На 31.12.2025 година 129.793 лица имале засновано работен однос во вкупно од 1.370 институции на јавниот сектор, покажува извештајот од регистарот на вработените во јавниот сектор за 2025 година на Министерството за јавна администрација. Во однос на 2024 година, бројот на вработените во јавниот сектор е зголемен за 2.471 лице, а бројот на институции е намален за 4.
„Позабележителното зголемување на бројот на вработените во јавниот сектор во однос на извештајот за 2024 година, пред се се должи на финалното усогласување и синхронизирање на процесот за централизирано генерирање на потребните податоци за подготовка на годишниот извештај од регистарот на вработените во јавниот сектор, едниствено и само од евиденцијата содржана во Информациониот Систем за Управување со Човечки Ресурси (ИСУЧР), кој процес министерството го започна уште во минатата година, а истиот е и законски пропишан“, се наведува во извештајот.
Во него се додава дека вкупниот број на вработените во јавниот сектор не соодветствува со вкупниот број на пополнети работни места, од причина што има вработени пред сѐ во областа на образованието и во здравството кои пополнуваат работни места во две или повеќе институции на јавниот сектор (наставниците кои немаат полн фонд на часови се ангажираат во две или повеќе училишта, а професорите од медицинскиот факултет пополнуваат работни места и во здравствените установи и на факултетите).
Прочитај повеќе
Седум предизвици што ќе ја обликуваат македонската економија и во 2026 година
Меѓу клучните предизвици со кои се соочува економијата се инфлацијата, индустријата, која покажува особена нестабилност, реформите за кои се зборува со години, недостигот од работа сила, дигитализацијата, која останува на хартија.
18.11.2025
Следната недела: Платите нагоре, а продуктивноста?
Откриваме дали платите во Македонија растат правопропорционално на продуктивноста и какви се последиците од неадекватно зголемување на платите во администрацијата.
06.09.2025
Просечна возраст на вработените 46,6 години
Во извештајот се нагласува дека од вкупниот број вработени војавниот сектор, 18.908 лица се вработени во Армијата, Агенцијата за разузнавање, Агенцијата за национална безбедност, Министерството за внатрешни работи и органот во негов состав - Бирото за јавна безбедност, како и во органот во состав на Министерството за финансии – Управата за финансиско разузнавање. Тие имаат статус на овластени службени лица за кои согласно законот во регистарот се водат податоци само за бројот на вработени, но не и за нивната структура.
Во извештајот е направена анализа на структурата на податоци за останатите 110.885 вработени во јавниот сектор, од кои жени се 63.808, додека мажи се 47.077. Просечната возраст на овие вработени изнесува 46,6 години, кај жените просекот е 45,81 години, додека кај мажите 47,58 години.
„Генерално, жените се позастапени во речиси сите видови на институции. Сепак, треба да се има во предвид дека од вкупната бројка на вработени во јавен сектор која се анализира по структура, изземени се Армијата на Република Северна Македонија, овластените службени лица во Министерството за внатрешни работи и органот во состав на министерството, Агенцијата за разузнавање, Агенцијата за национална безбедност и органот во состав на Министерството за финансии – Управа за финансиска полиција во кои мажите се позастапени“, се наведува во извештајот.
Од сите вработени во јавниот сектор 1.633 се доктори на науки, 4.838 се магистри, 43.425 се со високо образование, 3.966 се со вишо образование, 711 се со пост-средно, 27.536 се со средно образование (ССС), а 5.548 се со основно образование.
Во однос на етничката структура, 80.250 се Македонци, 24.064 се Албанци, 2.283 се Турци, 1.285 се Роми, 1.060 се Срби, 544 се Бошњаци, 456 се Власи, а 943 се други или не се изјасниле.
Број и статуси на вработени по вид на институции
Во Собранието на Македонија вработени се вкупно 298 лица, а во јавните претпријатија основани од законодавниот дом работат 792 лица, во регулаторните тела 476 лица, во самостојните државни органи има 909 вработени и 6 вработени има во самостојните стручни органи. Вкупно во овие институции има 2.481 вработени кои се распоредени во две групи, административни службеници (државни и друг вид службеници) и помошнотехнички лица.
Во Владата и нејзините институции се вработени вкупно 730 лица.
Вкупниот број на вработени во министерствата (без МВР) изнесува 5.818 лица кои имаат статус на државни службеници и помошно-технички лица, освен во Министерството за земјоделство, шумарство и водостопанство каде има вработено и овластени службени лица (шумска полиција) и во Министерството за надворешни работи каде има друг вид службеници – дипломати.
Во органите во состав на министерствата работат вкупно 3.203 лица, а во самостојните органи на државната управа вработени се 3.167 лица. Во независните институции чиј основ произлегува од Уставот на Македонија вкупно се вработени 620 лице, од кои 475 во Народната банка, 84 кај Народниот правобранител и 61 во Уставниот суд. Во правосудните институции вкупно се вработени 2.823 лица. Од нив, 2.221 се вработени во судовите, 546 во јавните обвинителства, 16 во Советот на јавни обвинители и 40 во Судскиот совет. Вработените имаат статус на административни службеници (судски службеници во судовите, јавнообвинителски службеници во јавните обвинителства и државни службеници во советите), службени лица со посебни овластувања и на помошно-технички лица.
Најголем број вработени во јавните установи
Јавните установи имаат најголем број на вработени, односно во нив вкупно се вработени 68.562 лица распоредени во три групи: административни (јавни) службеници, даватели на јавни услуги (кои се најмногубројни, а чиј назив е преземен од Законот за установите кој е донесен во 2005 година, а согласно кои установите се даватели на јавни услуги) и помошно-технички лица. Во рамките на јавните установи најмногу вработени има во установите од областа на образованието 37.462, по што следуваат установите од областа на здравството 19.048, установите од областа на труд и социјала 7.520, установите од областа на културата 3.478, установите од областа на правдата 927, установите од областа на животната средина 123 и установите од областа на информатичко општество 4 вработени.
Во јавните претпријатија има вработено вкупно 16.556 лица, распоредени во три групи и тоа, административни (јавни) службеници, даватели на јавни услуги и помошно-технички лица. Најмногу вработени има во јавните претпријатија од областа на комуналните работи. По нив следуваат од областа на транспортот, земјоделие и шумарство, информирање, друга дејност од јавен интерес и информатичко општество. Во единиците на локална самоуправа вкупно се вработени 6.209 лица, распоредени во две групи, административни службеници (државни) и помошно-технички лица.
Над 500 вработени во 27 институции
Од активните институции најмногу се со големина до 50 вработени и такви во 2025 година биле вкупно 531 институции. Втори по бројност се институциите кои имаат до 100 вработени и такви во 2025 година биле 403 институции. Над 500 вработени има во 27 институции и тоа се некои министерства (Министерство за финансии, Министерството за земјоделство, шумарство и водостопанство и други), големите државни институции (Царинската управа, Фондот за здравствено осигурување и други), некои државни јавни претпријатија (МРТ, Национални шуми, Јавно претпријатие за железничка инфраструктура – Железници на РСМ и други) и јавни претпријатија на Градот Скопје (ЈСП, Комунална хигиена, Водовод и канализација и други), а исто така во оваа група има и дел од поголемите јавни здравствени установи (ГОБ 8 Септември во Скопје, Клиничка болница во Тетово, Клиничка болница Битола и други)
Човек-институции
Забележително е дека во јавниот сектор во Македонија има петнаесетина институции, кои имаат само по еден вработен.
А, има и неколку примери за институции кои имаат директор, а немаат ниту еден вработен.
.webp){kind=icon}
