од БоЕ. „Знаеме дека инфлацијата тешко погодува и треба да бидеме апсолутно сигурни дека таа ќе се врати до целта од два отсто“.

БоЕ ги задржа своите насоки дека „ако има докази за поупорни притисоци, тогаш ќе биде потребно дополнително заострување на монетарната политика“, покажаа записниците од состанокот. Додаде реченица што сугерира дека откако ќе заврши циклусот на затегнување, стапките може да останат покачени некое време.

„Комитетот за монетарна политика ќе се погрижи Банкарската стапка да биде доволно рестриктивна доволно долго за да ја врати инфлацијата до целта од два отсто на среден рок, во согласност со неговите обврски“.

БоЕ ја одржа својата прогноза дека индексот на потрошувачките цени, кој достигна 11,1 отсто минатата година, ќе потоне на 4,9 отсто во четвртиот квартал од оваа година, што сугерира дека Сунак ќе го исполни своето ветување.

Централната прогноза покажува дека економијата на Обединетото Кралство ќе избегне рецесија пред општите избори. Сепак, графиконите што го покажуваат опсегот на можни сценарија сугерираат дека сè уште постои значителен ризик од контракција.

Британската економија најверојатно ќе стагнира до 2025 година, според прогнозите на БоЕ. Банката очекува бруто домашниот производ да порасне за 0,5 отсто во 2023 и во 2024 година и за 0,25 отсто во 2025 година.

Во моментов нема коментари за веста. Биди прв да коментира...

Остави коментар