Украина ја испрати својата прва пратка жито од почетокот на руската инвазија, што претставува мал, но клучен прв чекор кон отклучување на милионите тони складирано жито во земјата и зголемување на светските резерви на храна.
Товарниот брод „Разони“ натоварен со 26.527 тони пченка, замина за Либан во понеделникот наутро, според Обединетите нации, кои помагаат да се постигне договор со Турција за рестартирање на извозот. Украинскиот министер за инфраструктура, Олександр Кубраков, го потврди отпловувањето и рече дека има уште 16 бродови во поширокиот регион на Одеса што чекаат на ред за пловидба.
Украина е еден од најголемите производители на пченица, пченка и растително масло, а загубата во извозот преку пристаништата на Црното Море ја потресе светската трговија со храна и ја зголеми заканата од глобална криза. Заминувањето на „Разони“ претставува пресвртница во рамки на договорот од 22 јули за создавање безбедни бродски коридори низ трите украински пристаништа, иако не е јасно колку брзо може да се зголеми извозот.
Десетици бродови се заглавени во пристаништата долж Црното Море и се очекува да почнат да се движат во „каравани“ доколку се биде во ред. Сепак, сопствениците на бродовите ќе треба да обезбедат осигурување на товарот и на пловилата, но и да најдат доволен број на екипаж за да плови со нив. Нападот на Русија врз пристаништето Одеса со крстосувачки ракети неколку часа по потпишувањето на договорот ги отвори прашањата за спроведувањето на договорот.
„Обезбедувањето дека постоечките житарки и прехранбени производи може да се транспортираат на светските пазари е хуманитарен императив“, изјави портпаролот на генералниот секретар на ОН, Антонио Гутереш. „Генералниот секретар се надева дека ова ќе биде првиот од многуте комерцијални бродови што ќе се движат според договорот“, додаде тој.
Светската програма за храна, исто така, планира да купи, натовари и испрати првично 30.000 тони пченица од Украина на брод изнајмен од ОН, а повеќе детали се очекуваат во наредните денови.
Украина очекува да достигне полн капацитет за транспорт на земјоделски стоки во рок од неколку недели, напиша Кубраков.
Според турското Министерство за одбрана, бродот „Разони“ се очекува да пристигне во Истанбул во вторник. Договорот предвидува мониторинг од заеднички координативен центар во Истанбул, со претставници на сите страни.
.webp){kind=icon}
