Првите делови од новиот трансформатор за третиот блок на РЕК Битола пристигнаа во комбинатот. Како што беше најавено, првиот дел од долгата композиција што го пренесува 240 тони тешкиот трансформатор денеска ја помина главната капија на РЕК Битола, информираат од АД ЕСМ.
Новиот трансформатор за Блок 3 на РЕК Битола го изработи турската компанија „Астор“. АД ЕСМ за набавката одвои 6.431.000 евра. Ова, како што велат од АД ЕСМ, е првпат во 40 години постоење на РЕК Битола да се набави ваква постројка.
„Транспортот на новиот трансформатор за Блок 3 на РЕК Битола е најголемиот и најтежок вонгабаритен транспорт што воопшто некогаш бил организиран во земјава. Трансформаторот се пренесува со специјална композиција преку копно низ Турција, потоа бродски до солунското пристаниште и оттаму повторно по копно до РЕК Битола. За сигурен и безбеден транспорт на трансформаторот се преземени специјални услови за движење, зајакнување на патната инфраструктура на одредени делови на трасата, посебна сообраќајна регулација и управување со мала брзина“, потенцираат од АД ЕСМ.
Оттаму појаснуваат дека откако ќе пристигнат сите делови од трансформаторот во РЕК Битола, ќе бидат потребни десетина дена за негова монтажа и ставање во погон.
Министерот за економија Крешник Бектеши денеска потврди дека од 1 декември годинава ќе бидат ставени во функција сите производствени капацитети за електрична енергија со кои располага АД ЕСМ.
Тој наедно нагласи дека не се предвидува од 1 јануари идната година да има значително зголемување на цената на струјата, особено не за домаќинствата и за малите потрошувачи.
.webp){kind=icon}
