До санирање на дефектот на едниот блок во РЕК Битола ќе имаме мали набавки на електрична енергија, но со пуштањето на вториот блок, а наскоро и на третиот, повторно ќе немаме потреба од увоз, истакна денеска премиерот Димитар Ковачевски.
Одговарајќи на новинарски прашања по денешниот увид на градежните работи на тунелот на автопатот Кичево - Охрид, тој информираше дека се работи на санација на пукната цевка на еден од блоковите во РЕК Битола и оти за неколку дена дефектот треба да биде саниран.
Во однос на пуштањето на третиот блок, пак, информираше дека трансформаторот е купен и оти се транспортира кон земјава, но поради големината и тежината, транспортот ќе бил комбиниран со брод и со камион.
МИА
„Благодарение на добрите односи коишто ги имаме со Грција успеавме во рекордно време да ги добиеме сите транспортни дозволи за да може да премине од грчка територија во нашата држава. Сега стручните екипи на РЕК Битола, заедно со професори од Архитектонскиот факултет, Градежниот факултет, работат на еден на мостовите кај Новаци, бидејќи тоа е мост којшто има издржливост од 10 тони. Се работи за транспорт од 300 тони заедно со возилото, но со оглед на тоа дека се работи за возило со десет осовини, со одредени зафати коишто ќе бидат направени, би требало до 22 ноември трансформаторот да биде во Битола и да започне неговата монтажа“, појасни Ковачевски.
Тој нагласи дека ТЕЦ Неготино не работи поради високата цена на мазутот и пречки во работењето на генераторот.
„Во овој период заедно со сите стручни екипи со коишто располага државата да се санира генераторот и да биде пуштен кога за тоа ќе се створат услови во однос на цената на мазутот и цената на електричната енергија на берзите. ТЕЦ Осломеј работи, ТЕ-ТО во моментот работи со гас којшто го имаат обезбедено сопствениците на гас и тие го продаваат на слободен пазар“, рече премиерот.
Потсети и на можноста за набавка на гас по пониска цена од вишоците на соседна Србија.
„Тие имаат резервоари за гас, ние такви не поседуваме историски, може да се произведе електрична енергија којашто ќе биде со цена многу пониска од берзанската и којашто би била наменета дел за македонското стопанство, а бидејќи ќе се работи за српски гас, дел за снабдување на недостатоците на електрична енергија во јужна Србија односно во Пчињскиот регион“, истакна Ковачевски.
.webp){kind=icon}
