Општина Центар следната година планира да формира претпријатие за производство на електрична енергија за потребите на основните училишта и за други објекти во општината. Одлуката денеска ја презентира градоначалникот Горан Герасимовски, на вториот Социоеколошки форум (СЕФ), во организација на фондацијата „Фридрих Еберт“, меѓународниот центар „Олоф Палме“ и „Прогрес – институтот за социјална демократија“.
„Преку новото јавно претпријатие ќе започнеме со поставување фотоволтаици за почеток на основните училишта, а потоа и на другите објекти што се во надлежност на Општината. Со работата на јавното претпријатие и поставувањето на фотоволтаиците на основните училишта, значително ќе заштедиме на сметки за топлинска и електрична енергија“, посочи Герасимовски, пренесува МИА.
Иницијативата за основање општинско јавно претпријатие за производство на електрична енергија, како што информираат од Општината, е донесена едногласно од страна на советниците на 14-та седница. На последната, 16-та седница на Советот на Општина Центар, советниците ги изгласале и планот и програмите за развој на Општина Центар за периодот од 2023 до 2025 година, во кои е содржан и проектот за поставување фотоволтаици на основните училишта.
.webp){kind=icon}
