.webp){kind=icon}
Британските банкноти со портретот на кралот Чарлс Трети од денеска ќе влезат во оптек, иако тие веројатно извесно време ќе бидат ретки во секојдневните трансакции во готовина.
Банката на Англија (БоЕ) соопшти дека новите банкноти ќе бидат печатени само за да ги заменат оние што ја прикажуваат кралицата Елизабета Втора и се многу оштетени или за да се задоволи секој пораст на побарувачката во време кога употребата на готовина е во опаѓање.
Бавното воведување од страна на британската централна банка е за да се намали финансиското влијание и влијанието врз животната средина по насоки од Кралското домаќинство, бидејќи кралот Чарлс III (75) е добро познат како поддржувач на борбата за климата.
Тоа значи дека банкнотите со кралицата Елизабета Втора ќе циркулираат паралелно со новите банкноти и извесно време ќе го чинат најголемиот дел од оние што се користат во секојдневните трансакции.
БоЕ соопшти дека банкнотите со слика од Чарлс ќе бидат издавани „многу постепено“ и не го откри бројот на банкноти во првичното печатење.
Сегашната серија полимерни банкноти почна да влегува во оптек во 2016 година и се направени со цел за подолг животен век. БоЕ очекува полимерните банкноти од 5 и 10 фунти да траат најмалку пет години, додека просечниот животен век на банкнотите од 20 фунти би можел да биде поголем од 20 години поради начинот на кој јавноста ги користи.
Со оглед на нивното постепено воведување во оптек, БоЕ ѝ нуди на јавноста привремена услуга каде што граѓаните ќе можат да ги разменат своите стари фунти.
Британците можат да испратат до 300 фунти во пошта и да добијат нови банкноти со Чарлс, услуга што ќе се нуди само до 30 јуни. Исто така, тие можат да разменуваат банкноти до 300 фунти на шалтер на БоЕ во Лондон до 11 јуни. Сепак, централната банка предупреди дека се можни долги редови за чекање.
Тие, исто така, ќе бидат достапни во одредена група филијали на поштата пред да бидат претставени во други во наредните недели.
БоЕ соопшти дека во текот на летото ќе се одржуваат хуманитарни аукции на банкноти со низок сериски број.
На задната страна на полимерните банкноти - на која се претставени поранешниот премиер Винстон Черчил, авторката Џејн Остин, сликарот ЏМВ Тарнер и Алан Тјуринг - ќе бидат непроменети.
Гувернерот на БоЕ, Ендрју Бејли, рече дека ова е „историски момент, бидејќи е првпат да го смениме суверенот на нашите банкноти“. Кралицата Елизабета Втора беше првиот монарх прикажан на банкнотите на БоЕ во 1960 година.
„Знаеме дека готовината е важна за многу луѓе и посветени сме на обезбедување банкноти онолку долго колку што ќе ги бара јавноста“, додаде Бејли.
